Tʼusan tsaʼan ja bʼa Pascua, ja Jesús soka snebʼumanik kumxiye bʼa Galilea. Ja bʼa sbʼejyele ti ekʼye bʼa Samaria sok ti jijliye mojan bʼa chonabʼ Sicar, bʼa sposo ajyi ja Jacob. Ja Jesús ti kan jijluk tiw malan ja snebʼumanik waj sman-e waʼelal ja bʼa chonabʼi.

Jun ixuk ja bʼa poso jak ya el jaʼ. Jaxa Jesús yalyabʼ: «Aki tʼun jaʼ bʼa oj jkuʼ». Ja ixuki yala: «¿Jas yuj waxa kʼumanoni? Ja keʼn ti jbʼaj bʼa Samaria. Ja judíoʼik mini skʼuman sbʼaje soka swinkil ja Samaria». Pe ja Jesús yala: «Lek wanukxta xa naʼa jbʼaj, ojni akʼanki jaʼ bʼa yujel, sok jaxa keʼn oj kawi jaʼ bʼa sakʼanil». Ja ixuki sjobʼo: «¿Jas wa xkʼana wale? Pe mi jas awiʼoj bʼa oj wa eluk ja jaʼi». Ja Jesús sjakʼa: «Ja maʼ wa xyuʼaj ja jaʼ wa xkayi mixani ojto takuk stiʼ». Ja ixuki yala: «Kajwal, aki ja jaʼ jaw».

Jaxa Jesús yala: «Kax payajan jawa tatami». Pe ja yeʼn yala: «Mey jtatam». Ja Jesús yala: «Meraniʼa, yujni nupaniyata joʼe ekʼele sok ja wego awiʼoj jun winik, pe mini nupanelukex». Ja ixuki sjakʼa: «Wa xkila kʼotela jun aluman. Ja jchonabʼi skʼuʼuneje wa xbʼobʼ kaʼteltaytikon ja Dyos ja bʼa wits it, pe ja judíoʼik wa xyalawe ti oj aʼteltaxuk ja Dyos bʼa Jerusalén. Wa xkʼuʼan yajni xjul ja Mesías, yeʼn oj sjekitik jastal yaʼteltajel ja Dyosi». Anto ja Jesús yala jun jasunuk mito maʼ yalunej yabʼi: «Keʼnon ja Mesías».

Ja ixuki ajnelxta waj man xchonabʼ sok yalyabʼ ja swinkil Samaria: «Lajansok jtaʼata ja  Mesías. Wa snaʼa yibʼanal sbʼaja jsakʼanil. Laʼik sok la ilawik». Ja yuj wajye soka yeʼn ja bʼa poso bʼa smaklajel ja sjejelik bʼa Jesús.

Jaxa swinkil ja Samaria skʼanaweyi ja Jesús akanuk smoke. Ti kan chabʼ kʼakʼu b’a chonabʼ jaw sok jel jastik sjeʼa, sok jitsan skʼuʼane bʼa yeʼn. Tsaʼan tixa yalawe yabʼ ja ixuki: «Soka jastik yala ja winik it, wa xkʼuʼantikon lek yeʼnani ja meran koltanum ja bʼa ixuk winiki».