Tʼusan tsaʼan yajni yiʼaj jaʼi, ja Jesús kʼe xchole: «Ja sGobyerno ja Dyosi mojanxa». Waj ekʼ soka snebʼumanik bʼa yibʼanal ja Galilea sok bʼa Judea. Yajni ja Jesús kumxi ja bʼa slugari, ja bʼa Nazaret, waj bʼa sinagoga, ti sjama ja royo bʼa Isaías sok skʼuman tsats: «Ja Jyoba yaʼunejki ja yip bʼa oj jchol ja slekil rasoni». ¿Jas kʼan yal? Ja ixuk winik wa skʼanawe oj yile ja milagroʼik bʼa Jesús. Pe ja yeʼn mi ajiyi ipal kechan bʼa skʼulajel milagroʼik. Ja mas tʼilan jani xcholjel ja lekil rason sbʼaja sGobyerno ja Dyosi. Tixa yalakan yabʼ ja matik wane smaklajeli: «Yan wa xkʼot ja jas tsʼijbʼunubʼalkani».

Tsaʼan, ja Jesús waj bʼa mar bʼa Galilea. Ja tiw snaʼa sbʼaj chanwane snebʼumanik bʼa kʼotele yama chay sok yala yabʼye: «Laʼik jmok sok oj jekex slejel ixuk winik». Ja winike it sbʼiʼile Pedro, Andrés, Santiago sok Juan. Wegoxta yawekan ja snegosyoʼe bʼa syamjel chay sok wajye soka Jesús. Wajye ekʼ bʼa yibʼanal ja Galilea bʼa xcholjel ekʼ ja sGobyerno ja Jyoba. Xcholowe ekʼ bʼa sinagogaʼik, bʼa merkadoʼik sok bʼa bʼejik. Jitsan ixuk winik nochwaniye ekʼ ja bʼa wajye ekʼi. Chʼak yabʼye yabʼalil bʼa Jesús bʼa tuktukil lugar, sok man bʼa jun lugar najat lek sbʼiʼil Siria.

Ekʼ ja tyempo, ja Jesús yayi ja ipal jujuntik ja snebʼumaniki bʼa stojbʼesel ja matik maloʼayi sok yajel eluk ja pukujiki. Tuk smojtaye ekʼ xcholjel bʼa chonabʼaltik sok bʼa lugaraltik. Cha mojtajiye sok jun tsome ixuke toj bʼa smakʼlaye ja Jesús soka snebʼumaniki. Tey ja María Magdalena, ja Juana, ja Susana sok tuk ixuke.

Yajni chʼak xchap ja snebʼumanik, ja Jesús sjeka xcholjel. Yajni wajume ja bʼa sbʼejyele man Galilea, jitsan cha ochye nebʼumanik bʼa Jesús sok yiʼaje jaʼ. Jelni jitsan ja matik wa skʼanawe ochel nebʼuman bʼa Jesús, ja yuj ya slaj jastal jun alaj bʼa lekxa sjachʼjel. Ja yeʼn yala: «Kʼumanik ja Jyoba bʼa a-sjek mas aʼtijumik bʼa sjachʼjel ja alaji». Tsaʼan, stsaʼa 70 ja bʼa snebʼumanik sok sjeka chatike bʼa xcholjel yibʼanal ja bʼa Judea. Xcholowe yabʼ chikan maʼ ixuk winik sbʼa sGobyerno ja Dyosi. Yajni kumxiye ja nebʼumaniki, jelxani sganaʼe  yaljelyabʼ ja Jesús jastal wajyujile. Ja Dyablo mini jas bʼobʼ skʼuluk bʼa stimjel ja xcholjeli.

Ja Jesús xchapakan yibʼanal bʼa jachuk ja snebʼumanik oj kan skʼuluke ja aʼtel it jel tʼilani yajni ja yeʼn xkumxi bʼa satkʼinal. Yala yabʼye: «Cholowik ja lekil rason sbʼaja sGobyerno ja Dyos bʼa yibʼanal ja luʼumi. Jeʼawikyi ja ixuk winik sbʼaja Yabʼal ja Dyosi sok awik yiʼe jaʼ».