Yajni tʼusanxta skʼana ja Pascua bʼa jabʼil 32, ja nebʼumanik kumxiye bʼa jun sbʼejyele bʼa xcholjel. Jelni yajtik aye, ja yuj ja Jesús yiʼaj och bʼa jun barko man Betsaida bʼa oj jijluke. Pe yajni wanexa mojxel ja bʼa stiʼ jaʼi, ja Jesús yila jitsan ixuk winik nochwaniye och man tiw. Ja yeʼn skʼana oj ajyuk stuchʼil soka snebʼumaniki, pe ama jachuk skisani ja ixuk winik. Ya tojbʼuk ja matik maloʼayi sok kʼe sjeyi jitsan jastik junuk. Xcholoyabʼ sbʼaja sGobyerno ja Dyos snajtil kʼakʼu. Yajni och ja kʼakʼu, ja snebʼumaniki yalawe yabʼ: «Bʼobʼta waʼin xyabʼye ja ixuk winik. Alayabʼ axa wajuke slejel swaʼele».

Pe ja Jesús sjakʼa: «Mi yajnal awajuke. Awikyi tʼun swaʼel il weʼnlex». Ja nebʼumanik sjobʼoweyi: «¿Wan maʼ xa kʼana oj waj mantikonyile pan?». Ja Felipe, june ja bʼa snebʼumaniki, yala: «Ama ay kiʼojtik jitsan takʼin, mi oj lajxuk smanjelyile pan bʼa jitsan ixuk winik».

Ja Jesús sjobʼo: «¿Janekʼ waʼelal kiʼojtik?». Ja Andrés sjakʼa: «Ay kiʼojtik joʼe pan sok chabʼ yal chay. Pe mi oj yaʼe, jel jitsane». Ja Jesús yala: «Iʼawikjanki ja panik soka chayiki». Tixa skʼanayi ja ixuk winik akulanuke bʼa kʼul jach kʼoleʼik bʼa 50 sok bʼa 100. Anto yiʼaj ja panik soka yal chayiki, skʼela bʼa satkʼinal sok yayi jun orasyon. Tixa yayi ja waʼelal ja snebʼumanik bʼa oj spileyi yibʼanal ja ixuk winik. Ja 5,000 winike, cha jachuk ja ixuk soka yal untik, waʼye lek man bʼutʼye. Tsaʼan, ja nebʼumanik chʼak stsome ja janekʼ kani bʼa mok  jipxuk. ¡Sbʼutʼuwe 12 moʼoch! ¿Anke wajni jun milagro jel chamyabʼjel?

Yibʼanal ja ixuk winik jelni cham yilawe sok skʼanawe ja Jesús yeʼn oj kʼot smandaranume. Pe ja Jyoba mi skʼana oj kʼotuk mandaranum yujni mito jaʼuk ja styempoʼili, sok wani snaʼa ja Jesús. Ja yuj yala yabʼ ja ixuk winik axa wajuke sok yala yabʼ ja snebʼumanik awajuke man bʼa pilan skʼaxil ja mar bʼa Galilea. Ja yeʼnle wajye bʼa barko, jaxa Jesús kʼe bʼa wits stuchʼil. ¿Jas yuj? Yujni wa skʼana spiljel tyempo bʼa yajelyi orasyon ja sTati. Ja Jesús tolabida spila tyempo bʼa yajelyi orasyon ama jel latsan ay ja styempo.