Ekʼ tʼusan tyempo yajni sjeʼa sbʼaj ja Jesús soka sjekabʼanumik, ja Pedro yala oj waj syam chay ja bʼa mar bʼa Galilea. Ja Tomás, Santiago, Juan sok tuk nebʼumanik wajye soka Pedro. Pe mini jun chay syamawe snajtil ja akwal.

Sajto lek ja bʼa pilan kʼakʼu, yilawe jun winik tekʼan ekʼ man stiʼ ja jaʼi sok jobʼjiyile: «¿Ay maʼ jasa yamawex?». Ja yeʼnle sjakʼawe: «Miyuk». Ja winiki yala: «Jipawik koʼ jawa wenubʼexi ja bʼa stojol jawa kʼabʼexi». Yajni sjipawe koʼ, ja yenubʼe bʼutʼ jitsan chay sok mixani xbʼobʼ yawe kʼeʼuk ja bʼa barko. Junta chʼaykʼujol, ja Juan snaʼani ja winik it jani ja Jesús sok yala: «¡Yeʼnani ja Kajwaltik!». Ja Pedro sjipa koʼ sbʼaj sok kʼe slok ja jaʼi man kʼot ja bʼa stiʼi. Jaxa tuk nebʼumaniki nabʼan wajye soka barko.

Yajni kʼotye ja bʼa stiʼ jaʼi, yilawe jun tsomubʼal kʼakʼ. Ayni chay ja bʼa  sat kʼakʼi sok pan. Ti kʼanjiyile yuja ja Jesús ayiʼejan tʼusan chay ja bʼa syamaweʼi bʼa oj cha yawe tajuk. Sok ti yalaʼa: «La waʼanik».

Yajni chʼak waʼuke, ja Jesús sjobʼoyi ja Pedro: «¿Mas maʼ waxa yajtayon ja keʼn yuja chayik it?». Ja Pedro sjakʼa: «Mas, Kajwal, ja weʼn waxa naʼa wani xkʼanawa». Ja Jesús yala yabʼ: «Anto, makʼlay ja yal jchejiki». Pilan ekʼele, ja Jesús sjobʼo: «Pedro, ¿wan maʼ xa yajtayon?». Ja Pedro sjakʼa: «Kajwal, ja weʼn waxa naʼa wani xkʼanawa». Ja Jesús yala: «Talnay ja yal jchejiki». Ja Jesús cha sjobʼo bʼa yoxil ekʼele junxta. Ja Pedro jel och stristeʼil sok sjakʼa: «Kajwal, ja weʼn waxa naʼa yibʼanal. Waxa naʼa wani xkʼanawa». Ja Jesús skʼanayi: «Makʼlay ja yal jchejiki». Ti cha yala yabʼ: «Moka waʼonkan bʼa oja nochon».