Yajni ja Jesús tito ay soka sjekabʼanumik ja bʼa kwarto skʼulane ja cena, yala yabʼye: «Apetsanilex ja weʼnlexi ojni ajiponexkan ja akwal it». Ti yala ja Pedro: «Ja keʼn miyuk. Anima ja tuk xyaʼawakani, ja keʼn mini oj jipakani». Pe ja Jesús sjakʼayi ja Pedro: «Bʼajtanto oj okʼuk jun gallo, awalata oxe ekʼele mixa naʼa jbʼaj».

Yajni ja kʼakʼanumik yiʼaje och ja Jesús ja bʼa snaj ja Caifás, tʼusan mi spetsaniluke ja jekabʼanumiki spakaweta ajnel. Pe chawane bʼa yeʼnle snochowe ja ixuk winiki. June bʼa yeʼnle jani ja Pedro. Ja yeʼn och man bʼa spatyoʼil snaj ja Caifás sok mojxi och bʼa oj kʼatnuk. Yuja yijlabʼ ja kʼakʼi, ja Pedro ilji ja sati yuj jun mosoʼal akʼix. Ti alji yabʼa: «¡Wa xnaʼa bʼaj! ¡Tini aya ekʼ soka Jesús!».

Ja Pedro sjakʼa: «Miyuk. Mi meranuk. Mi xnaʼa jasa wana yaljeli». Jaxa Pedro tixa waj bʼa pwerta. Anto ilji sok jun pilan mosoʼal ixuk sok yala yabʼ ja tuki: «¡Ja winik it tini ajyi ekʼ soka Jesús!». Ja Pedro sjakʼa: «¡Mini tʼun xnaʼa machunkiluk ja Jesús!». Chomajkil, jun winik yala: «Ja weʼn kʼotela june bʼa yeʼnle. Jach wala kʼumani jastal ja galileoʼiki, jastalni ja Jesús». Pe ja Pedro staʼa tiʼal ja Dyosi: «¡Mini xnaʼa sbʼaj!».

Ja bʼa jutsʼin jaw, okʼ jun gallo. Ja Pedro yila wan kʼeljel yuja Jesús sok ti julskʼujol ja jas alubʼalyabʼi. Tixa ela sok jel yayi ja okʼeli.

Jaxa ja Sanedrín ti stsomota sbʼaje bʼa snaj ja Caifás bʼa oj xchap-e yabʼalil ja Jesús. Yalaweta oj smil-e sok wane slejel jun smul bʼa oj bʼobʼ skʼuluke. Pe mini staʼaweyi smul. Jaxa Caifás tixa sjobʼoyi ja Jesús: «¿Weʼn maʼ kʼotela ja Yunin ja Dyosi?». Ja Jesús sjakʼa: «Keʼn kʼotelon». Anto ja Caifás yala: «Mixa yajnaluk mas preba. ¡Ja it jun abʼaltanel!». Ja Sanedrín ochye akwerdo sok yalawe: «Ja winik it ojni chamuk». Tixa smakʼawe, stsujbʼane, smakaweyi ja sati, yaweyi  bwelta sok yalawe yabʼ: «¡Ta kʼotela jun aluman, alakabʼtikon machun smakʼawa!».

Yajni sakbʼi, yiʼaje och ja Jesús bʼa snajtsil ja Sanedrín sok cha sjobʼoweyi: «¿Weʼn maʼ kʼotela ja Yunin ja Dyosi?». Ja Jesús sjakʼa: «Weʼn wanex yaljel bʼa keʼn kʼotelon». Anto sleʼaweyi smul bʼa kʼotel abʼaltanum sok tixa yiʼaje och bʼa snaj ja gobyerno bʼa Roma, ja Poncio Pilato. ¿Jasa ekʼ tsaʼani? La kiltik.