Yajni chamta ja Jesús, jun winik riko sbʼiʼil José skʼanayi ja Pilato bʼa yajel koʼuk ja skwerpo ja Jesús ja bʼa lokan ekʼi. Ja José spotso sok kʼuʼutsik bʼa lino jel pino, sbʼalayi yikʼil sok ti yaʼa bʼa jun yajkʼachil kʼeʼen. Tixa sjeka smakjel sok jun niwan ton ja stiʼ ja kʼeʼeni. Ja olomalik sacerdote yalawe yabʼ ja Pilato: «Wa xcham jkʼujoltikon ja snebʼumanik ja Jesús oj yelkʼaye ja skwerpo sok ti oj yal-e sakʼwita ja Jesús». Ja yuj ja Pilato yala: «Lutuwik lek ja kʼeʼeni sok awik talnuman».

Oxe kʼakʼu tsaʼan, jujuntik ixuke sajto lek wajye ja bʼa kʼeʼeni sok yilawe ay maʼ yata eluk ja toni. Ja bʼa yojoli ay jun anjel, ti yalaʼa: «Mok xiwanik. Ja Jesús sakʼwita. Alawik yabʼ ja snebʼumaniki awajuke man Galilea sok ti oj staʼ sbʼaje tiw».

Ja María Magdalena ajnelxta waj sleʼ ja Pedro soka Juan. Yala yabʼ: «Ay maʼ yiʼajta ja skwerpo ja Jesús». Ja Pedro soka Juan ajnelxta wajye man bʼa kʼeʼen. Yajni yilawe mixa jas ay, kumxiye bʼa snaje.

Yajni ja María kumxi ja bʼa kʼeʼeni, ti yila chabʼ anjel ja bʼa yojoli. Ja María yala yabʼ: «Mi xnaʼa bʼa yiʼajeta ja Kajwali». Tixa yila jun winik sok spensaraʼan ta jaʼa aʼtijum bʼa jardini. Ti sjobʼoyi: «Kajwal, awa pabor, alakabʼ bʼa awaʼuneja». Pe yajni ja winiki yala: «¡María!», ja yeʼn snaʼa yeʼn ja Jesús. Ja María yala: «¡Maestro!», sok ti syamaʼa. Ja Jesús yala: «Alayabʼ ja jmoj-aljeliki bʼa awilawonta». Anto, ja María wegoxta waj ajnel sok xcholo yabʼ ja nebʼumanik bʼa yilata ja Jesús.

Mas tsaʼan ja bʼa kʼakʼu jaw, chawane nebʼuman ti elye bʼa Jerusalén sok wajume man Emaús. Och mojtajuke bʼejyel yuj jun winik sok jobʼjiyile jasa sloʼile. Ti yalawe: «¿Yuj me xa wabʼi? Ayxa oxe kʼakʼu, ja olomalik sacerdote yaʼawe mandar bʼa oj smil-e ja Jesús. Jaxa wego jujuntik ixuke wane yaljel sakʼwitabʼi ja yeʼn». Ja winiki sjobʼo: «¿Yuj maʼ mixa kʼuʼanex sbʼaja alumaniki? Ja yeʼnle yalawe ja Kristo tʼilani oj chamuk sok tsaʼan oj sakʼwuk». Tixa och choljuk yabʼye mas jastik  junuk sbʼaja Yabʼal ja Dyos. Yajni kʼotye ja bʼa Emaús, ja nebʼumaniki slokowe akanuksoke. Yajni wane skʼuljel cenar, ja yeʼn skʼulan jun orasyon sbʼaja pani, sok ja nebʼumaniki snaʼawe ja winiki yeʼnani ja Jesús. Anto tixa chʼaya.

Ja chawane nebʼumaniki ajnelxta wajye man Jerusalén. Ti kʼotye ja bʼa naʼits stsomunej sbʼaje ja jekabʼanumiki sok xcholowe ja jas ekʼ sbʼaje. Yajni teye ja bʼa yojol naʼitsi, ti sjeʼa sbʼaj ja Jesús. Ja bʼajtanto, ja jekabʼanumiki mi xbʼobʼ skʼuʼuke ta yeʼn ja Jesús. Pe ja yeʼn yala: «Kʼelawik ja jkʼabʼi, yamawik. Tsʼijbʼunubʼal ja Kristo ojni kʼeʼuk ja bʼa chamwiniki».