Ja Saulo kʼot jun swinkil bʼa Roma bʼa ti pojki bʼa Tarso. Kʼot jun fariseo bʼa jel snaʼa ja leyik bʼa judío sok yilkʼujolan ja nebʼumanik. Kichubʼal wa xya eluk ja winike soka ixuke ja bʼa snaje sok wa xchʼika bʼa preso. Sok yeʼnto kan tekʼan skʼeljel yajni jun nole matik jel tajkel xchʼojowe ton ja Esteban bʼa smiljel.

Pe ja Saulo mi malxi syamjel ja nebʼumanik ja bʼa Jerusalén. Ja yuj skʼanayi ja olomal bʼa sacerdote bʼa ajekjuk man bʼa Damasco bʼa yijel spatik ja nebʼumanik ja tiw. Yajni ja Saulo mojanxa yiʼoj ja chonabʼ, lijpi jun tsatsal ijlabʼ ja bʼayi sok mokʼ man luʼum. Anto yabʼ jun kʼumal: «Saulo, ¿jas yuj waxa wiʼaj jpatiki?». Ja Saulo sjobʼo: «¿Machʼa yaʼa?». Ti jakʼjiyi: «Keʼnon ja Jesús. Kaʼax bʼa Damasco, sok ti oj aljukawabʼ jas oja kʼuluk». Ja bʼa jutsʼin jaw, ja Saulo tup ja sati, sok chechubʼalxa yiʼaje och man chonabʼ.

Ja bʼa Damasco ajyi jun nebʼuman toj sbʼiʼil Ananías. Ja Jesús yalyabʼ bʼa jun nakʼsat: «Kaʼax ja bʼa snaj ja Judas, ja bʼa bʼej sbʼiʼil Tojxta sok leʼa ja Saulo». Ja Ananías sjakʼa: «Kajwal, jelni kabʼunej jastik skʼulunej ja winik it. Ja yeʼn wan xchʼikjel bʼa preso jawa nebʼumanik». Pe ja Jesús yala: «Kaʼax ja bʼayi, yujni jtsaʼunej ja Saulo bʼa oj xchol ja lekil rason bʼa Dyos bʼa yibʼanal ja chonabʼik».

Ja Ananías waj ja bʼay ja Saulo sok yalyabʼ: «Saulo, jmoj-aljel, ja Jesús sjekunejon bʼa oj ka wil kʼinal». Ja Saulo, wegoxta yila kʼinal. Snebʼa jastik junuk sbʼaja Jesús sok kʼot jun nochuman. Yiʼaj jaʼ sok kʼe xchol ja bʼa sinagogaʼik lajan soka smojik nebʼuman. Pensaraʼan, ¿janekʼto maʼ cham yilawe ja judíoʼik yajni yilawe ja Saulo wan sjejel sbʼaja Jesús? Ja judíoʼik wa sjobʼo sbʼaje: «¿Mi maʼ  jaʼuk ja winik it wa xyiʼaj spatik ajyi ja snebʼumanik ja Jesús?».

Ja Saulo xcholo yabʼ oxe jabʼil ja swinkil Damasco. Ja judíoʼik jel yilkʼujolane sok xchapawe oj smil-e. Pe ja smoj-aljeliki yabʼye sok skoltaye bʼa spak ajnel. Yawe koʼuk sok jun moʼoch bʼa jun sjotol ja bʼa sbardaʼil ja chonabʼ.

Yajni ja Saulo waj man Jerusalén, sleʼa modo bʼa yiljel ja smoj-aljelik. Pe ja yeʼnle wa xiwyeyuj ja Saulo. Anto, jun lekil nebʼuman sbʼiʼil Bernabé yiʼaj och ja Saulo ja bʼay ja jekabʼanumik sok ya kʼokxuk ja yeʼnle bʼa meran stukbʼesta sbʼaj ja Saulo. Ja Saulo kʼe xchol kongana ja lekil rason bʼa Dyos lajan soka kongregasyon bʼa Jerusalén. Tsaʼan, naji sbʼaj jastal Pablo.