Yajni ja jekabʼanum Juan ti lutubʼal bʼa isla bʼa Patmos, ja Jesús sjeʼayi 16 nakʼsat sbʼaja tyempo jakumto. Ja Juan yila jastal oj ajuk sakbʼuk ja sbʼiʼil ja Jyoba, jastal oj jakuk ja sGobyerno sok jastal oj kʼulaxuk ja jas wa skʼana ja bʼa luʼum, cha jachni ja bʼa satkʼinal.

Bʼa jun nakʼsat, ja Juan yila ja Jyoba tey ja bʼa tsamal skujlayubʼ bʼa satkʼinal. Ja bʼa sjoyanal ja skujlayubʼ ay 24 ansyano. Slapuneje sakal kʼuʼal sok jun corona bʼa oro. Ja bʼa skujlayubʼ wan lijpel jastal tsantselaw sok wan nililel jastal chawuk. Ja 24 ansyano wa xkoye tinan ja bʼa stiʼ sat ja Jyoba sok wa stoyowe. Bʼa pilan nakʼsat, ja Juan yila jun niwan tsome ixuk winik, bʼa spetsanil ja chonabʼik, lugarik sok kʼumalik, bʼa wa stoyowe ja Jyoba. Ja yal Chej, bʼa yeʼn ja Jesús, yeʼn ja stalnumani sok wa xyiʼaj och ja bʼa jaʼ wa xyaʼa sakʼanil. Bʼa pilan nakʼsat, ja Jesús wa xkʼe ya mandar jastal Mandaranum ja bʼa satkʼinal soka 24 ansyano. Jaxa bʼa jun nakʼsat, ja Juan yila ja Jesús wan tiroʼanel soka tan chan Dragón, ja Satanás, sok ja spukuji. Ja Jesús sjipakon man luʼum.

 Tsaʼan, ja Juan yila jun tsamal nakʼsat sbʼaja yal Chej soka 144,000 tekʼane ekʼ ja bʼa wits Sion. Cha yila jun anjel wan jujpel ekʼ bʼa yibʼanal ja luʼum sok wan yaljel yabʼ ja ixuk winik bʼa axiwukeyuj ja Dyos sok a-stoye.

Bʼa pilan nakʼsat, yila ja kʼakʼanel bʼa Armagedón. Ja bʼa kʼakʼanel jaw, ja Jesús soka skʼakʼanumiki wa skʼulane ganar ja sluʼumkʼinal jel malo bʼa Satanás. Ja bʼa tsaʼanxta nakʼsat, ja Juan yila ja bʼa satkʼinal sok ja bʼa luʼum ay lamanil sok tsoman aye. Cha wa xchʼayji snajel ja Satanás sok ja yintili, ma ja swiniki. Ja bʼa satkʼinal soka bʼa luʼum, yibʼanal wa xyilawe sak ja sbʼiʼil ja Jyoba sok kechanta yeʼn wa stoyowe.