SJEJEL 5
Ja arka bʼa Noé
Yajni ekʼ ja tyempo, ajyi jitsan ixuk winik ja bʼa luʼumi. Tʼusan mi spetsaniluk jel maloʼe. Jujuntik anjel cha paxye maloʼil. Yawekan ja satkʼinali sok koʼyekon bʼa luʼum. ¿Wan maʼ xa naʼa jas yuj? Skʼulan skwerpoʼe jastal winik sok nupaniye soka ixuke.
Ja anjeliki ajyi yuntikile soka ixuke. Ja yuntikile jel ajyi ja yipe sok jel malo wajye. Yixtalane ja ixuk winiki. Ja Jyoba mini yakan oj ekʼuk ja jastik jaw. Ja yuj spensaran xchʼayjel snajel ja maloʼiki bʼa yijeljan jun bʼutʼ jaʼ.
Pe ajyi jun winik bʼa toj waji yujni jel syajtay ja Jyoba. Sbʼiʼilan Noé. Ajyi jun xcheʼum sok oxe yuntikil: Sem, Cam sok Jafet. Ja yuntikili cha ajyi xcheʼume. Ja Jyoba yayi mandar ja Noé bʼa a-stojbʼes jun niwan arka. Ja arka it jach jastal jun niwan kaja bʼa wa xbʼobʼ kayinajuk. Jachuk, ja Noé soka spamilya oj bʼobʼ kanuke sakʼan ja bʼa Bʼutʼ Jaʼ. Chomajkil, ja Jyoba yala yabʼ ja Noé aya ochuk ja bʼa arka jitsan chante, bʼa oj cha kanuke sakʼan.
Ja Noé wegoxta och stojbʼes ja arka. Ja yeʼn soka spamilya albʼiye junuk 50 jabʼil stojbʼesel. Jachni mero stojbʼese jastal yala ja Jyoba. Ja bʼa jabʼilik jaw, ja Noé yala yabʼ ja ixuk winik sbʼaja Bʼutʼ Jaʼi, pe mini skʼuʼane.
Anto, kʼot ja tyempo ochye ja bʼa arka. ¿Wan maʼ xa kʼana oja naʼ jasa ekʼi?
«Jastal ja tiempo [...] ti ajyi ba luum ja Noeji, jach ni oj ajyuc ja cuando la coyon jan» (Mateo 24:37).
Bʼobʼta cha ojni akʼul gusto
BIDEOʼIK
Ja Noé kʼuʼabʼal ajyi soka Dyos
Ja Noé ajyi sakʼan bʼa jun tyempo ja ixuk winiki jel wa spekʼawe chikʼ. Ja yuj, ja Dyos yiʼajan jun niwan bʼutʼ jaʼ. Pe ja Noé kʼuʼabʼal ajyi soka Dyos sok yaʼakan kitik jun lekil sjejel ja bʼa jtyempotiki. Ja bʼa bideo it oja nebʼ jastal soka kʼuʼabʼal ajyi wa skoltayotik jpetsaniltik.
