Ja Noé, ja spamilya soka chanteʼiki ochye ja bʼa arka. Ja Jyoba slutu ja pwerta, sok kʼe ya ja jaʼi. Yuja jel tsats yaʼa, kʼe kayinajuk ja arka. Takal takal, ja jaʼi smusuʼel ja luʼumi. Ja matik jel malo mi ochye ja bʼa arka sok chamye. Pe ja Noé soka spamilya kanye sakʼan yujni ti ajyiye bʼa yojol ja arka. ¿Janekʼto maʼ gusto ajyiye yuja skʼuʼane ja yabʼal ja Jyoba?

Yaʼa 40 kʼakʼu sok 40 akwal ja jaʼi sok tixa kʼot tekʼan. Yajni ekʼ ja tyempo, takal takal och tsʼujuk. Jaxa arka ti kan kajan bʼa jun chaʼan sniʼ wits. Pe yuja mito xchʼak tsʼujuk ja jaʼi, ja Noé soka spamilya tito kanye jun tyempo bʼa yojol ja arka.

Yajni wan ekʼel ja kʼakʼu, ja jaʼi och takuk. Ja Noé soka spamilya kanye mas ja jun jabʼil ja bʼa arka. Anto, tixa aljiyabʼye yuja Jyoba bʼa ojxa bʼobʼ eluke. ¡Lajansok junxa ajkʼach luʼum skʼeljel! Jelni yaʼawe tsʼakatal ja ajiyekan sakʼan yuja Jyoba, ja yuj yaweyi jun majtanal.

Ja Jyoba jelni lek yila ja majtanal jaw. Ja yeʼn skʼapa mixa ojto chʼakwanuk sok jun bʼutʼ jaʼ. Jastal jun senya ja bʼa skʼapjelal jaw, ya eluk sbʼajtanil ekʼele jun kʼintum ja bʼa satkʼinali. ¿Ay maʼ bʼa jun ekʼele awilunej jun kʼintum?

Chomajkil, ja Jyoba yayi mandar ja Noé soka spamilya bʼa aʼajyuk yuntikile sok a-sbʼutʼ-e ja luʼumi.