Ja Abrahán sjeʼayi ja yunin Isaac bʼa a-syajtay ja Jyoba sok a-sjip skʼujol bʼa yibʼanal ja jas skʼapuneji. Pe yajni ja Isaac ayiʼoj junuk 25 jabʼil, ja Jyoba skʼanayi ja Abrahán jun jasunuk jel wokol. ¿Wan maʼ xa naʼa jasunkiluka?

Ja Dyosi yala yabʼ ja Abrahán: «Awa pabor, iʼaj ja kechana wunini sok aʼa jastal majtanal bʼa jun wits ja bʼa slujmal Moria». Ja Abrahán mi snaʼa jas yuj jach kʼanjiyi yuja Jyoba; pe ama jachuk, skʼuʼaniʼa.

Sajto lek ja bʼa pilan kʼakʼu, ja Abrahán yiʼaj ja Isaac sok chabʼ yaʼtijumik bʼa wajel man Moria. Ekʼ oxe kʼakʼu, tixa yilawe ja witsiki, pe najato ay. Ja Abrahán yala yabʼ ja yaʼtijumiki bʼa amajlanuke malan ja yeʼn soka Isaac oj waj yaʼe jun majtanal. Ja Abrahán yiʼaj ja kuchiyo sok yayi ja skerem ja siʼi. Ja Isaac sjobʼoyi ja stati: «¿Bʼay ja chante oj katik bʼa majtanali?». Ja Abrahán sjakʼa: «Kala kerem, yeʼn oj yakitik ja Jyoba».

Yajni kʼotye ja bʼa witsi, skʼulane jun altar. Jaxa Abrahán smochoyi ja skʼabʼ soka yok ja Isaac, sok ti yaʼa bʼa altar.

Ja Abrahán syama ja kuchiyo. Jaxa bʼa jutsʼin jaw, ja anjel bʼa Jyoba kʼumanikon man bʼa satkʼinal: «¡Abrahán! ¡Mok jasa kʼulyi jawa keremi! Ja wego wa xnaʼa ayni awiʼoj skʼuʼajel bʼa Dyos yujni pwesto ajyiya bʼa smiljel jawa wunini». Anto, ja Abrahán yila jun swaw chej ti kanel lokan ja skacho bʼa jun putsan kʼul.  Ja yuj sijpan wego ja Isaac sok smila ja swaw chej bʼa majtanal.

Masan bʼa kʼakʼu jaw, ja Jyoba yala kʼotel yamigo ja Abrahán. ¿Wan maʼ xa naʼa jas yuj? Yujni ja Abrahán skʼulan spetsanil ja jas kʼanjiyi yuja Jyoba, ama mi yabʼ stojolil jas yuj jach kʼanjiyi.

Ja Jyoba cha skʼapayi pilan ekʼele ja Abrahán: «Oj ka koʼuka lekilal sok oj ka pojxuk jawa wintil, oj ajyuk jitsana wuntikil». Ja it wa xkʼan yal, yuja spamilya ja Abrahán, ja Jyoba oj ya koʼuk slekilal yibʼanal ja ixuk winike bʼa leki.