Ja Lot ti ajyi soka stiyo Abrahán ja bʼa slujmal Canaán. Xchawanile kʼe ajyuk jitsan xchanteʼe sok mixa staʼawe bʼa oj yaʼe. Ja yuj, ja Abrahán yala yabʼ ja Lot: «Mixa xbʼobʼ ajyukotik lajan bʼa junxta lugar. Awa pabor, tsaʼa bʼa lugar waxa kʼana oj wajana, jaxa keʼn oj wajkon bʼa pilan». ¿Anke jelni lek waj ja Abrahán?

Ja Lot yila jun penka luʼum jel tsamal mojan ja bʼa chonabʼ sbʼiʼil Sodoma. Ja lugar jaw jel yiʼoj jaʼ sok yaxal ak. Ja yuj stsaʼa ja lugar jaw sok ti waj tiw soka spamilya.

Ja swinkil ja Sodoma soka chonabʼ mojan yiʼoji, ja Gomorra, jelni maloʼe. Yuja jelxelxa ja smaloʼile, ja Jyoba yala oj xchʼaysnajel ja chonabʼik jaw. Pe ja Dyos skʼana oj yakan sakʼan ja Lot soka spamilya, ja yuj sjeka chabʼ anjelik bʼa yaljel yabʼye: «¡Nutsubʼajik! ¡Elanik ja bʼa chonabʼ it! ¡Ja Jyoba oj xchʼake!».

Pe ja Lot mi tixta ela, albʼito. Ja yuj ja anjelik syamaweyi ja skʼabʼ ja Lot, ja bʼa xcheʼumi soka bʼa chabʼ yakʼixuki, sok sjokowe el ajnel ja bʼa chonabʼi. Yalawe yabʼ: «¡Ajnanik! ¡Pakawik ajnel bʼa mi oj chamanik, sok moka kʼela patikex! Ta akʼela apatikex, oj chamanik».

Yajni kʼotye ja bʼa chonabʼ Zóar, ja Jyoba ya koʼkon kʼakʼ sok azufre ja bʼa Sodoma soka Gomorra. Ja chabʼ chonabʼik jaw staʼanil kani. Ja xcheʼum ja Lot skʼoko ja yabʼal ja Jyoba, skʼela spatik sok pax jun  atsʼam ton. Pe ja Lot sok ja yakʼixuki kanye sakʼan yuja ajyiye kʼuʼabʼal. Jelni maʼ triste ajyiye yuja mi skʼuʼan ja xcheʼum ja Lot, pe cha ajyiye laman yuja skʼuʼaneyi ja Jyoba.