Ja Abrahán soka Sara jitsanxa lek jabʼil nupanele. Yaʼawetakan ja lekil snaje ajyi ja bʼa Ur sok tixa aye bʼa yal kʼulubʼal karpa. Pe ja Sara mi yaʼa parte yujni sjipa lek skʼujol bʼa Jyoba.

Yuja jel skʼana oj ajyuk jun yal ja Sara, ja yuj yala yabʼ ja Abrahán: «Yujkʼa ja kaʼtijum Agar ajyi jun skerem, ojni kil jastal kal keʼna». Ekʼ ja tyempo, ja Agar ajyi jun skerem sok yawe sbʼiʼiluk Ismael.

Ekʼ jitsan jabʼil, yajni ja Abrahán ayiʼoj 99 jabʼil jaxa Sara 89, kʼot oxwane yula. Ja Abrahán sloko ajijluke bʼa jun yibʼ teʼ sok bʼa kanel waʼel. ¿Wan maʼ xa naʼa machunkiluke? Kʼotel anjelik. Ja yeʼnle yalawe yabʼ ja Abrahán: «Ja jabʼil jakumi, ja weʼn soka wa cheʼumi oj ajyuk juna keremex». Ja Sara wan smaklajel bʼa yojol yal skarpa. Jaxa yajni yabʼi, och tsenuk bʼa yojol sok spensaraʼan: «¿Meran lek ja ojto ajyuk jun kal ama jelxa awelon?».

Ekʼ jun jabʼil, ja Sara ajyi jun yal, jastalni skʼapa ja anjel bʼa Jyoba. Ja Abrahán ya sbʼiʼiluk Isaac, wa stojolan «tsenel».

Yajni ja Isaac ayiʼoj joʼe jabʼil, ja Sara yila ja Ismael wa skʼenay ja Isaac. Ja yeʼn wa skʼana oj stalnay ja skeremi, ja yuj waj staʼ loʼil ja Abrahán sok skʼanayi a-snuts el ja Agar soka Ismael. Ja bʼajtanto,  ja Abrahán mi skʼana lek. Pe ja Jyoba cha wani skʼana stalnajel ja Isaac, ja yuj yala yabʼ ja Abrahán: «Kʼuʼan ja jas wa xyala ja Sara. Keʼn oj jtalnay ja Ismael. Pe jani soka Isaac oj ka kʼotuk ja jas jkʼapuneji».