Ja Isaac ayiʼoj 40 jabʼil yajni nupani soka Rebeca. Ja yeʼn jel skʼana juntiro ja Rebeca. Ekʼ ja tyempo, ajyi chabʼ skeremtik loj.

Ja bʼankilali sbʼiʼilan Esaú. Jaxa ijtsʼinal sbʼiʼilan Jacob. Ja Esaú jel skʼulan gusto ajyel bʼa jobʼ, sok jel lek smila chanteʼik. Jaxa Jacob mas jel skʼulan gusto ajyel bʼa naʼits.

Ja bʼa tyempo jaw, ja bʼankilali mas wa xyiʼaj jitsan luʼum sok takʼin yajni wa xcham ja tatali. Ja jaw wa sbʼiʼilan dote. Ja bʼa spamilya ja Isaac, ja dote ti chʼikan ja bʼa skʼapjelik ajiyi ja Abrahán yuja Jyoba. Ja Esaú mi skisa ja skʼapjelik jaw. Pe ja Jacob snaʼunej jelni tʼilan.

Jun kʼakʼu, ja Esaú jelxa yajtik kumxi yuja snajtil kʼakʼu wan smiljel ekʼ chanteʼi. Anto, yabʼ yikʼil ja waʼel wan stojbʼesel ja Jacob sok yala: «¡Wanonxa chamel waʼin! ¡Aki tʼunuk ja waʼelal jaw chakxta ja yelawi!». Ja Jacob yala: «Lek, pe bʼajtan kʼapaki oja waki jawa dote». Ja Esaú sjakʼa: «¡Jas yaʼtelkuj ja dote jaw! Iʼajxakani. Ja keʼn wa xkʼana oj wakon». ¿Waj maʼ bibo ja Esaú yajni skʼulan jachuki? Miyuk, mini tʼusan. Yijnay jun jasunuk jel chaʼanyabʼalil kechanta yuj jun sekʼ waʼelal.

Yajni awelxa ja Isaac, kʼot ja tyempo oj ya koʼyi slekilal ja bʼankilali. Pe ja Rebeca skoltay ja Jacob, ja ijtsʼinali, bʼa yeʼn oj ajuk koʼ slekilal. Ja Esaú yabʼi, jel tajki sok xchapa yabʼalil oj smil ja smoj-alijeli. Ja Isaac soka  Rebeca skʼanawe stalnajel ja Jacob, ja yuj yalawe yabʼ: «Kaʼax sok ti la kansok jawa tiyo Labán, ja smoj-alijel jawa nani, masan xyaʼa kulan ja Esaú». Ja Jacob skʼuʼanyi ja snantati sok spaka ajnel bʼa jachuk mi oj miljuk.