Yajni ja faraón yabʼ ja israʼelenyo elyeta ja bʼa Egipto, snaʼa malaya yuja sjeka. Yayi mandar ja skʼakʼanumiki: «Chapawik yibʼanal ja jkarroʼik bʼa kʼakʼaneli, sok la kitik spatike. Mokxta jektikeʼa». Anto, ja yeʼn soka swiniki kʼe yiʼe spatik ja israʼelenyo.

Ja Jyoba stojo ja xchonabʼi, yajel makunuk jun ason ja bʼa satkʼakʼu sok jun kʼakʼ ja bʼa akwali. Yiʼaj och man mar Rojo sok yala yabʼ ti oj kʼotuke tsoman tiw.

Jaxa israʼelenyo yilawe wane ijel spatike yuja faraón soka skʼakʼanumiki. Ja israʼelenyo kanyeta nalanajel. Tey bʼa spatike ja kʼakʼanumiki, jaxa bʼa stiʼ sate tey ja mar Rojo. Kʼe awanuke yaljel yabʼ ja Moisés: «¡Oj chamkotik! ¿Jas yuj wa elkotikon ja bʼa Egipto?». Pe ja Moisés sjakʼa: «Mok xiwanik. Majlayik sok ilawik jastal oj skoltayotik ja Jyoba». ¿Anke ja Moisés wani sjipa lek skʼujol bʼa Jyoba?

Jaxa Jyoba yala yabʼ ja israʼelenyo bʼa a-stul sbʼaje ja bʼa tsomane. Ja akwal jaw, ja Jyoba sjitsa ja asoni sok yaʼa bʼa stiʼ sat ja kʼakʼanumiki. Ja bʼaye ja swinkil Egipto ajyi kʼikʼinal. Jaxa bʼaye ja israʼelenyo ajyi ijlabʼ.

Soka Jyoba yala yabʼ ja Moisés bʼa a-sjach ja skʼabʼ ja bʼa mari. Anto  yaʼakan ajak jun tsatsal ikʼ snajtil ja akwali. Ja mari spila sbʼaj, sok kan jun bʼej. Ja miyonik israʼelenyo ekʼ skʼuts-e jach takin luʼum malan ja jaʼi kanel tekʼan xchabʼil skʼaxil.

Ja skʼakʼanum ja faraón yiʼaj spatik ja israʼelenyo bʼa yojol ja mar spilunej sbʼaji. Pe ja Jyoba ya jom yolom ja swinkil Egipto. Och eluk ja syantaʼil ja skarroʼe. Anto ja kʼakʼanumiki awaniye: «¡La elkotik ja ili! Ja Jyoba wan tiroʼanel sbʼaja xchonabʼi».

Ja Jyoba yala yabʼ ja Moisés: «Jacha jawa kʼabʼ ja bʼa mari». Junta chʼaykʼujol, ja kʼakʼanumiki musjiyekan yuja jaʼi. Ja faraón sok yibʼanal ja swiniki chamye. Mini jun maʼ kan sakʼan.

Ja bʼa skʼaxil ja mari, yibʼanal ja ixuk winiki stoyowe ja Dyos sok jun tsʼebʼoj: «Oj jtsʼebʼantay ja Jyoba, yujni ja yeʼn jelxelxa ja stoyjelali. Ja kawuj soka maʼ kajani sjipata bʼa yoj mar». Yajni ja chonabʼ wan tsʼebʼoj, ja ixuke wane chanel sok wane yajel okʼuk chijchij. Jel gustoʼaye spetsanile yujni meran elyeta libre.