Ja Moisés skʼapayi ja faraón bʼa mixa oj kumxuk ja bʼa stiʼ sat. Pe bʼajtanto oj wajuk, yala yabʼ: «Ja bʼa nalan akwal, ja bʼajtan alatsik ja bʼa Egipto oj chamuke. Jachni ja yunin ja faraón soka bʼa smosoʼiki».

Ja Jyoba yala yabʼ ja israʼelenyo a-xchap-e jun waʼelal jel chaʼanyabʼalil. Yala: «Milawik jun yal chej ma jun yal chibo bʼa jun jabʼil yiʼoj, sok bʼalawik tʼunuk ja xchikʼel ja bʼa smarkoʼil pwerta. Tsilawik ja bʼakʼeti sok abʼanik sok pan mey yajnal. Ajyanik chapan bʼa oj wajanik, aʼajyuk lapan wa kʼuʼex sok wa xanabʼex. Ja akwal it oj ka elanik libre». ¿Wan maʼ xa pensaran janekʼto gusto ajyiye?

Ja bʼa nalan akwal, ja yanjel ja Jyoba ekʼ bʼa yibʼanal ja naʼitsik bʼa Egipto. Ja bʼa mey yiʼoj jun senya bʼa chikʼ ja bʼa smarkoʼil pwerta, cham ja bʼajtan alatsi. Pe miyuk ja bʼa naʼitsik bʼ ayiʼoj ja senya bʼa chikʼi. Yibʼanal ja pamilyaʼik bʼa Egipto, ama rikoʼe ma pobreʼe, cham jun yuntikile. Pe mini jun yuntikile cham ja israʼelenyo.

Ja bʼajtan yunin ja faraón chami. Ja faraón mixa kuchyuj mas sok yala yabʼ ja Moisés soka Aarón: «¡Elanik ja ili! ¡Kaʼaxik sok toyowik jawa Dyosexi! ¡Iʼajik och jawa chanteʼexi sok kaxikxa!».

Ja akwal jaw yij ay lek ja luna. Ja israʼelenyo elye ja bʼa Egipto jach  tsomane jastal pamilya sok kʼole. Elye 600,000 winike, cha pilan ja niwan tsome ixuk sok untik. Jitsan mi israʼelenyoʼuke cha wajyesok bʼa stoyjel ja Jyoba. ¡Man elye libre ja israʼelenyo!

Bʼa yajel julskʼujole jastal aji eluke libre yuja Jyoba, tʼilani oj xchap-e jabʼil jabʼil ja junxta waʼelal jaw. Ja it yawe sbʼiʼiluk Pascua.