Bʼa jun lugar sbʼiʼil Uz, ti ajyi tiw jun winik bʼa yaʼteltay ja Jyoba. Sbʼiʼilan Job, jel riko waji sok jel niwan ja spamilya. Chomajkil, jel lek ja skʼujoli sok skoltay ja pobreʼiki, ja bigudaʼiki sok ja untik mebʼaʼiki. Jun winik jastal it, ¿oj maʼ bʼobʼ ekʼ sbʼaj wokol?

Ja Job mi snaʼa, pe wani iljel yuja Dyablo. Ja Jyoba yala yabʼ ja Satanás: «¿Awilata maʼ ja kaʼtijum Job? Mey pilan jastal yeʼn ja bʼa luʼumi. Jel kʼuʼabʼal sok jel toj». Ja Satanás sjakʼa: «Wani skʼuʼana, pe ja yuja waxa talnay sok wa xwa koʼ slekilal. Waxa wayi sluʼum sok xchanteʼik. Japayi yibʼanal sok oj yaʼakan yaʼteltajel». Ja Jyoba yala yabʼ: «Ojni bʼobʼa kʼul probar, pe mini oj jkʼan bʼa oja mile». Ja Jyoba yaʼakan ja Satanás aya och probar ja Job. ¿Wan maʼ xa naʼa jas yuj? Yujni sjipunej lek skʼujol bʼa ojni ajyuk kʼuʼabʼal ja Job.

Ja Satanás ya och probar sok jitsan wokolik ja Job. Bʼajtan ya makunuk jujuntik winike sbʼiʼile sabeoʼik bʼa yelkʼane ja swakax sok ja sburroʼiki. Tsaʼan stsika yibʼanal ja xchejiki. Pilan kʼole, sbʼiʼile caldeoʼik, yelkʼane ja scamelloʼiki. Cha chamye ja matik wane stalnajel ja xchanteʼiki. Pe tito jakum ja mero stsatsali: spetsanil ja yuntikil ja Job chamye yajni mokʼ ja naʼits bʼa wane waʼeli. Ja Job jel och stristeʼil juntiro, pe mini yaʼakan yaʼteltajel ja Jyoba.

Ja Satanás wanto skʼana bʼa ayiʼ mas wokol ja Job. Ja yuj ya elyi kʼoʼonik bʼa yibʼanal ja skwerpo. Ja jaw jelni yiʼaj soka syajali. Ja Job mini snaʼa jas yuj wan ekʼel sbʼaj jitsan jastik mi lekuk. Ama jachuk, mini  yaʼakan yaʼteltajel ja Jyoba. Ja Dyosi yila ja jaw sok jelni aji gustoʼaxuk.

Jaxa Satanás sjeka oxe winik bʼa skʼulajel probar ja Job. Ja yeʼnle yalawe: «Ja weʼn aleʼuneja mul sok mixa wala. Ja yuj wan yajelawi kastigo ja Dyosi». Ja Job sjakʼa: «Ja keʼn mi jas jkʼulunej bʼa mi lekuk». Pe mas tsaʼan kʼe skʼuʼuk yeʼn smul ja Dyos ja wokolik wan ekʼel sbʼaji. Ja Job cha yala ja Dyosi mibʼi toj ayuksok.

Jun kerem sbʼiʼil Elihú kechan wan smaklajel ajyi ja sloʼile. Pe tixa spensaran oj kʼumanuk sok yala: «Chʼayelex lek apetsanilex. Mini xchʼak kabʼtik stojolil ja sniwanil ja Jyoba. Ja yeʼn mini skʼulankitik bʼa mi lekuk. Wa xyila yibʼanal sok wa skoltay ja ixuk winik ja bʼa swokole».

Ja Jyoba cha skʼuman ja Job. Aljiyabʼ: «¿Bʼaya weʼn yajni jkʼulan ja satkʼinal soka luʼumi? ¿Jas yuj waxa wala mi tojukoni? Ja weʼn wala kʼumani, pe mixa naʼa jas yuj wa x-ekʼ ja jastik junuki». Ja Job snaʼa malaya sok yala: «Jleʼata jmul. Aʼawon perdon soka jas kala. Kabʼunej bʼa weʼna, pe ja wego wa xnaʼa bʼaj lek. Wani xchʼak bʼobʼukawuj spetsanil».

Yajni chʼak ja prebaʼiki, ja Jyoba stojbʼes ja Job sok masxa aʼay ajiyi yuja janekʼ yiʼoj ajyi. Ja Job albʼel lek ajyi sakʼan sok gusto lek. Ja Jyoba ya koʼyi slekilal yuja tolabida ajyi kʼuʼabʼali, ama ay ekʼele mi pasiluk waji. Jaxa weʼn, ¿oj maʼ kʼotan jastal ja Job sok tolabida oja waʼteltay ama chikan jas x-ekʼi?