Ja israʼelenyoʼik elye ja bʼa wits Sinaí sok kʼe wajuke bʼa takin kʼinal bʼa Parán man kʼotye bʼa jun lugar sbʼiʼil Qadés. Ja tiw, ja Jyoba yala yabʼ ja Moisés: «Jeka 12 winik, jujune bʼa kada kʼoleʼik. Sok a-skʼel-e nakʼul ja Canaán, ja luʼum oj kayi ja israʼelenyoʼiki». Ja matik skʼulane ja aʼtel jaw sbʼiʼilane tsʼelsatinumik. Ja Moisés stsaʼa 12 tsʼelsatinum sok yala yabʼye: «Kaxik bʼa Canaán sok kʼelawik ja luʼum ta lek bʼa yaʼteltajel. Cha kʼelawik ta ay yipe ja swinkil ma miyuk, sok ta teye bʼa kʼulubʼal karpaʼik ma bʼa chonabʼik». Ja 12 tsʼelsatinum wajye bʼa Canaán, sok tey ja Josué soka Caleb.

Ekʼ 40 kʼakʼu, tixa kumxiye ja tsʼelsatinumiki. Sok yiʼawejan higoʼik, granadaʼik, tsʼusubʼik. Tixa yalawe ja it: «Jel lek ja luʼum bʼa Canaán, pe jel ja yipe ja swinkili, sok jel chaʼanik ja sbardaʼil ja chonabʼik». Jaxa Caleb yala: «¡Ojni bʼobʼ jkʼultike ganar! Wajtikikxa». ¿Jas maʼ yuj jach yala ja Caleb? Ja yeʼn soka Josué sjipawe skʼujol bʼa Jyoba. Jaxa ja 10 tsʼelsatinum yalawe: «Mok wajkotik. Ja ixuk winiki jel niwake sok jel chaʼanik. Jaxa keʼntiki jachukotik jastal jachʼbʼen».

Ja israʼelenyo jom yolome. Soka yeʼnle och kʼumanuke malo sok och yale: «La jtsatik pilan tejkʼanubʼal sok la kumxukotik bʼa Egipto. ¿Jas yuj oj wajkotik ja bʼa Canaán bʼa kechan oj miljukotik?». Jaxa Josué soka  Caleb yalawe: «Kʼuʼabʼal la ajyukotik soka Jyoba. Mokni xiwkotik. Ojni stalnayotik ja Jyoba». Pe ja israʼelenyo mi smaklaye. Sok sleʼawe modo smiljel ja Josué soka Caleb.

¿Jasa skʼulan ja Jyoba? Ja yeʼn yala yabʼ ja Moisés: «Jitsan jastik lek jkʼulunejyile ja israʼelenyo. Pe mitoni x-ajyiye kʼuʼabʼal jmok. Ja yuj oj kaʼekan 40 jabʼil ja bʼa takin kʼinal man xchamye. Kechan ja yuntikile, ja Josué soka Caleb oj ochuke ja bʼa luʼum jkʼapunejyile».