Ja Josué stojo jitsan jabʼil ja xchonabʼ ja Jyoba sok cham yajni ayiʼoj 110 jabʼil. Yajni sakʼanto, ja israʼelenyo yaʼteltaye ja Jyoba. Pe yajni chami, kʼe yaʼteltaye kʼulubʼal dyosik jastal ja swinkil Canaán. Yuja israʼelenyo mi kʼuʼabʼal ajyiye soka Jyoba, yaʼakan jun mandaranum bʼa Canaán sbʼiʼil Jabín bʼa aji wokolanuke. Anto, ja chonabʼ skʼanayi ja Jyoba bʼa akoltajuke. Jaxa Jyoba yayi jun ajkʼach tejkʼanubʼal sbʼiʼil Barac. Ja yeʼn oj skoltay ja ixuk winik bʼa oj cha kʼe yaʼteltaye ja Jyoba.

Jun aluman ixuk sbʼiʼil Débora sjeka spayjel ja Barac. Sok ya ekʼyi jun rason bʼa Jyoba: «Iʼaj 10,000 winik sok kaʼax ja bʼa yok jaʼ Cisón bʼa oj tiroʼanan soka skʼakʼanumik ja Jabín. Ja tiw oja kʼul ganar ja Sísara, ja olomal ja bʼa kʼakʼanumik jaw». Ja Barac sjakʼayi ja Débora: «Ojni wajkon, pe jaʼ ta oj wajan jmoki». Ja Débora yala: «Ojni wajkona mok, pe tʼilan oja naʼ mini weʼn oja mil ja Sísara. Ja Jyoba yalunej juni ixuk ja maʼ oj smili».

Ja Débora kʼe soka Barac sok ja skʼakʼanumik bʼa wits Tabor bʼa xchapjel sbʼaje ja bʼa tiroʼanel. Yajni yabʼ ja Sísara, stsomo bʼa loman kʼinal ja skarroʼik bʼa kʼakʼanel soka skʼakʼanumiki.  Ja Débora yala yabʼ ja Barac: «Ja yan kʼakʼu ja Jyoba ojni ya kʼul ganar». Anto ja Barac soka 10,000 winiki koʼyekon ja bʼa wits bʼa tiroʼanel soka skʼakʼanumik jel chapan ja Sísara.

Jaxa Jyoba yaʼakan ja yok jaʼ Cisón apekʼuk sok jachuk ja skarroʼik bʼa kʼakʼanel ja Sísara kan tsʼapan bʼa yoj lokok. Ja Sísara koʼ ja bʼa skarro sok spaka ajnel. Ja Barac soka skʼakʼanumik skʼulane ganar ja skʼakʼanumik ja Sísara, pe ja Sísara spaka ajnel. Sok ti kʼot bʼa yal skarpa jun ixuk sbʼiʼil Jael. Ja Jael yayi tʼusan lech sok tixa smusu sok jun kʼuʼuts. Ja kʼakʼanumi ochkan swayel yujni jelxa yajtik ay. Anto ja Jael chʼabʼanxta waji, sok stsʼapayi bʼa yolom jun estaka bʼa karpa. Ja Sísara chami.

Tixta kʼot ja Barac bʼa wan slejel ja Sísara. Ja Jael el ja bʼa yal skarpa sok yala: «Ochan, oj jeʼawi ja winik maʼ wana slejeli». Ja Barac ochi sok ti bʼaʼan ekʼ ja Sísara; chamel lek. Anto, ja Barac soka Débora stsʼebʼantaye jun tsʼebʼoj bʼa yaweyi stoyjelal ja Jyoba yuja aji skʼuluke ganar ja skontraʼe. Ja ixuk winik bʼa Israel ajyiye laman ja 40 jabʼil snochoyi.