Ja Elí, ja mero olomal bʼa sacerdote, ajyi chabʼ skeremtik: sbʼiʼil Hofní sok Finehás. Ja yeʼnle kʼotye sacerdote sok ti aʼtijiye bʼa tabernáculo. Pe mi skʼuʼane ja sleyik ja Jyoba sok wa yixtalane ja ixuk winik. Yajni ja israʼelenyoʼiki wa xyiʼaje ochyi majtanal ja Jyoba, ja Hofní sok ja Finehás yeʼn wa xyiʼajekan ja lekil bʼakʼeti. Ja Elí wa snaʼa ja skeremtiki mi lekuk jas modoʼe, pe mini jas wa xyalyabʼi. ¿Ay ma jas oj skʼuluk ja Jyoba?

Ama ja Samuel mas ijtsʼinal yuja Hofní soka Finehás, pe mi snocho ja smodoʼe. Ja yuj, ja Jyoba jel gusto yila ja Samuel. Jun akwal, ja Samuel wan wayel sok yabʼ wan payjel. Tixa kʼeʼa, waj ajnel ja bʼay ja Elí sok yala: «It bʼayonjula». Pe ja Elí sjakʼa: «Me xpayawa. Cha ka xwayan». Ja Samuel cha waj bʼaʼanuk. Jachni ekʼ chabʼ ekʼele. Yajni ja Samuel kʼumaji bʼa yoxil ekʼele, ja Elí tixa snaʼa jani ja Jyoba ja maʼ wan kʼumajelyuji. Ja Elí yala yabʼ ta cha kʼumaji, tʼilan oj sjakʼ jachuk: «Alakabʼ, Jyoba. Jawa waʼtijumi wa smaklaya».

Ja Samuel cha kumxi ja bʼa xchʼati. Cha yabʼ ja kʼumali: «Samuel, Samuel». Ja yeʼn sjakʼa: «Alakabʼ, jawa waʼtijum wa smaklaya». Ja Jyoba yala yabʼ: «Alayabʼ ja Elí oj jkʼul kastigar ja yeʼn soka spamilya. Ja yeʼn wani snaʼa mi lekuk ja jas wane skʼulajel ja skeremtiki ja bʼa  jtabernaculoʼi, pe ja yeʼn mini stojo». Yajni el ja kʼakʼu, ja Samuel sjama ja spwertaʼil ja tabernáculo, jastalni kʼajyel wa skʼulan. Wani xiw yaljelyabʼ ja mero olomal bʼa sacerdote ja jas aljiyabʼ yuja Jyoba. Pe ja Elí spaya sok sjobʼoyi: «Kala waw, ¿jasa yalawabʼ ja Jyoba? Alakabʼ spetsanil». Ja yuj, ja Samuel chʼak xcholyabʼ yibʼanal.

Kʼi ja Samuel, jaxa Jyoba mini yaʼakan yamigoʼajel. Ja israʼelenyo bʼa tuktukil lugar wani snaʼawe ja Jyoba yeʼn stsaʼunej ja Samuel bʼa oj kʼot jun aluman sok jun jwes.