Yajni cham ja Saúl, ja David yeʼnxa ochkan mandaranum. Ayiʼoj 30 jabʼil. Ekʼ jujuntik jabʼil, bʼa jun akwal, man bʼa yolom snaj, yila jun tsamal ixuk. Ja David yabʼ ja ixuk jaw sbʼiʼil Bat-Seba sok nupanelsok jun kʼakʼanum sbʼiʼil Urías. Anto ja David sjeka spayjel ja Bat-Seba bʼa snaj. Ja yeʼn waysok, jaxa Bat-Seba maloʼaxi bʼa oj ajyuk jun yal. Ja David kʼan snakʼ ja jas skʼuluneji. Ti yala yabʼ ja olomal bʼa skʼakʼanum bʼa aya bʼajtan ja Urías ja bʼa kʼakʼanel, sok ti xyawekan stuchʼil. Ja Urías cham ja bʼa tiroʼanel jaw, jaxa David nupani soka Bat-Seba.

Pe ja Jyoba yila spetsanil ja jastik mi lek ekʼi. ¿Jas maʼ oj skʼuluk ja Jyoba? Sjeka ja aluman Natán ja bʼay ja David. Ja Natán yala yabʼ: «Ay jun winik riko bʼa ayiʼoj jitsan xchejik, sok ay jun winik pobre bʼa kechanta jun chej yiʼoj sok yajxta wa xyila. Ja winik riko sjapayi ja yal xchej ja winik pobre». Ja David jel tajki sok yala: «¡Ja winik jaw sbʼejni oj chamuk!». Anto ja Natán yala yabʼ: «¡Weʼnani kʼotela ja winik riko jaw!». Ja David jel tristeʼaxi sok yalyabʼ ja Natán: «Jleʼata jmul soka Jyoba». Ja mulal jaw ijijanyi jitsan wokol ja David, cha jachuk ja spamilya. Ja Jyoba skʼulan kastigar ja David, pe yaʼakan sakʼan yujni mi snakʼa ja smuli sok chʼin yaʼa sbʼaj.

Ja David wa skʼana oj skʼulyi jun stemplo ja Jyoba. Pe ja Jyoba stsaʼa ja yunin ja David, ja Salomón, bʼa yeʼn oj stojbʼes. Ja yuj ja David xchapa ja jastik oj makunukyuj ja Salomón sok yala: «Ja stemplo ja  Jyoba tʼilan chapan lek oj ajyuk. Ja Salomón junto kerem, pe keʼn oj jkoltay xchapjel spetsanil». Ja David skʼebʼa jitsan takʼin bʼa yajel kʼeʼuk ja templo. Sleʼa aʼtijumik bʼa jel chapane. Cha stsomo oro sok plata, yiʼajan teʼik bʼa cedro man Tiro sok bʼa Sidón. Yajni ojxa chamuki, yayi ja Salomón ja splanoʼil bʼa stojbʼesel ja templo sok yala yabʼ: «Ja Jyoba ya jtsʼijbʼuk ja yaljelik it bʼa wa bʼaj weʼna. Ja Jyoba oj skoltaya. Mok xiwan. Ajyan tsats sok kʼulan ja aʼteli».