Yajni ja David smila ja Goliat, ja Saúl ya och olomal bʼa kʼakʼanum. Ja David skʼulan ganar jitsan kʼakʼanel sok jel naji sbʼaj. Yajni ja David wa xkumxi ja bʼa kʼakʼaneli, ja ixuke wa x-elye stajel sok chanel sok tsʼebʼanel: «Ja Saúl skʼulunej ganar milik skontraʼik, pe masni jitsan milik skʼulunej ganar ja David». Ja Saúl kʼe skorajaʼuk ja David sok skʼana oj smil.

Ja David jel snaʼa yajel okʼuk ja arpa. Jun kʼakʼu, yajni wan yajel okʼyi ja Saúl, ja yeʼn sjipayi ja slansa. Pe ja David koʼ tinan sok ya ekʼuk, jaxa ja lansa ti kʼot tsʼapan bʼa yibʼ naʼits. Tsaʼan ja bʼa jaw, ja Saúl jitsan ekʼele sleʼa modo smiljel. Masan ja David spaka ajnel sok ti snakʼa sbʼaj bʼa takin kʼinal.

Anto ja Saúl yiʼaj spatik sok smoj 3,000 kʼakʼanum. Pe ja Saúl ti och bʼa junxta  kʼeʼen snakʼunej sbʼaje ja David soka swiniki. Ja David aljiyabʼ chʼabʼanxta yuja swiniki: «Jani styempoʼil bʼa oja mil ja Saúl». Jaxa David mojxi ja bʼay ja Saúl, skʼutsuyi xetʼan ja skʼuʼi pe mi yabʼ ja Saúl. Tsaʼan, ja David jelni tuk yabʼ yuja mi skisa ja mandaranum stsaʼunej ja Jyoba. Ja yuj mini yaʼakan ja swiniki oj yixtalaʼuke ja Saúl. Yajni ja Saúl el ja bʼa kʼeʼeni, ja David yawan tsats lek bʼa yaljelyabʼ ojni bʼobʼ smil ajyi pe mini skʼulan. ¿Maxa maʼ lek oj iljuk ja wego ja David yuja Saúl?

Miyuk. Ja Saúl mini yaʼakan yijel spatik. Jun akwal, ja David soka sobrino Abisái nakʼul ochye ja bʼa jijlele ja Saúl. Jaxa Abner, ja mero stalnanum ja Saúl, wan lek wayel. Ja Abisái yalyabʼ ja David: «¡Kʼotni ja yora! Aʼakan oj jmil ja Saúl». Pe ja David sjakʼa: «Yeʼn oj yil jas oj skʼulukyi ja Jyoba. Mas lek iʼajyi ja slansa soka sjarroʼil yaʼali, sok wajtik».

Jaxa David ti kʼe bʼa jun mojan wits bʼa chikan ja bʼa tsomane ja Saúl. Ja David yawan: «¡Abner! ¿Jas yuj mixa talnay ja mandaranumi? ¿Bʼay ja sjarro sok ja slansa ja Saúl?». Ja Saúl snaʼa jani ja skʼumal ja David sok yala: «Ojni bʼobʼa milon ajyi, pe mi akʼulan. Wa xnaʼa weʼnxa oj ochankan mandaranum». Jaxa Saúl tixa kumxi bʼa snaj. Pe jujuntik ja bʼa spamilya ja mandaranumi mini yilkʼujolane ja David.