Man sbentanaʼil snaj ja bʼa Jezreel, ja mandaranum Acab wa xyila och ja yalajil stsʼusubʼ jun winik sbʼiʼil Nabot. Ja Acab wa skʼana ja alaj jaw sok sleʼa modo smanjelyi ja Nabot. Pe ja yeʼn mi skʼana yujni ja Ley bʼa Jyoba wa xyala mini xbʼobʼ chonxuk ja luʼum akʼubʼalkanyi yuja snantat. Ja Nabot skʼulan ja bʼa toji. ¿Skisa maʼ ja Acab ja jas yala ja Nabot? Miyuk. Ja Acab jel tajki. Yuja jel tajkel ayi, mini skʼana elel ja bʼa skwarto sok mini waʼel.

Ja xcheʼum ja Acab jani mandaranum Jezabel, jun ixuk jel malo. Ja yeʼn yala: «Weʼna ja mandaranum bʼa Israel, wa xbʼobʼ ajyukawuj chikan jas waxa kʼana. Keʼn oj jleʼawi ja luʼum jaw bʼa oj kawi». Anto stsʼijbʼanyi jujuntik karta ja ansyanoʼik bʼa chonabʼi. Ja yeʼn yaʼa mandar bʼa alejuk smul ja Nabot bʼa yutunej ja Dyos sok achʼojuk ton. Ja ansyanoʼik jachni skʼulane jastal yala ja Jezabel. Tsaʼan, tixa yalyabʼ ja Acab: «Chamta ja Nabot. Iʼajxakan ja yalajil stsʼusubʼi».

Ja Nabot mi kechan yeʼn waj ja winik mey smul milji yuja Jezabel. Ja ixuk it cha smila jitsan matik syajtaye ja Jyoba. Cha yaʼteltay kʼulubʼal dyosik sok skʼulan jastik mi lekuk. Pe ja Jyoba yila spetsanil ja jastik mi lek skʼulani. ¿Jas maʼ oj skʼulukyi ja Jezabel?

Yajni cham ja Acab, ekʼto jun tyempo, sok ja yunin Jehoram och ya mandar. Jaxa Jyoba sjeka ja Jehú bʼa wajel yayi skastigo ja Jezabel soka spamilya.

Ja Jehú kʼe ja bʼa skarro sok waj man Jezreel, ja bʼay ja Jezabel. Jaxa Jehoram cha kʼe ja bʼa skarro bʼa waj skʼumuk ja Jehú. Ti sjobʼoyi: «¿Ay maʼ slamanil bʼa keʼntik?». Ja Jehú sjakʼa: «Mini oj ajyuk slamanil ta jawa nan, Jezabel, mi xyaʼakan skʼulajel ja bʼa mi  lekuk». Anto ja Jehoram sleʼa modo sutjel ja skarro bʼa oj kumxuk, pe ja Jehú stsʼaʼayi jun plecha sok smila.

Jaxa Jehú tixa waj man snaj ja Jezabel. Yajni yabʼ ja Jezabel, xchapa sbʼaj, sjixa ja yolomi sok ti smajlay bʼa bentana bʼa piso bʼa nalan chaʼan. Yajni kʼoti, ja Jezabel jel kalax sjakʼayi. Ja Jehú yawan ja yaʼtijumik ja Jezabel teye bʼa stsʼeʼeli: «¡Jipawikon!». Jaxa yeʼnle sjutbʼine koʼ ja bʼa bentana, mokʼ man luʼum sok chami.

Tsaʼan sbʼaja jaw, ja Jehú smila ja 70 yuntikil ja Acab sok xchʼaya snajel ja bʼa chonabʼ ja yaʼteltajel ja Baal. ¿Awila maʼ? Ja Jyoba wa snaʼa yibʼanal sok wa xyayi skastigo ja matik wa skʼulane jastik mi lekuk ja bʼa tyempo lek xyila ja yeʼn.