Yajni ja Salomón kʼe ya mandar ja bʼa Israel, ja Jyoba sjobʼoyi: «¿Jasa waxa kʼana oj kawi?». Ja Salomón sjakʼa: «Jelto keremon sok mito xnaʼa lek jas oj jkʼuluk. Awa pabor, aki jbiboʼil bʼa stalnajel jawa chonabʼi». Ja Jyoba yala: «Yuja akʼanaki biboʼil, ojni ka kʼotan ja winik mas bibo ja bʼa luʼumi. Cha ojni kawi jitsan takʼin. Sok ta kʼuʼabʼal ajyiya jmok, oj albʼan sakʼan jitsan jabʼil».

Ja Salomón kʼe skʼuluk ja templo. Ya makunuk lekil oro, plata, teʼ sok ton. Jitsan mil winike sok ixuk bʼa jel snaʼawe koltaniye ja bʼa aʼteli. Ja templo tojbʼi bʼa juke jabʼil. Anto kʼot ja kʼakʼu bʼa yajelyi ja Jyoba, sok yaʼawe majtanalik ja bʼa altar. Ja Salomón koʼ mekʼan bʼa stiʼ sat ja altar sok yayi orasyon: «Ah, Jyoba, ja weʼn wani xa bʼajin jun templo mas niwan sok mas tsamal yuja it. Pe awa pabor, kisa ja toyjelal wa xkatikonawi sok ja korasyontikoni». ¿Lek maʼ yila ja Jyoba ja templo? ¿Smakla maʼ ja yorasyon ja Salomón? Yajni ja Salomón chʼak yayi orasyon, koʼkon kʼakʼ ja bʼa satkʼinal sok stsika ja majtanalik. Jachuk ja Jyoba sjeʼa lek yila ja templo. Yajni ja israʼelenyo yilawe ja jaw, jel gustoʼaxiye.

Ja Salomón jel naji sbʼaj bʼa yibʼanal ja Israel sok bʼa najtil lugarik yuja jel bibo. Ja ixuk winik waj yile bʼa oj koltajuke stojbʼesel ja swokole. Cha jachni ja mandaranum ixuk bʼa Seba waj ya och probar sok sjobʼjelik jel wokol. Yajni yabʼ ja sjakʼjelik yaʼa ja Salomón, ja yeʼn yala: «Mi xkʼuʼan ajyi ja jas alubʼal kabʼ bʼa weʼna, pe ja wego ti wa xkila masto jel biboʼa yuja jastal alubʼalkabʼi. Jawa Dyos Jyoba yaʼuneja lekilal». Jelni tsamal ajyi ja sakʼanile ja chonabʼ Israel, sok jel gusto ajyiye ja ixuk winik. Pe mini albʼi mas.