Ja Josías kʼe ya mandar bʼa Judá yajni ayiʼoj waxake jabʼil. Ja bʼa tyempo jaw, ja ixuk winik wa x-aʼtijiye sok magia sok wa xyaʼteltaye kʼulubʼal dyosik. Yajni ja Josías ayiʼoj 16 jabʼil, skʼanani oj snebʼ yaʼteltajel toj ja Jyoba. Tsaʼan, yajni ayxa yiʼoj 20 jabʼil, kʼe xchʼay snajel ja kʼulubʼal dyosik sok ja altarik bʼa yibʼanal ja chonabʼi. Sok yajni ayxa yiʼoj 26 jabʼil, xchapa yibʼanal bʼa stojbʼesel ja stemplo ja Jyoba.

Ja mero olomal bʼa sacerdote, ja Hilquías, ti staʼa bʼa templo ja royo bʼa sLey ja Dyos. Bʼobʼta ja royo jaw jani ja it stsʼijbʼan ja Moisés. Ja Safán, ja stsʼijbʼuman juʼun ja mandaranum, yiʼaj ochyi ja Josías ja royo sok kʼe skʼumukyi tsats. Ja Josías smaklay sok snaʼa ja chonabʼi ayxa jitsan jabʼil mi kʼuʼabʼal ajyele soka Jyoba. Anto ja Josías yalyabʼ ja Hilquías: «Ja Jyoba jelni tajkel ay jmoktik. Kaʼax sok jobʼoyi jasa tʼilan oj jkʼuluktiki». Ja Jyoba ya ekʼyi ja rason it ja aluman ixuk Huldá: «Ja chonabʼ bʼa Judá sjipawontakani. Oj jkʼuluk kastigar ja chonabʼ, pe miyuk ja yajni mandaranum ay ja Josías, yujni chʼin yaʼunej sbʼaj».

Yajni ja Josías yabʼ ja rason it, waj ja bʼa templo sok stsomo ja chonabʼ bʼa Judá. Tixa skʼumanyi tsats ja sLey ja Jyoba. Ja Josías soka chonabʼi skʼapawe ajyel kʼuʼabʼal soka Jyoba sok spetsanil skʼujole.

Ayxa jitsan jabʼil ja chonabʼ bʼa Judá mixa skʼintaye ja Pascua. Pe ja Josías skʼuman ja bʼa Ley ja Pascua tʼilan oj kʼulaxuk spetsanil jabʼil,  ja yuj yalyabʼ ja chonabʼi: «Oj ajyukujtik jun kʼin bʼa Pascua sbʼaja Jyoba». Tsaʼan, ja Josías yaʼa mandar bʼa a-xchape jitsan majtanal sok aʼajyuk jun nole tsʼebʼanum bʼa oj tsʼebʼanuke ja bʼa templo. Ti skʼulane ja Pascua sok tixa nochan ja Kʼin bʼa pan mey yajnal, bʼa albʼi juke kʼakʼu. Mini bʼa skʼuluneje jun Pascua jastal jaw masan yajni sakʼanto ja Samuel. Ja Josías syajtay meran lek ja sLey ja Dyos. Jaxa weʼn, ¿wan maʼ xyawi gusto snebʼjel sbʼaja Jyoba?