Ja Mandaranel bʼa Asiria sbʼajintakan ja mandaranel bʼa 10 kʼole bʼa Israel. Jaxa wego ja mandaranum bʼa Asiria, ja Senaquerib, cha wa skʼana oj yikan ja mandaranel bʼa chabʼ kʼole bʼa Judá. Ja yuj och sbʼajukan jujune ja chonabʼik bʼa Judá. Pe ja chonabʼ mas wa skʼana jani ja Jerusalén. Ja jas mi snaʼa ja Senaquerib, ja Jerusalén jani wan talnajel yuja Jyoba.

Ja Ezequías, ja mandaranum bʼa Judá, yayi jitsan takʼin ja Senaquerib bʼa mi oj yixtalaʼuk ja Jerusalén. Anima ja Senaquerib yiʼaj ja takʼini, sjekani ja skʼakʼanumik jel yipe bʼa oj waj xchʼak ja Jerusalén. Ja ixuk winik ja bʼa chonabʼi jel xiwye yuja kʼakʼanumik bʼa Asiria wanexta mojxeljan. Anto ja Ezequías yala: «Mok xiwanik. Ja kʼakʼanumik bʼa Asiria jel ja yipe, pe ja Jyoba ojni ya mas kiptik yuja yeʼnle».

Ja Senaquerib sjeka ja yakʼa rason, ja rabsaqué, bʼa wajel stselay ja swinkil ja Jerusalén. Ja rabsaqué ti kʼot tekʼan bʼa stiʼ ja chonabʼ sok awani: «Ja Jyoba mi oj bʼobʼ skoltayex. Moka waʼabʼajex loʼlajel soka Ezequías. Mini jun dyos oj bʼobʼ skoltayex ja bʼa jkʼabʼtikoni».

Ja Ezequías sjobʼoyi ja Jyoba jas oj skʼuluk. Ja Jyoba sjakʼa: «Mok xiwanyuj ja jas wa xyala ja rabsaqué. Ja Senaquerib mi oj sbʼajukan ja Jerusalén». Tsaʼan, ja Ezequías jekjiyi jujuntik karta yuja Senaquerib, bʼa wa xyala: «Aʼaxabʼajik. Ja Jyoba mini oj skoltayex». Jaxa Ezequías yayi orasyon: «Jyoba, awa pabor, koltayotikon, bʼa oj snaʼe yibʼanal ja tuk kechanta weʼn ja Dyos smeranili». Ja Jyoba sjakʼa: «Ja mandaranum bʼa Asiria mi oj ochuk ja bʼa Jerusalén. Keʼn oj talnay ja jchonabʼi».

Ja Senaquerib skʼuʼunej lek ojxta sbʼajukan ja Jerusalén. Pe jun akwal, ja Jyoba sjeka jun yanjel ja bʼa wane jijlel ja kʼakʼanumik bʼa spatik ja chonabʼ.  ¡Ja anjel smila 185,000 kʼakʼanumik! Ja Senaquerib chʼayuj ja swinik mas jel yipe. Mixa snaʼa jas oj skʼuluk, tixa kumxi bʼa snaj yuja kʼuljita ganari. Ja Jyoba stalnay ja Ezequías soka Jerusalén, jastalni skʼapunej. Lek tiʼukxta ajyiya bʼa Jerusalén, ¿oj maʼ ajipa kʼujol bʼa Jyoba?