Bʼa jun chonabʼ bʼa Asiria sbʼiʼil Nínive, ja swinkili jelni malo wajye. Ja Jyoba sjeka ja yaluman Jonás bʼa awajuk bʼa Nínive sok ayalyabʼ ja swinkil tʼilani oj stukbʼes sbʼaje. Pe ja Jonás mi ti waj tiw. Ja yeʼn kʼe bʼa jun barko sok ti waj bʼa jun lugar sbʼiʼil Tarsis.

Yajni ja barko tey ja bʼa mari, ajyi jun tsatsal chawuk jaʼ. Jaxa yama barkoʼik jel xiwye juntiro. Skʼumane ja sdyoseʼik sok sjobʼo sbʼaje: «¿Jas yuj wan ekʼel ja it?». Tixa yala ja Jonás: «Jmul keʼna. Wanon spakjel ajnel bʼa mi oj jkʼuluk ja jas yalakabʼ ja Jyoba. Jipawonik koʼ bʼa yoj jaʼ bʼa oj lamxuk». Ja yama barkoʼik mi skʼanawe, pe ja Jonás tarega skʼana. Ja yuj sjipawe koʼ bʼa yoj mar, sok tixa lamxi ja tsatsal chawuk jaʼi.

Ja Jonás spensaraʼan ojni chamuk. Yajni wan mukxel koʼi, yayi orasyon ja Jyoba. Anto ja Jyoba sjeka jun niwan chay sok bʼukʼji koʼ ja Jonás, pe mi milji. Bʼa yojol ja chayi, ja Jonás yayi orasyon ja Jyoba: «Wa xkʼapawi ojni jkʼuʼukawi tolabida». Ja Jyoba ti ya ajyuk sakʼan oxe kʼakʼu ja Jonás bʼa yojol ja chayi sok tixa waj xejukan bʼa takin luʼum.

Ja Jyoba yaʼakan sakʼan ja Jonás, pe ¿wan maʼ stojolan ja it mokxa wajuk ja bʼa Nínive? Miyuk. Ja Jyoba cha sjeka pilan ekʼele. Ja ekʼele it, ja Jonás skʼuʼanxa. Ja yeʼn waji sok yalyabʼ jachuk ja ixuk winike jel malo: «Bʼa 40 kʼakʼu, ja Nínive oj chʼakuk». Anto ay jas ekʼi bʼa mi  wanuk majlaxel. Ja swinkil Nínive skisawe sok stukbʼes ja smodoʼe. Ja mandaranum bʼa Nínive yalyabʼ ja xchonabʼi: «Patawikyi skʼujol ja Dyos sok asutxuk jawa kʼujolex, bʼobʼta jachuk mi oj xchʼakotik». Yajni ja Jyoba yila ja jaw, mi xchʼaka.

Ja Jonás jel tajki yuja mi chʼak ja chonabʼi. Pensaraʼan ja it: ja Jyoba ajyi spasensya soka Jonás sok sjeʼayi syajulal skʼujol. Pe ja Jonás mi snaʼayi syajulal ja swinkil Nínive. Ja yeʼn el ja bʼa chonabʼi sok ti waj kulan bʼa yibʼel jun yakʼil tsuj sok kʼakʼxta yiljel ja sati. Tixa taki ja yakʼil tsuji, jaxa Jonás jel tajki juntiro. Tixa yala ja Jyoba: «Masni waxa naʼa syajulal ja yal kʼul jaw yuja swinkil Nínive. Ja keʼn jnaʼa syajulale sok ja yuj kaʼawekan sakʼan». ¿Jasa wa xkʼana jejukyi ja Jonás yuja Dyosi? Ja swinkil Nínive masni jel chaʼanyabʼale yuj chikan jas yal kʼul.