Pensaraʼan ja it: ja Tomás mi skʼana oj wajuk ja yan kʼakʼu ja bʼa eskwela. Cha mini ja jecheli. Sok mixato skʼana oj wajuk. Ja it kʼe ekʼuk ayxa oxe ixaw, ja yajni kʼe loʼiltajuk yuja smojik eskwela. Tsaʼan kʼe lejukyi yixta sbʼiʼil. Bʼa jujuntik ekʼele, ayni gana wa xjutbʼiji sok wa xjipjiyi ja sjuʼuniki. Bʼa tuk ekʼele, june ja bʼa smojiki wa xjutbʼijiyuj ja bʼa spatiki sok yajni ja Tomás wa sutu sbʼaj, spetsanil wa skʼulan sbʼaje bʼa mi yeʼn wajye. Pe ja eke masto jelxixa el: ja Tomás ay jas aljiyabʼ bʼa Internet bʼa aji xiwuk...

Lekbʼi weʼnuka ja Tomás, ¿jas oja kʼuluk?

Ayni jas oj bʼobʼa kʼuluk. Ojni bʼobʼa koltabʼaj jach mi oj makʼwanan. ¿Jastal?

•   MOKA KISE. Ja Biblia wa xyala: «June maʼ sonso wa xya el spetsanil ja jastal ay xyabʼi, pe ja maʼ bibo wa skomo bʼa ajyel laman» (Proverbios 29:11). Ta laman waxa jeʼa bʼaj ja janekʼ xbʼobʼawuji, bʼobʼta ja matik wa xyixtalana oj axwuke sok oj yaktayakani.

• MOK WA STUPE. Ja Biblia wa xyala: «Moc acʼul yi malo ja maʼ malo huas scʼulan ahui» (Romanos 12:17). Yujni ja yajel stupjeli kechanta wa x-ipaxi ja wokol.

• MOKA LEʼ WEʼNA. Ja Biblia wa xyala: «Ja maʼ wa spensaran leki wa xyila ja jas xiwela sbʼaji sok wa snakʼa sbʼaj» (Proverbios 22:3). Ta wa xbʼobʼi, tolabida pila bʼaj soka matik wa xyixtalana soka bʼa xiwela sbʼaj ay jas oj ekabʼaj.

• AYI JUN SJAKʼJEL BʼA MI JAʼUK WA SMAJLAY. Ja Biblia wa xyala: «Jun laman sjakʼjel wa xya jitsuk ja tajkelal» (Proverbios 15:1). Sok lekni oja jeʼ bʼa waxa naʼa tajnel loʼil. Jun sjejel, ta ja maʼ wa xyixtalana wa xyalawabʼ jel kojlela, chumu abʼaj sok jakʼa: «Iday, lekni ja oj koʼkon tʼusani».

• PILA ABʼAJ. Ja Nora, bʼa ayiʼoj 19 jabʼil, wa xyala: «Spiljela bʼaj jach mi oja jakʼe waxa jeʼa takʼana, tsats aya sok waxa komo abʼaj, ja jaw mini ayiʼoje ja matik wa xyixtalana» (2 Timoteo 2:24).

• JIPA MAS AKʼUJOL BʼA WEʼNA. Ja matik wa xyixtalaʼana wani xyaʼa sbʼaje kwenta machunuk ja mi sjipa skʼujol bʼa yeʼna sok ja yuj bʼobʼta mi skoltay sbʼaj. Pe jitsani wa xjipwaniyekani yajni wa xyilawe mixa waʼabʼaji.

• ALAYABʼ PILAN. Jun ixuk bʼa mixa maestraʼuk yaʼa ja rason it: «Ja jas oj kali jani aʼochuke parte ja maʼ wa x-ixtalajiyeʼi. Jani jaw ja jas tʼilan oj kʼulaxuki, sok jun modo bʼa mixa maʼ oj yixtalaʼuk pilan».