Pensaraʼan ja it: ja Tim wan tajnel soka yamigoʼiki sok mi sganaʼuk sweta ja pelota bʼa yespejoʼil skarro ja sbesino sok spojo.

Lekbʼi weʼnuka ja Tim, ¿jas oja kʼuluk?

AYA WIʼOJ OXE MODO:

1. Oj elan ajnel.

2. Pilan maʼ oj wa smuluk.

3. Oja walyabʼ jawa besino ja jas ekʼi sok yaljelyabʼ oja tupyi.

Bʼobʼta ja wa xkʼana tsaʼ ja sbʼajtanil modo. Pe masni lek ja yaljel tolabida jawa muli, ama kechan xa pojo jun espejo ma pilan jasunuk.

1. Jani ja stojolil.

   Ja Biblia wa xyala: «Huax cʼana oj ajyucoticon toj soc spetzanil ja cristiano» (Hebreos 13:18).

2. Bʼobʼta masni oj ajan perdon ta waxa wala jawa muli.

   Ja Biblia wa xyala: «Ja maʼ wa snakʼa ja smuli mini lek oj wajyuja, pe ja maʼ wa sjama ja stiʼ bʼa yaljel sok mixa skʼulan ojni najuk syajulal» (Proverbios 28:13).

3. Sok ja mas tʼilani: oj wa gustoʼaxuk ja Jyoba.

   Ja Biblia wa xyala: «Ja Jyoba wa xyilkʼujolan ja maʼ mi tojuk ayi, pe ja Yeʼn jel mojan ay soka matik toj ayi» (Proverbios 3:32).

Ja Karina, bʼa ayiʼoj 20 jabʼil, kʼan snakʼyi ja stat bʼa aji elyi jun multa yuja jel ya ajnuk ja karro. Pe mini bʼobʼyuj snakʼjel. Ja Karina yala: «Bʼobʼta ekʼ jun jabʼil, ja jtati yila bʼa akʼubʼal elki jun multa yuja jel ka ajnuk ja karro. ¡Jas maʼ oj ekʼ jbʼaj ja wego!».

¿Jasa wa sjeʼa? Ja Karina wa xyala: «Slejel modo bʼa snakʼjel jawa muli kechan wa x-ipaxi. Mas tsaʼan ojni awil ja swokolil».

Ja Biblia wa xyala: «Mi ni ay june ja maʼ mi huax bob staa smuli» (Santiago 3:2). Sok jastalni kilatikta, yaljel wego jawa muli jun sjejel bʼa chʼin yajelabʼaj sok takʼan aya.

Ja pilan modo jani mokxa cha kʼuluk. Jun akʼix sbʼiʼil Vera wa xyala: «Ja bʼa ekʼeleʼik wa xtaʼa jmuli, wa xkila jun ekʼele bʼa ay jas wa xya jnebʼkani sok ay jas wa sjeʼakanki bʼa oj tojbʼukon. Jachuk, ja bʼa pilan ekʼele xtʼaspun ja junxta wokoli, pilanxa ja jastal oj jkʼuluki». ¿Jasa oja kʼuluk ja weʼn ja bʼa ekʼeleʼik it?

Jawa tati wa xyawi majan ja sbicicleta sok wa jomoyi. ¿Jas oja kʼuluk?

• Mi jas oj kalyabʼi sok bʼobʼta mi oj ya sbʼaj kwenta.

• Ojni kalyabʼ ja jas mero ekʼi.

• Oj kalyabʼ ja jas ekʼi, pe pilan maʼ oj ka smuluk.

Wa kʼulan jun examen pe mi elawuj lek yuja mi apaklunej leki. ¿Jas oja kʼuluk?

• Oj jkal jel wokol ja exameni.

• Oj jmuluk keʼna yuja mi jpaklay leki.

• Oj ka smuluk ja jmaestro.

 Ja wego paklay ja chabʼ sjejel axita sok pensaraʼan weʼn kʼotela 1) ja tatali 2) ja maestro. ¿Jas maʼ oj spensaraʼuke ja yeʼnle ta wego awala jawa muli? ¿Jas maʼ oj spensaraʼuke ta mi awala?

Ja wego pensaraʼan ja bʼa jas mi lek akʼulan ja jabʼil ekʼi sok ayi sjakʼjel ja sjobʼjelik it:

¿Jas mulal ataʼa? ¿Jas akʼulan?

• Jleʼa modo snakʼjel.

• Pilan maʼ ka och smul.

• Wego kala.

Ta mi awala jawa muli, ¿jastal awabʼ ajyiya?

• ¡Jel lek! Mini maʼ yilawon.

• Mi lekuk. Tʼilani oj kal ajyi ja smeranili.

¿Jas maʼ junka mas lek oja kʼul ajyi?

¿Jasa sjeʼakanawiʼi?

¿Jas yuj ayni ekʼele jel wokol yaljel jawa muli?

¿Jas maʼ oj spensaraʼuke bʼa weʼn ta tolabida mi xa wala jawa muli? Sok ¿jas maʼ oj spensaraʼuke ta waxa wala? (Lucas 16:10).