SJOBʼJEL 3
¿Jastal oj bʼobʼ loʼilanukon soka jnantati?
¿JAS OJA KʼULUK JA WEʼN?
Pensaraʼan ja it: jun ochkʼakʼu miércoles. Ja Geoffrey, bʼa ayiʼoj 17 jabʼil, chʼakta skʼuluk ja starega sok tyempoxa oj jijluk tʼunuk. Waj stsan ja telebisyon sok ti sjipa sbʼaj ja bʼa skujlayubʼi.
Ja bʼa jutsʼin jaw, ochjul ja stati sok tajkelxta skʼeljel.
«¡Geoffrey! ¿Jas lom wana xchʼayjel tyempo skʼeljel tele? ¡Mikʼa tʼun wanuka skoltajel jawa wijtsʼin soka aʼtelik bʼa naʼitsi! ¡Mini tʼun xa kʼuʼan abʼal!».
«Ojxa cha kʼekotik», xchi chʼabʼanxta ja Geoffrey.
Ja stati mojxijan sok sjobʼo: «¿Jas bʼi la chi?».
«Mini jasa, tat», jach sikʼa skʼujol sok jomta el ja sniʼ sati.
Ja stati tajkelxa ay lek sok yala: «¡Moka kʼumukon jachuk!».
Lekbʼi weʼnuka ja Geoffrey, ¿jas maʼ oja kʼuluk bʼa mi oj ekʼuk ja jaw?
KʼOTAN TEKʼAN SOK PENSARAʼAN
Ochel loʼil soka wa nantati jach jastal syamjel jun karro: ta ataʼa makan ja bʼeji, ojni bʼobʼa leʼ pilan bʼej.
SJEJEL:
«Jelni wokol xkabʼ ochel loʼil soka jtati», xchi ja Lea. «Ayni ekʼele, yajni ekʼta jun rato ja jas wanon yaljelyabʼi, wa sjobʼoki: ‹Tixa waʼa perdona, ¿jas bʼi junka wana yaljeli?›».
JA LEA AYIʼOJ OXE MODO BʼA JAS OJ SKʼULUK
-
Yawajel ja stati.
Ja Lea oj yawan ja stati: «¡Maklayon! ¡Ja it ay stʼilanil!».
-
Skʼutsjelkan ja sloʼile.
Ja Lea oj spensaraʼuk mixa jas oj yalyabʼ ja stati.
-
Yajelkan ja sloʼile bʼa pilan ekʼele.
Ja Lea oj staʼ loʼil mas tsaʼan ja stati, ma oj stsʼijbʼukyi jun karta bʼa oj yalyabʼ ja jas wan ekʼel sbʼaji.
Jaxa weʼn, ¿bʼaya oja walyabʼ oj stsaʼ ja Lea?
PENSARAʼAN SBʼAJA IT: Ja stat ja Lea wan spensarajel pilan jasunuk sok mi ja wajeluk skʼujol ja jas wan aljelyabʼi. Lekbʼi ja Lea stsaʼa ja sbʼajtanil modo sok xyawan ja stati, bʼobʼta ja stati mini oj yabʼ stojolil jas yuj jach wa skʼulani. Sok bʼobʼta mini oj maklajuk ja Lea. Chomajkil, wani jelxel soka stati (Efesios 6:2). Anto, ja sbʼajtanil modo mini lekuk bʼa xchawanile.
Yajni makan ay jawa bʼeji, wani xa leʼa pilan, jachni oj cha bʼobʼa kʼuluk yajni oj loʼilanan soka wa nantati.
Ama ja xchabʼil modo jani mas pasil skʼulajel, pe mini jaʼuk ja mas leki. ¿Jas yuj? Yujni ta ja Lea wa skʼana oj stojbʼes ja jas wan ekʼel sbʼaji, tʼilani oj yalyabʼ ja stati. Soka stati wani skʼana oj snaʼ jasa wan ekʼel sbʼaj bʼa skoltajel. Ja kanel chʼabʼani mini jas oj bʼobʼ tojbʼuk.
Pe ja bʼa yoxil modo, ja Lea mini xyaʼakan jas oj timjuk bʼa oj kan chʼabʼan. Ja yeʼn wani xyaʼakan bʼa pilan ekʼele ja sloʼileʼi. Sok ta yala oj stsʼijbʼukyi jun karta ja stati, bʼobʼta ja Lea masni oj ya kulan.
Stsʼijbʼajel jun karta ojni koltajuk ja Lea bʼa oj bʼobʼ xchol ja jasa wa skʼana oj yali. Yajni skʼuman ja stati, masni oj yabʼ stojol ja jas wan ekʼel sbʼaj ja yakʼixi. Ja yuj, ja bʼa yoxil modo ojni ya el slekilal ja Lea sok ja stati. Ta ochye loʼil ma kechan stsʼijbʼanyi jun karta, ja modoʼal it jani wan snochjel ja rason bʼa Biblia bʼa «la xa jleetic modo jastal laman oj ajyucotic» (Romanos 14:19).
¿Jas pilan modoʼal oj bʼobʼ stsaʼ ja Lea?
Pensaraʼan bʼa pilan modoʼal sok ja slekilal ma ja swokolil.
ALA JA STOJOLIL
Ajuluka kʼujol: ja jas waxa kʼana oja wali mini tolabidaʼuk wa xyabʼye stojolil jawa nantati.
SJEJEL:
Jawa nantati wa sjobʼowi jas yuj chʼinajxta aya. Ja weʼn waxa jakʼa: «Mixa xkʼana oj jtaʼ tiʼal ja jaw».
Pe bʼobʼta jawa nantati oj spensaraʼuke jachuk: «Mixa xjipa lek jkʼujol soka jnantati. Jaxa oj kalyabʼye ja kamigoʼik ja jas wan ekʼel jbʼaji».
Lekbʼi xa tʼaspun jun tsatsal wokol sok jawa tat ma wa nan wa skʼana oj skoltaya, pe ta ja weʼn xa wala: «Mok chamuka kʼujol, oj jtojbʼes jtuchʼil».
-
¿Jasa oj bʼobʼ yabʼye stojol jawa nantati?
-
¿Jasa mas lek oja jakʼi?
Bʼobʼta cha ojni akʼul gusto
SJOBʼJELIK YIʼOJE JA KEREMTIK AKʼIXUK
¿Jastal oj bʼobʼ loʼilanukon soka jnantat yuja ordenik wa xyaweki?
Nebʼa jastal ochel loʼil soka wa nanatat sok oja wil slekilal.
DIBUJOʼIK BʼA WA XNIJKI
Jastal ochel loʼil soka wa nanatati
Ja rasonik it oj bʼobʼ skoltaya bʼa oj bʼobʼ ochansoke loʼil bʼa jun modo mas lek.
