SJEJEL 04
¿Machunkiluk ja Dyos?
Man kujlaji ja luʼumkʼinali, ja kristyano wani xyaweyi stoyjel jitsan dyosik. Pe ja Biblia wa staʼa tiʼal bʼa jun Dyos ke «masni ekʼel yuj spetsanil tuk dyosik» (2 Crónicas 2:5). ¿Machunkiluk ja yeʼn? ¿Sok jas yuj masni ekʼel ja yeʼn yuj spetsanil ja tuk dyosik wa stoyowe ja kristyano? Nebʼa ja bʼa sjejel it ja jas wa skʼana ja Dyos oja naʼ bʼa yeʼna.
1. ¿Jas bʼiʼil ja Dyos, sok jastal wa xnaʼatik ke wani skʼana oj jnatik ja sbʼiʼil?
Ja bʼa Biblia, ja Dyosi yeʼnani wa xyala: «Keʼna Jyoba. Jani jaw ja jbʼiʼili» (kʼuman ja Isaías 42:5, 8). Ja bʼiʼilal Jyoba tini jakel bʼa hebreo, sok jastalni wa xyala ja matik jel chapan, wa stojolan «yeʼn wa skʼulan bʼa akʼotuk». Ja Jyoba wani skʼana ke oj jnatik ja sbʼiʼili (Éxodo 3:15). ¿Jastal wa xnaʼatik? Yujni skʼulan sbʼaj asegurar ke ja sbʼiʼili oj tax mas ja 7,000 ekʼele ja bʼa Biblia. a Ja Jyoba jani sbʼiʼil «ja Dyos smeranil ja bʼa xchaʼanil ja satkʼinal sok bʼa yibʼel ja luʼumi» (Deuteronomio 4:39).
2. ¿Jasa wa xcholokabʼtik ja Biblia sbʼaja Jyoba?
Ja Biblia wa xyala, bʼa spetsanil ja dyosik wa xyaweyi stoyjel ja kristyano, kechan yeʼn ja Jyoba ja Dyos smeranil. ¿Jas yuj? Ay jitsan rasonik. Ja Jyoba kechan yeʼn ja mas chaʼan xchol, ja ‹Mas niwan bʼa spetsanil ja luʼumkʼinali› (kʼuman ja Salmo 83:18). Yeʼn ja «Maʼ kechan jel ja yip» sok ja jaw wa xkʼan yal ke ayni yiʼoj ja ipal bʼa skʼulajel spetsanil ja jas wa skʼana. Cha yeʼn ja Kʼulumani, ja maʼ skʼulan «yibʼanal ja jastik junuki»: ja sutsatkʼinali sok spetsanil ja jastik sakʼan ay ja bʼa luʼumi (Apocalipsis 4:8, 11). Chomajkil ja Jyoba kechanta yeʼn ja maʼ ajyel sakʼan bʼa tolabida sok ja maʼ oj ajyuk bʼa tolabida (Salmo 90:2).
LA JNEBʼTIK MAS
La kiltik ja stukil yiʼoj ja tituloʼik yiʼoj ja Dyos sok ja sbʼiʼil bʼa kechantani yeʼn wa sbʼajin. Cha oj jnebʼtik jasa wa skʼulan bʼa oj jnatik ja sbʼiʼili sok jas yuj wa skʼana oj natik jas bʼiʼil.
3. Ja Dyosi ayiʼoj jitsan tituloʼik, pe kechanta jun sbʼiʼil
Bʼa oj ilxuk ja stukil ja stituloʼik jun kristyano sok ja sbʼiʼil, kʼelawik ja BIDEO sok loʼilananik sbʼaja jas ti nochani:
-
¿Jasa stukil yiʼoj jun mero bʼiʼilal sok jun título jastal ajwalal?
Ja Biblia wa xyala ke ja kristyano wa xyaweyi stoyjel jitsan dyosik sok ajwalalik. Kʼumanik ja Salmo 136:1-3 sok loʼilananik sbʼaja jas ti nochani:
-
¿Machunkiluk ja «Dyos bʼa dyosik» sok ja «Ajwalal bʼa ajwalalik»?
4. Ja Jyoba wa skʼana oja naʼ ja sbʼiʼili sok oj wa makunuk
¿Jastal wa xnaʼatik ke ja Jyoba wa skʼana ke oja naʼ ja sbʼiʼil? Kʼelawik ja BIDEO sok loʼilananik sbʼaja jas ti nochani:
-
¿Jas yuj waxa kʼuʼan ke ja Jyoba wa skʼana anajuk ja sbʼiʼili?
Ja Jyoba wa skʼana ke ja kristyano ayawe makunuk ja sbʼiʼili. Kʼumanik ja Romanos 10:13 sok loʼilananik sbʼaja jas ti nochani:
-
¿Jas yuj jel tʼilan yajel makunuk ja sbʼiʼil ja Dyos, Jyoba?
-
¿Jastal waxa wabʼ yajni ay maʼ wa skʼumana soka wa bʼiʼili?
-
¿Jastal waxa kʼuʼan wa xyabʼ ja Jyoba yajni wa xwa makunuk ja sbʼiʼili?
5. Ja Jyoba wa skʼana oja wamigoʼuk
Jun ixuk bʼa Camboya sbʼiʼil Soten yala ke ja snebʼjel ja sbʼiʼil ja Dyos jani ja mas lek wa xbʼobʼ ekʼuk ja bʼa sakʼanil june. Kʼelawik ja BIDEO sok loʼilananik sbʼaja jas ti nochani:
-
¿Jasa nikji skʼulajel ja Soten yajni snaʼa ja sbʼiʼil ja Dyos?
Bʼa oj kamigoʼuktik june, jani bʼajtan oj jnatik ja sbʼiʼil. Kʼumanik ja Santiago 4:8a sok loʼilananik sbʼaja jas ti nochani:
-
¿Jas wa skʼana ja Jyoba oja kʼuluk?
-
¿Wan maʼ xa kʼuʼan ke ja snajel sok yajel makunuk ja sbʼiʼil ja Dyosi oj skoltaya bʼa oj mojxansok? ¿Jas yuj?
JA JAS WA XYALAWE JUJUNTIK: «Kechan jun Dyos, mey stʼilanil ja sbʼiʼil wa xkʼumantik».
-
¿Wan maʼ xa kʼuʼan ke ja Dyosi sbʼiʼil Jyoba?
-
¿Jastal oja chol yabʼye ja tuk ke ja Dyos wa skʼana oj katik makunuk ja sbʼiʼil?
JA JASA NEBʼA
Ja Jyoba jani sbʼiʼil ja Dyos smeranili. Ja Yeʼn wa skʼana oj jnatik ja sbʼiʼil sok oj katik makunuk bʼa oj kamigoʼuktik.
Yajel juljkʼujoltik
-
¿Jasa stukil ja Jyoba yuj spetsanil ja tuk dyosik wa stoyowe ja kristyano?
-
¿Jas yuj tʼilan oj katik makunuk ja sbʼiʼil ja Dyosi?
-
¿Wan maʼ skʼana ja Jyoba oja wamigoʼuk? ¿Jastal waxa naʼa?
LEʼA TUK JASTIK
Paklay joʼe rason bʼa wa xchiktes ke sakʼani ja Dyosi.
Ila jas yuj sbʼejni spensarajel ja Dyos tolanibida ajyel.
«¿Maʼ kʼulajiyuj ja Dyos?» (Ja Juʼun Cholumani, 1 bʼa agosto bʼa 2014)
Ila jas yuj tʼilan yajel makunuk ja sbʼiʼil ja Dyos ama mi xnaxi ja jastal mero wa x-alxi ja jastal tsʼijbʼaji.
¿Ay maʼ stʼilanil ja jastal wa xkʼumantik ja Dyos? Ila jas yuj wa xkalatik ja Dyos kechantani ay jun sbʼiʼil.
a Ja bʼa slamik 1-5 ja poyeto Koltajel bʼa spaklajel ja Yabʼal ja Dyosi oja taʼ mas ja bʼa jas wa stojolan ja sbʼiʼil ja Dyos sok jas yuj jujuntik Biblia yaʼuneje elkan ja bʼiʼilal jaw.
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
