SJEJEL 05
Ja Biblia jani yiʼoj ja yabʼal ja Dyos
Ja Jyoba yaʼunejkitik jun tsamal majtanal: ja 66 libro yiʼoj ja Biblia. Pe bʼobʼta waxa jobʼo abʼaj: «¿Bʼa jak ja Biblia? ¿Maʼ spensar tsʼijbʼaji?». Bʼa yajelyi sjakʼjel ja sjobʼjelik jaw, la kiltik jastal ajyel ja yabʼal ja Dyos man bʼa jtyempotik.
1. ¿Jas yuj ja Biblia jani spensar ja Dyos ta stsʼijbʼan winike?
Junuk 40 winike bʼa tuktukil ja jas wa skʼulane sok ja sakʼanile stsʼijbʼane ja Biblia. Kʼe tsʼijbʼajuk bʼa jabʼil 1513 bʼajtanto bʼa styempo Jesús sok chʼak tsʼijbʼajuk bʼa jabʼil 98 bʼa styempo Jesús. Ja yuj, yiʼajni junuk 1,600 jabʼil stsʼijbʼajel. Ama jachuk, ja Biblia wani syaka sbʼaj. ¿Jastal wa xbʼobʼi? Yujni yeʼn spensar ja Dyos (kʼuman ja 1 Tesalonicenses 2:13). Ja winike it mini jaʼ stsʼijbʼane ja jas wa spensaraʼane. Ja yeʼnle, «kʼumaniye bʼa sparte Dyos bʼa tojubʼale yuja yipi» (2 Pedro 1:21). Soka yip ja Dyos stojo ja winike it bʼa oj stsʼijbʼuke ja jas wa spensarani (2 Timoteo 3:16).
2. ¿Matik wa xbʼobʼ ajyukyujile ja Biblia?
Kristyanoʼik «bʼa yibʼanal ja chonabʼik, ja kʼoleʼik, ja kʼumalik sok ja lugariki» wa xbʼobʼ yawe el slekilal ja lekil rasonik wa xyaʼa ja Biblia (kʼuman ja Apocalipsis 14:6). Ja Dyos yaʼunejnikan oj ajyuk bʼa jitsan kʼumal. Jani ja libro mas sutubʼal bʼa spetsanil ja tyempo. Tʼusan mi yibʼanaluk ja kristyano wani xbʼobʼ skʼumuke ja Biblia, chikan bʼa kulane ma jas kʼumalil wa xkʼumaniye.
3. ¿Jastal stalnay ja Jyoba ja Biblia?
Ja Biblia tsʼijbʼaji bʼa jastik mi x-albʼi, jastal bʼa stsʼujmil chante sok papiro. Pe kristyanoʼik bʼa wa syajtaye ja Biblia skʼulane kopyar jitsan. Sokni skʼabʼ skʼulane sok stalnaye lek. Anima jitsan kristyano bʼa ay yipe skʼanawe oj xchʼaye snajel ja Biblia, pe tuk puestoni ajyiye bʼa oj stalnaye ama xmiljiye. Ja Jyoba mini jas yaʼunejkan bʼa ay jas oj timjuk bʼa mi oj skʼumukotik. Ja Biblia wa xyala: «Ja yabʼal ja jDyostiki wa x-albʼi bʼa tolabida» (Isaías 40:8).
LA JNEBʼTIK MAS
La jnatik mas jastal ja Dyos stojo jujuntik winik bʼa oj stsʼijbʼuke ja Biblia sok jasa skʼulunej bʼa stalnajel sok bʼa oj bʼobʼ ajyukyujile ja kristyano.
4. Ja Biblia wa xyala maʼ spensar tsʼijbʼunubʼal
Kʼelawik ja BIDEO. Tsaʼan kʼumanik ja 2 Timoteo 3:16 sok loʼilananik sbʼaja jas ti nochani:
-
Ta ja Biblia stsʼijbʼan winike, ¿jas yuj wa x-alxi jani ja Yabʼal ja Dyosi?
-
¿Ay maʼ sbʼej skʼuʼajel ke ja Dyos ya ekʼyi ja spensar ja matik stsʼijbʼane?
Ja sekretaryo wa stsʼijbʼan ja karta, pe jani spensar ja yajwali, bʼa wa x-aljiyabʼ ja jas tʼilan oj stsʼijbʼuki. Cha jachni junxta soka Biblia: stsʼijbʼane winike, pe jani ja yabʼal ja Dyos.
5. Ja Biblia mini bʼobʼ chʼayjuk snajel
Ta ja Biblia ti jakel bʼa Dyos, sbʼejni yeʼn oj stalnay. Ja bʼa tyempoʼik ekʼeli, jitsan gobyerno sleʼawe modo xchʼayjel snajel ja Biblia. Cha ajyini olomalik bʼa relijyon bʼa mi skʼanawe oj skʼumuke ja kristyanoʼik. Ama ajyini kontraʼalik sok wa skʼanawe oj milwanuke, jitsani ajyiye puesto stalnajel ama ti xmiljiyeʼa. Bʼa oj jnatik sbʼaj june ja winike it, kʼelawik ja BIDEO sok loʼilananik sbʼaja jas ti nochani:
-
Snajel jel skʼulane luchar bʼa stalnajel ja Biblia, ¿masxa maʼ wa xyawi gana oja kʼumuk? ¿Jas yuj?
Kʼumanik ja Salmo 119:97 sok loʼilananik sbʼaja jas ti nochani:
-
¿Jasa ikʼubʼale jitsan bʼa puesto ajyele sutjel sok spukjel ja Biblia ama ti xmiljiye?
6. Jun libro bʼa spetsanil ja kristyano
Ja Biblia jani ja libro mas sutubʼal sok pukubʼal bʼa spetsanil ja tyempoʼik. Kʼumanik ja Hechos 10:34, 35 sok loʼilananik sbʼaja jas ti nochani:
-
¿Jas yuj ja Dyos wa skʼana asutxuk bʼa jitsan kʼumal sok apukxuk bʼa jitsan lugar ja Yabʼali?
-
¿Jasa wa spayawa ja bʼa Biblia?
Tʼusan
mi spetsaniluk
ja kristyano
wani xbʼobʼ skʼumuke ja Biblia bʼa jun kʼumal wa xyabʼye stojol
Ayxa bʼa mas ja
3,000
kʼumalik,
yenteroʼil ma xetʼan
5,000 miyonik
Tʼusan mey ja número jaw ja kʼulubʼal imprimir ja Biblia.
Jani ja libro mas kʼulubʼal imprimir
JA JAS WA XYALAWE JUJUNTIK: «Ja Biblia kechan jun poko libro bʼa stsʼijbʼane winik».
-
¿Jas waxa pensaran?
-
¿Jas prebaʼik wa xchiktes ja Biblia jani Yabʼal ja Dyos?
JA JASA NEBʼA
Ja Biblia jani Yabʼal ja Dyos, sok skʼulunejni sbʼaj asegurar bʼa ojni bʼobʼ ajyukyujile spetsanil ja kristyano.
Yajel juljkʼujoltik
-
¿Jas wa xkʼan yal ke ja Dyos stojo winike bʼa stsʼijbʼajel ja Biblia?
-
¿Jasa mas wa spayawa ja mi bʼobʼ chʼayjuk snajel ja Biblia? ¿Sok jas oja wal sbʼaja sutjel sok spukjel?
-
¿Jastal waxa wabʼ spetsanil ja jas skʼulunej ja Dyos bʼa oj bʼobʼ skʼumuka?
LEʼA TUK JASTIK
Kʼotan naʼa ja loʼil sbʼaja Biblia, man jastal mero tsʼijbʼaji sok man jastal sutubʼal ja bʼa masto ajkʼachi.
«Ja jastal kʼot ajyukujtik ja Biblia» (¡Kʼeʼan!, noviembre bʼa 2007)
Kʼuman jastal ja Biblia talnaji ja bʼa oxe niwan skontra.
«¿Jastal talnaji ja Biblia?» (Ja Juʼun Cholumani, núm. 4 2016)
Ila jastik wokol ekʼ sbʼaje jujuntik kristyano bʼa oj sut-e ja Biblia.
Ay jitsan kopya sok jitsan sutubʼal ja Biblia. ¿Jastal oj bʼobʼ ajyan seguro mini tukbʼeluk ja yabʼal ja Dyos?
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
