SJEJEL 08
Ojni bʼobʼa wamigoʼuk ja Jyoba
Ja Jyoba wa skʼana oja naʼ sbʼaj lek. ¿Jas yuj? Yujni ja yeʼn wa skʼuʼan ke ojni akʼan oja wamigoʼuk ta anaʼa sbʼaj lek ja modoʼalik yiʼoji, ja jastal wa skʼulan ja jastik junuki soka jas wa skʼana oj skʼuluk. Pe ¿merani maʼ wa xbʼobʼ kamigoʼuktik ja Dyos? (Kʼuman ja Salmo 25:14). ¿Jasa tʼilan oja kʼuluk bʼa oj lajxukawuj? Ja Biblia wa xyakitik ja sjakʼjelik ja bʼa sjobʼjelik jaw sok wa xyalakabʼtik jas yuj ja yamigoʼajel ja Jyoba jani ja mas lek oj ajyukawuj.
1. ¿Jasa wa slokowa skʼulajel ja Jyoba?
«Mojxanik soka Dyosi sok jaxa yeʼni ojni mojxuka mokex» (Santiago 4:8). ¿Jasa wa xkʼan yal ja yaljelik jaw? Ke ja Jyoba wa slokowa oja wamigoʼuk. Bʼobʼta jujuntik wokolni xyabʼye skʼuʼajel ke oj yamigoʼuke ja Dyos yuja mi xbʼobʼ yil-e. Ja yeʼn yaʼunejkankitik ja Yabʼali, ja Biblia, bʼa snajel ja modoʼalik yiʼoji bʼa jachuk oj mojxukotiksok. Yajni wa xkʼumantik ja Biblia ja rasonik yiʼoj bʼa keʼntik, masni wa stsatsbʼi ja jastal wa xkila jbʼajtik soka Jyoba ama mi xbʼobʼ kiltik.
2. ¿Jas yuj ja Jyoba yeʼn ja lekil amigo oj bʼobʼ ajyukawuj?
Ja Jyoba yeʼnani ja mas wa syajtaya yuj tuk kristyano. Ja yeʼn wa skʼana gusto oj ajyan sok wa skʼana tolabida oja leʼa koltajel bʼa yeʼna. Ojni bʼobʼ wa ‹ekʼyi spetsanil jawa chamkʼujoli› yujni ja yeʼn wa xcham skʼujol bʼa weʼna (1 Pedro 5:7). Ja Jyoba tolabida puesto ay bʼa oj skoltay, bʼa oj yayi kulan skʼujol sok bʼa oj smaklay ja yamigoʼiki (kʼuman ja Salmo 94:18, 19).
3. ¿Jasa wa skʼana ja Jyoba oj skʼuluk ja yamigoʼik?
Ja Jyoba wani syajtay spetsanil ja kristyano, pe «ja Yeʼn jel mojan ay soka matik toj ayi» (Proverbios 3:32). Ja Jyoba wani smajlay ja yamigoʼiki oj sleʼe modo skʼulajel ja bʼa jastik lek xyila sok ayawekan skʼulajel ja jastik mi lekuki. Bʼobʼta jujuntik wa spensarane ke nunka oj lajxukyujile ja jastik wa skʼana ja Jyoba. Pe ja yeʼn wani xyabʼ stojol sok wa skʼulan aseptar spetsanil ja matik meran wa syajtayi sok wa skʼujolane skʼulajel ja jas wa skʼana (Salmo 147:11; Hechos 10:34, 35).
LA JNEBʼTIK MAS
La jnebʼtik mas jastal oj bʼobʼ kamigoʼuktik ja Jyoba sok jas yuj yeʼnani ja lekil amigoʼal oj bʼobʼ ajyukujtiki.
4. Ja Abrahán yamigoʼan ja Jyoba
Ja loʼil bʼa Biblia sbʼaja Abrahán (cha sbʼiʼil Abrán) wa xya jnatik jasa ti chʼikan yamigoʼajel ja Jyoba. Kʼumanik sbʼaja Abrahán ja bʼa Génesis 12:1-4 sok loʼilananik sbʼaja jas ti nochani:
-
¿Jasa aljiyabʼ a-skʼuluk ja Abrahán yuja Jyoba?
-
¿Jasa skʼapjiyi ja Abrahán yuja Jyoba?
-
¿Jasa skʼulan ja Abrahán tsaʼan yajni chʼak aljukyabʼ yuja Jyoba ja jas oj skʼuluki?
5. Ja jas wa skʼana ja Jyoba oj skʼuluk ja yamigoʼik
Bʼa kibʼanaltik, wa xkʼanatik ay jas oj skʼuluk ja kamigotik.
-
¿Jasa waxa kʼana oj skʼuluk ja wamigoʼik bʼa weʼna?
Kʼumanik ja 1 Juan 5:3 sok loʼilananik sbʼaja jas ti nochani:
-
¿Jasa wa skʼana ja Jyoba oj skʼuluk ja yamigoʼik?
Bʼa skʼuʼajel ja smandarik ja Jyoba, bʼobʼta tʼilan oj jtukbʼestik ja jmodotik. Kʼumanik ja Isaías 48:17, 18 sok loʼilananik sbʼaja jas ti nochani:
-
¿Jas yuj ja Jyoba wa skʼanayi ja yamigoʼik ke a-stukbʼes ja smodoʼe?
Jun lekil kamigotik wa xya juljkʼujoltik ja jas tʼilan oj jkʼuluktik bʼa mi oj ekʼ jbʼajtik jastik mi lekuk sok bʼa lek oj wajkujtik. Ja Jyoba jachni wa skʼulan soka yamigoʼiki.
6. Ja jas wa skʼulan ja Jyoba bʼa skoltajel ja yamigoʼik
Ja Jyoba wa skoltay ja yamigoʼik bʼa oj kuchyujile ja wokoliki. Kʼelawik ja BIDEO sok loʼilananik sbʼaja jas ti nochani:
-
¿Jas skʼulunej ja Jyoba bʼa skoltajel ja ixuk bʼa skʼulajel luchar soka jastal ay xyabʼ sok ja pensarik mi xtulwani?
Kʼumanik ja Isaías 41:10, 13 sok loʼilananik sbʼaja jas ti nochani:
-
¿Jasa wa skʼapa ja Jyoba oj skʼulukyi spetsanil ja yamigoʼik?
-
¿Wan maʼ xa kʼuʼan ke ja Jyoba ojni bʼobʼ kʼot jun lekila wamigo? ¿Jas yuj?
Ja meran amigoʼiki wa skoltayotik ja yajni wa xmakunikujtik. Ja Jyoba jachni oj cha skʼuluk bʼa weʼna.
7. Ja yamigoʼajel ja Jyoba tʼilan smaklajel sok loʼilanelsok
Ja jastal wa xkila jbʼajtik soka kamigotiki wani stsatsbʼi ja yajni wala loʼilanitiksoke. Kʼumanik ja Salmo 86:6, 11 sok loʼilananik sbʼaja jas ti nochani:
-
¿Jastal oj bʼobʼ loʼilanukotik soka Jyoba?
-
¿Jastal wa skʼumanotik ja Jyoba?
Wa xkʼumantik ja Jyoba bʼa orasyon, jaxa yeʼn wa skʼumanotik ja bʼa Biblia.
JA JAS WA XYALAWE JUJUNTIK: «Nunka oj bʼobʼ kamigoʼuktik ja Dyos».
-
¿Jas teksto oja wa makunuk bʼa sjejel ojni bʼobʼ kamigoʼuktik ja Jyoba?
JA JASA NEBʼA
Ja Jyoba wa skʼana oja wamigoʼuk, sok oj skoltaya ja bʼa jas oja kʼuluk bʼa oj mojxansok.
Yajel juljkʼujoltik
-
¿Jastal wa skoltay Ja Jyoba ja yamigoʼik?
-
¿Jas yuj ja Jyoba wa xyala yabʼ ja yamigoʼik tʼilan oj stukbʼes ja smodoʼe?
-
¿Wan maʼ xa kʼuʼan ke jel wokol yamigoʼajel ja Jyoba? ¿Jas yuj jach waxa pensaran?
LEʼA TUK JASTIK
¿Jasa oj yijanawi ja bʼa wa sakʼanil ja yamigoʼajel ja Dyos?
«Ja Jyoba, jun Dyos bʼa mi lomuk snajel sbʼaj» (Ja Juʼun Cholumani, 15 bʼa febrero bʼa 2003)
Nebʼa jastal oj kʼota wamigoʼuk ja Dyos.
Ila jas yuj jun ixuk wa xyala ke ja yamigoʼan ja Jyoba koltaji ja bʼa sakʼanili.
«¡Ja keʼn mi xkʼana oj chamkon!» (Ja Juʼun Cholumani, núm. 1 2017)
Maklay ja jasa wa xyalawe jujuntik keremtik akʼixuk sbʼaja Jyoba.
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
