SJEJEL 09
Ja orasyoni wa xya mojxan soka Dyos
¿Ay maʼ ekʼele waxa wabʼ tʼilan oj tojan ja bʼa wa sakʼanil? ¿Ay maʼ wiʼoj sjobʼjelik tʼilan bʼa me xa taʼa sjakʼjel? ¿Wan maʼ xmakuniwuj oj tsatsankʼujolajan ma ajel kulana kʼujol? ¿Wan maʼ xa kʼana mas mojan ajyel soka Jyoba? Ja orasyoni oj skoltaya ja bʼa jastik jaw. ¿Pe jastal tʼilan oja kʼuluk? ¿Spetsanil maʼ wa smaklay ja orasyonik ja Dyos? ¿Jastal oj ajyan seguro ke oj smaklaya? La kiltik.
1. ¿Maʼ tʼilan oj katikyi orasyon? ¿Jasa oj bʼobʼ jtatik tiʼal?
Ja Jesús sjeʼa kechantani jaʼ oj katikyi orasyon ja jTatik bʼa satkʼinal. Ja yeʼn jani yayi orasyon ja Jyoba. Jun ekʼele yala: «Ja weʼnlexi tʼilani jach oja wawexyi orasyon: ‹Jtatikon teya bʼa satkʼinal...›» (Mateo 6:9). Yajni wa xkatikyi orasyon ja Jyoba, wani stsatsbʼi ja jastal wa xkila jbʼajtiksok.
Ja bʼa korasyontik oj bʼobʼ jtatik tiʼal chikan jasa. Pe ta wa xkʼanatik ja Dyos a-sjakʼe mini oj jkʼantik jastik mi lek xyila. Ja Biblia wa xyala ke wa «xbʼobʼ jkʼantikyi chikan jasa bʼa akuerdo ay soka jas wa skʼana sok jaxa yeʼni wani smaklayotik» (1 Juan 5:14). Ja Jesús yaʼa jujuntik sjejel bʼa jastik oj jkʼantik ja bʼa orasyon (kʼuman ja Mateo 6:9-13). Pe mini kechan skʼanjel ja jas wa xkʼanatiki, tʼilan oj katikyi tsʼakatal ja Dyos ja jas skʼulunejkitiki sok skʼanjel a-skoltay ja tuk.
2. ¿Jastal oj jkʼuluktik ja korasyontik?
Ja Biblia wa xyakitik ja lokjelal it: «Jamawikyi yibʼanal jawa kʼujolexi [ja Dyos]» (Salmo 62:8). Ja yuj ja korasyontiki tini oj el man jkʼujoltik. Oj bʼobʼ jkʼuluktik chikan jas ora, jas ekʼele, jastal ayotik sok jach tsats ma chʼabʼan. Pe bʼa jun modo wa sjeʼa wa xkisatik ja Jyoba.
3. ¿Jastal wa sjakʼa ja Dyos ja korasyontiki?
Bʼa tuktukil modo. Ja bʼa Yabʼal ja Dyos tikʼanxta wa sjakʼa ja sjobʼjelik kiʼojtiki. Skʼumajel ja Biblia oj bʼobʼ ya «biboʼaxuk ja maʼ mi snaʼa» (Salmo 19:7; kʼuman ja Santiago 1:5). Yajni wa x-ekʼ jbʼajtik wokol, ja Jyoba oj yakitik lamanil ja bʼa jpensartik. Cha wani xbʼobʼ snik ja yaʼtijumik bʼa oj skoltayotik yajni wa xmakunikujtik.
LA JNEBʼTIK MAS
La kiltik jastal oj bʼobʼ jkʼultik ja korasyontik bʼa lek xyila ja Dyos sok jastal oj bʼobʼ skoltayotik.
4. Ay jastik wa skʼana ja Dyos bʼa yajelyi orasyon
¿Jasa oj jkʼuluktik bʼa oj smaklay ja korasyontik ja Dyosi? Kʼelawik ja BIDEO.
Ja Jyoba wa skʼana kechan yeʼn oj katikyi orasyon. Kʼuman ja Salmo 65:2 sok loʼilananik sbʼaja jas ti nochan:
-
¿Wan maʼ xa kʼuʼan ja «maʼ wa smaklay ja orasyonik» wa skʼana oja wayi orasyon? ¿Jas yuj jach waxa pensaran?
Ta wa xkʼanatik oj smaklayotik ja Dyos, tʼilan oj jkʼujoluktik yijel ja jsakʼaniltik soka jastik yaʼunejkan kulani. Kʼumanik ja Miqueas 3:4 sok 1 Pedro 3:12, sok loʼilananik sbʼaja jas ti nochani:
-
¿Jas oj bʼobʼ jkʼuluktik bʼa oj smaklay ja Dyos ja korasyontik?
Bʼobʼta chabʼ kʼole soldado skʼanaweyi ja Dyos oj skʼuluke ganar ja guerra. Pe ¿ay maʼ sbʼej spensarajel ke oj sjakʼ ja Dyos?
5. Ja korasyontiki tʼilan ti oj el man jkʼujoltik
Jitsani jeʼubʼalyile junxta oj yal-e ja bʼa yorasyone. Pe ¿ja maʼ tikʼe orasyonik wa skʼana ja Dyos? Kʼumanik ja Mateo 6:7 sok loʼilananik sbʼaja jas ti nochani:
-
¿Jas oj jkʼuluktik bʼa mi oj kaltik «junxta yaljel kada ekʼele» ja bʼa korasyontik?
¿Jas mixa pensaran kada kʼakʼu jun jasunuk tsamal ja bʼa wa sakʼanil sok tsaʼan tixa wayi tsʼakatal ja Jyoba yuja jaw? Ta akʼulan ja it bʼa jun semana, ataʼatani tiʼal juke jasunuk tuktukil ja bʼa wa worasyoni.
Jun lekil tatal wa skʼana ja skeremi aʼel man skʼujol ja jas oj yali. Ja Jyoba cha jachni wa skʼana oj jkʼuluktik ja korasyontik.
6. Ja orasyon jun majtanal bʼa Dyos
¿Jastal oj bʼobʼ ya kiptik ja orasyon, pe masto ja yajni wan ekʼel jbʼajtik wokol? Kelawik ja BIDEO.
Ja Biblia wa skʼapa ke ja orasyoni ojni yakitik meran lamanil. Kʼumanik ja Filipenses 4:6, 7 sok loʼilananik sbʼaja jas ti nochani:
-
Ama ja orasyon mi stojbʼes spetsanil ja jwokoltiki, ¿jastal wa skoltayotik?
-
¿Bʼa jastik junuk waxa kʼulan gusto oja wayi orasyon?
¿Wan maʼ xa naʼa ajyi?
Ja yaljel amén wa stojolan «jachukniʼa» ma «seguro». Man najate wa xyalawe «amén» ja bʼa xchʼakulabʼil ja orasyonik (1 Crónicas 16:36).
7. Pila tyempo skʼulajel orasyon
Ay mi xjul jkʼujoltik yajelyi orasyon yuja jel latsan aytik. Pe ¿janekʼ stʼilanil yila ja Jesús? Kʼumanik ja Mateo 14:23 sok Marcos 1:35, sok loʼilananik sbʼaja jas ti nochani:
-
¿Jastal wa xbʼobʼyuj ja Jesús spiljel tyempo?
-
¿Bʼa oj bʼobʼa pil jawa tyempo?
JA JAS WA XYALAWE JUJUNTIK: «Mi tʼilanuk maʼ wa xkatikyi orasyon, jani wa xkʼot sbʼaj ja Dyos».
-
¿Jas oja wale?
JA JASA NEBʼA
Ja orasyon wa x-el man jkʼujoltik wa xya mojxukotik soka Jyoba. Wa xyakitik lamanil sok ipal bʼa skʼuljel ja jas wa smajlay bʼa keʼntik.
Yajel juljkʼujoltik
-
¿Maʼ tʼilan yajelyi orasyon?
-
¿Jastal tʼilan oj jkʼuluktik?
-
¿Bʼa jastik modo wa skoltayotik?
LEʼA TUK JASTIK
Ila ja sjakʼjel ja sjobʼjel wa xyaʼawe jitsan kristyano sbʼaja orasyoni.
«Juke sjobʼjel sbʼaja orasyon» (Ja Juʼun Cholumani, 1 bʼa octubre bʼa 2010)
Kʼuman jas yuj tʼilan oja kʼuluk orasyon sok jastal oja wa tojbʼuk mas.
Ila ja jas wa sjeʼa ja Biblia sbʼaja maʼ oj katikyi ja korasyontik.
«¿Lek maʼ yajelyi orasyon ja kʼulubʼal dyosiki?» (Artikuloʼik bʼa jw.org)
Kʼela ja bʼa bideo ta tʼilan ay jun lugar ma ay styempoʼil bʼa yajelyi orasyon.
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
