SJEJEL 10
¿Jas yuj lekni oj wajan ja bʼa sreunione ja Testigoʼik?
¿Ay maʼ bʼa lokubʼala ja bʼa sreunione ja testigoʼik bʼa Jyoba? Ta mi bʼa wajela, bʼobʼta wani la xiw ja spensarajel oj wajani. Bʼobʼta waxa jobʼo abʼaj: «¿Jas wa skʼulane ja bʼa sreunione? ¿Jas yuj jel tʼilan bʼa yeʼnle? ¿Tʼilan maʼ oj cha wajkon?». Ja bʼa sjejel it oja nebʼ ke ja bʼa reunioniki mastoni oj kʼota wamigoʼuk ja Dyos sok oj skoltaya.
1. ¿Jasa rason yuja oj jtsom jbʼajtikik?
Jun tsʼijbʼanum bʼa Biblia yala ja rason mas tʼilan oj jtsom jbʼajtikik: «Ja bʼa niwan kongregasyoni oj jtsʼebʼantay ja Jyoba» (Salmo 26:12). Ja testigoʼik bʼa Jyoba cha wani stsomo sbʼaje, jelni wa x-aji gustoʼaxuke. Bʼa sutanal ja luʼum, kada semana wa skʼulane bʼa stoyjel ja Dyos, stsʼebʼantajel sok yajelyi orasyon. Ja bʼa jabʼilik, jujuntik ekʼele wa stsomo sbʼaje bʼa niwak kʼole.
2. ¿Jas oja nebʼ ja bʼa jreuniontikoni?
Ja bʼa reunioniki jaʼ wa x-axi makunuk ja Yabʼal ja Dyos sok wa xcholxi jaman lek ja jas wa xyala (kʼuman ja Nehemías 8:8). Ta wajya, oja nebʼ mas sbʼaja Jyoba soka tsamalik smodo. Yajni mas xa naʼa sbʼaj ja yajalkʼujol yiʼoja mok mas oja kʼan yamigoʼajel. Cha oja naʼ jastal oj skoltaya bʼa ajyel juna sakʼanil bʼa ayiʼoj stojol (Isaías 48:17, 18).
3. ¿Jastal oj skoltaya ja kristyanoʼik oja naʼ sbʼaj ja bʼa reunionik?
Ja Jyoba wa skʼana ke «altantoxta la ajyukotik sok ja tuki bʼa oj snikotik sjejel jbʼajtik syajal jkʼujoltik sok skʼulajel jastik lek, pe mokni katikan stsomjel jbʼajtik» (Hebreos 10:24, 25). Ja bʼa reunioniki, oja naʼ sbʼaj kristyano bʼa meran wa syajta sbʼaje bʼa wa skʼana oj snaʼe sbʼaj mas ja Dyos, jastalni weʼn. Sok oja wabʼ jastik wa stsatsankʼujolani ti elel bʼa Biblia (kʼuman ja Romanos 1:11, 12). Oj cha bʼobʼ loʼilanansok solteroʼik sok nupanumik bʼa kuchelyujile chikan jas wokol. Ja it kechanta jujuntik rason yuja wa skʼana ja Jyoba oj wajan ja bʼa reunionik.
LA JNEBʼTIK MAS
La kiltik jastal wa skʼulane ja sreunione ja testigoʼik bʼa Jyoba sok jas yuj ojni katik el slekilal wajel.
4. Ja sreunione ja testigoʼik bʼa Jyoba
Ja snochuman Kristo bʼa bʼajtan siglo, wa stsomo sbʼaje bʼa stoyjel ja Jyoba (Romanos 16:3-5). Kʼumanik ja Colosenses 3:16 sok loʼilananik sbʼaja jas ti nochani:
-
¿Jastal yaweyi stoyjel ja Jyoba ja bʼajtan nochumaniki?
Ja wego, ja Testigoʼik tikʼan wa stsomo sbʼaje ja bʼa lugarik wa xyaweyi stoyjel ja Dyos. Bʼa oja naʼ jastal wa skʼulane, kʼelawik ja BIDEO. Tsaʼan kʼelawik ja dibujo bʼa jun reunión sok loʼilananik sbʼaja jas ti nochani:
-
¿Jasa oj slaj awila wa xkʼulaxi bʼa jun Naʼits bʼa Tsomjelal soka jas wa xyala ja Colosenses 3:16?
-
Yajni awila ja bideo ma ja dibujo, ¿ay maʼ bʼa jasa kʼulan gusto ja bʼa jreuniontikoni?
Kʼumanik ja 2 Corintios 9:7 sok loʼilananik sbʼaja jas ti nochani:
-
¿Jas yuj mi xkʼanji takʼin ja bʼa sreunione ja testigoʼik bʼa Jyoba?
Ja bʼa semana it, kʼela soka wa maestro ja jas oj paklaxuk junuk ja bʼa reunión.
-
¿Jas parte ja bʼa reunión waxa wila mas oj makunukawuj?
¿Wan maʼ xa naʼa ajyi?
Ja bʼa jw.org oja taʼ ja lugar soka ora wa xkʼulaxi ja reunionik bʼa tuktukil parte.
-
Ja bʼa jreuniontikoni wa x-ekʼ loʼilik bʼa Biblia, demostrasyonik sok bideoʼik. Wa xkʼeʼi sok wa xchʼaksok tsʼebʼoj sok orasyon.
-
Bʼa jujuntik parte ja bʼa reunioni, ja maʼ ti tsomane wa xbʼobʼ ya skomentaryoʼe.
-
Chikan maʼ wa skʼana oj wajuk: winik, ixuk, maʼ ayxa skʼujol sok yal untik...
-
Ja sreunione ja testigoʼik bʼa Jyoba kʼebʼubʼalni. Mini xkʼanji takʼin bʼa ochel.
5. Wani skʼana skʼujolajel wajel ja bʼa reunioniki
La jpensaraʼuktik ja spamilya ja Jesús. Ti sbʼaje bʼa Nazaret, sok wajel kada jabʼil ja bʼa templo bʼa Jerusalén, tʼilan oj bʼejyuke junuk oxe kʼakʼu bʼa yoj witsaltik. Kʼumanik ja Lucas 2:39-42 sok loʼilananik sbʼaja jas ti nochani:
-
¿Wan maʼ xa kʼuʼan wa skʼana skʼujolajel wajel ja bʼa Jerusalén?
-
¿Jasa mas wokol xa wabʼ wajel ja bʼa reunionik?
-
¿Lomta maʼ ja skʼujolajel? ¿Jas yuj?
Ja Biblia wa sjeʼa jel tʼilan stsomjel jbʼajtik bʼa stoyjel ja Jyoba. Kʼumanik ja Hebreos 10:24, 25 sok loʼilananik sbʼaja jas ti nochani:
-
¿Jas yuj tʼilan wajel ja bʼa reunioniki?
JA JAS WA XYALAWE JUJUNTIK: «Mini tʼilanuk stsomjel jbʼajtik soka tuk bʼa snebʼjel bʼa Dyos».
-
¿Jas teksto ma sjejel bʼa Biblia wa sjeʼa ja jas wa smajlay bʼa keʼntik ja Jyoba?
JA JASA NEBʼA
Wajel ja bʼa reunioniki oj skoltaya snebʼjel mas bʼa Jyoba, oj tsatsbʼuk ja jastal waxa wilabʼajsoki sok stoyjel lajan soka tuk.
Yajel juljkʼujoltik
-
¿Jas yuj wa slokowotik ja Jyoba ja bʼa reunionik?
-
¿Jasa oja nebʼ ja bʼa sreunione ja testigoʼik bʼa Jyoba?
-
¿Jas pilan modo waxa kʼuʼan oj skoltaya ja bʼa reunioniki?
LEʼA TUK JASTIK
¿Wan maʼ la xiw spensarajel wajel ja bʼa reunioniki? Jun winik jachtikni wa xyabʼi, pe kʼotni skʼul gusto. Ila jas yuj.
¡Mini oj jchʼay jkʼujoltikon ja jastal jel lek kʼuljitikon recibiri! (4:16)
Naʼa sbʼaj jun kerem jel skʼulan gusto wajel ja bʼa reunioniki. Sok ila jasa skʼulan bʼa mi oj yakan wajel.
Kʼuman jas wa spensarane ja tuk sbʼaja reunioniki.
«¿Jas yuj lekni wajel ja bʼa reunionik bʼa Naʼits bʼa Tsomjelal?» (Artikuloʼik bʼa jw.org)
Ila jastal jun winik tukbʼi ja sakʼanil jel kistal yajni kʼe wajuk ja bʼa sreunione ja testigoʼik bʼa Jyoba.
«Mini xkaʼakan ja karma» (Ja Juʼun Cholumani, 1 bʼa julio bʼa 2014)
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
