SJEJEL 12
¿Jas oj skoltaya bʼa mi oja wakan skʼuljel estudiar?
Ama ja skʼuljel estudiar ja Biblia wani xkatik el slekil pe mini tolabida pasiluk. Bʼobʼta ayni waxa jobʼo abʼaj ta meran oj bʼobʼukawuj. ¿Jas yuj mini oja naʼ malaya ja skʼujolajel? ¿Jas oj skoltaya bʼa mi oja wakan ama ay wokolik?
1. ¿Jas yuj mi lomuk skʼuljel estudiar ja Biblia?
«Ja yabʼal ja Dyosi sakʼan ay sok ayni yip» (Hebreos 4:12). Ja Biblia juni libro jel chaʼanyabʼalil yujni wa xyala ja jas wa spensaran sok wa xyabʼ ja Dyos bʼa weʼna. Mi kechan oj yawi snajel, cha oj skoltaya stsajel skʼulajel bʼa lek sok jun smajlajel ja bʼa tyempo jakumi. Pe ja mas tʼilan, ja Biblia oj skoltaya bʼa oja wamigoʼuk ja Dyos. Kada ekʼele waxa kʼulan estudiar wana yajelkan ja yipi oj stojbʼes jawa sakʼanil.
2. ¿Jas yuj tʼilan snajel ja yip yiʼoj ja smeranilik bʼa Biblia?
Ja smeranilik bʼa Biblia jach jastik bʼa jel chaʼanyabʼalil. Ja yuj wa xyakitik ja lokjelal it: «Mana ja smeranili sok moka chone» (Proverbios 23:23). Ta wa xkaʼa tʼabʼan jkʼujoltik ja janekʼto chaʼanyabʼalil ja smeranilik bʼa Biblia, ojni jkʼujoluktik skʼulajel estudiar ama xjak wokolik (kʼuman ja Proverbios 2:4, 5).
3. ¿Jas oj skʼuluk ja Jyoba bʼa oj skoltaya skʼuljel estudiar?
Yuja Jyoba yeʼn ja Kʼuluman maʼ jel juntiro ja yip sok awamigo, wani snaʼabʼaj lek sok wa skʼana oj skoltaya bʼa oja naʼ sbʼaj mas. Ojni bʼobʼ yawi «ja kʼankʼunel sok ja ipal bʼa skʼulajel» (kʼuman ja Filipenses 2:13). Ta ay ekʼele waxa kʼana oj nikjan mas bʼa skʼuljel estudiar ma yajel makunuk ja jas waxa nebʼa, ojni skoltaya. Cha ojni yawi mas awip ta waxa kʼana bʼa kuchelawuj jun wokol ma ja kontra wala ilji. Mokni awakan skʼanjelyi ja Jyoba bʼa mi oja wakan skʼuljel estudiar (1 Tesalonicenses 5:17).
LA JNEBʼTIK MAS
La kiltik jas oj bʼobʼa kʼuluk bʼa mi oja wakan skʼuljel estudiar ja Biblia ama wa skʼana oj stima ja tuk ma yuja jel latsan aya. Tsaʼan, oj kiltik ja jas oj skʼuluk ja Jyoba bʼa oj skoltaya.
4. Ila stʼilanil skʼulajel estudiar ja Biblia
Ay ekʼele jel jas wa slatsawotik ke wokolni xkabʼtik spiljel tyempo skʼuljel estudiar. ¿Jas oj bʼobʼ kʼulaxuk? Kʼumanik ja Filipenses 1:10 sok loʼilananik sbʼaja jas ti nochani:
-
Bʼa weʼna, ¿«jastik junuk ja mas tʼilani»?
-
¿Jas oja kʼuluk bʼa jaʼ oja wa bʼajtan bʼej ja skʼuljel estudiar?
-
Ta achʼika arena bʼa jun yeʼtal sok tsaʼan achʼika jitsan ton, ja toniki mi oj chʼak ochuk.
-
Ta bʼajtan achʼika ja toniki, tʼusani mi oj chʼak ochuk ja arena. Junxta jastal jaw, ta jaʼ awaʼa bʼajtan bʼej ja jastik «mas tʼilani», oj lajxukawuj skʼulajel sok oj kanuka tyempo bʼa tuk jasunuk.
Skʼuljel estudiar ja Biblia wa xya gustoʼaxukotik, yujni wa skoltayotik snajel sbʼaj ja Dyos sok yajelyi stoyjel. Kʼumanik ja Mateo 5:3 sok loʼilananik sbʼaja jas ti nochani:
-
¿Jasa slekilal oj katik eluk ta wa xkaʼatik bʼajtan bʼej ja skʼuljel estudiar?
5. Mok eluka gana ama wa stimawa ja tuk
Bʼobʼta jujuntik ayni ekʼele oj sleʼe modo oj ya kʼokxan oja wakan skʼuljel estudiar. Ila ja sjejel bʼa Francesco. Kʼelawik ja BIDEO sok loʼilananik sbʼaja jas ti nochani:
-
¿Jastal yabʼye ja spamilya sok ja yamigoʼik ja Francesco yajni yala ja jas wan snebʼjeli?
-
¿Jas yuj mini lomuk ja mi yaʼakani?
Kʼumanik ja 2 Timoteo 2:24, 25 sok loʼilananik sbʼaja jas ti nochani:
-
¿Jas wa spensaran jawa pamilyaʼik sok ja wamigoʼik ja jas wana snebʼjel?
-
Jastalni wa xyala ja bersikuloʼiki, ¿jasa tʼilan oja kʼuluk yajni ay maʼ mi skʼana oja kʼul estudiar? ¿Jas yuj?
6. Jipa akʼujol ke ojni skoltaya ja Jyoba
Yajni mas wa stsatsbʼi ja jastal wa xkila jbʼajtik soka Dyos, mas oj yakitik gana yajel gustoʼaxuk. Ama jachuk, bʼobʼta wokolni oj kabʼtik stukbʼesel jujuntik jasunuk ja bʼa jsakʼaniltik bʼa yijel ja jastik yaʼunejkan kulan. Mok eluka gana ta ay ekʼele jach awabʼ, ja Jyoba oj skoltaya. Kʼelawik ja BIDEO sok loʼilananik sbʼaja jas ti nochani:
-
¿Jastik jun tʼilan stukbʼes ja Jim bʼa skʼulajel ja jas wa skʼana ja Jyoba?
-
¿Jasa mas cham awila ja bʼa jas skʼulan ja Jim?
Kʼumanik ja Hebreos 11:6 sok loʼilananik sbʼaja jas ti nochani:
-
¿Jas oj skʼuluk ja Jyoba yuja «matik kongana wa xlejiyuji», wa xkʼan alxuk, ja maʼ wa skʼujolane snajel sbʼaj sok yajel gustoʼaxuk?
-
¿Jastal maʼ waxa pensaran wa xyabʼ ja Jyoba ja wa xyila waxa kʼujolan skʼulajel estudiar?
JA JAS WA SJOBʼOWE JUJUNTIK: «¿Jas yuj wana skʼuljel estudiar ja Biblia?».
-
¿Jas oja wale?
JA JASA NEBʼA
Ama skʼulajel estudiar ja Biblia mi tolabida pasiluk, ojni skoltaya yabʼjel stsamalil jawa sakʼanil bʼa tolabida. Ta mixa wakan sjipjela kʼujol bʼa Jyoba, ojni yawi jawa tsʼakol.
Yajel juljkʼujoltik
-
¿Jas yuj chaʼanyabʼal xa wila ja smeranilik bʼa Biblia?
-
Yajni awilata ja «jastik junuk ja mas tʼilani», ¿jasa tʼilan oja kʼuluk?
-
¿Jas yuj tʼilan oja kʼanyi ja Jyoba a-skoltaya bʼa mi oja wakan skʼuljel estudiar?
LEʼA TUK JASTIK
Ila chane modo bʼa koltubʼale jitsan kristyano bʼa yajel makunuk lek ja styempoʼe.
«Ja jastal snajel yajel makunuk lek ja tyempo» (¡Kʼeʼan!, febrero bʼa 2014)
Jun ixuk wa skʼana oj ya gustoʼaxuk ja Dyos, pe ja statami mi xyabʼ stojol jas wa skʼulan bʼa oj bʼobʼyuj. Ila jastal koltaji yuja Jyoba.
Ja Jyoba wa xyaʼa kiptik bʼa yijel och ja kijkatstiki (5:05)
Ila ja jastal mi el sgana jun ixuk skoltay ja statami.
Ay ekʼele ja testigoʼik bʼa Jyoba wa xleji smule ke wa spilawe pamilyaʼik. Pe ¿meran maʼ?
«¿Wan maʼ spila ma wa stsomo ja pamilyaʼik ja taʼumantiʼik bʼa Jyoba?» (Artikuloʼik bʼa jw.org)
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
