SJEJEL 14
¿Jas wa skʼana bʼa lek oj yil ja Dyos ja jastal wa xtoyotik?
Jastalni kilatik ja bʼa sjejel ekʼta, mini spetsanil lek xyila ja relijyonik ja Dyos. Pe ojni bʼobʼ katikyi stoyjel ja jKʼulumantik bʼa jun modo oj ajuk gustoʼaxuk. ¿Jas «modoʼal bʼa stoyjel» ma «relijyon» lek xyila? (Santiago 1:27). La kiltik ja jas wa sjeʼa ja Biblia.
1. ¿Bʼa wa xcholo ja jastal oj toyxuk ja Dyos?
Tini wa xtax bʼa Biblia ja jastal oj toyxuk ja Dyos. Ja Jesús yala yabʼ ja Dyos: «Jawa wabʼali jani ja smeranili» (Juan 17:17). Jujuntik relijyonik mi skisawe ja smeranil wa xtax ja bʼa Yabʼal ja Dyos, ja Biblia; jaʼuktoma, jaʼ wa skʼanawe snochjel ja sjejelik sok ja kostumbreʼik yiʼoje ja kristyano. Pe ja Jyoba mi lek xyila ja wa xyaʼawekan jun lado ja smandarik (kʼuman ja Marcos 7:9). Pe wani xkatik gustoʼaxuk yajni jaʼ wa xkiʼajtik ja jas wa xyala ja Biblia sok wa xkisatik ja srasonik.
2. ¿Jastal oj katikyi stoyjel ja Jyoba?
Yuja yeʼn ja jKʼulumantiki, wa sbʼajin kechan yeʼn oj katikyi stoyjel (Apocalipsis 4:11). Ja it wa stojolan tʼilan oj jyajtaytik sok stoyjel, bʼa mini oj katik makunuk jun kʼulubʼal dyos sok imajenik (kʼuman ja Isaías 42:8).
Ja jastal oj toytik tʼilan «sak ay sok bʼa lek xyila ja Dyosi» (Romanos 12:1). Ja it wa xkʼan yal yijel ja jsakʼaniltik soka jastik yaʼunejkan kulan. Jun sjejel, ja matik wa syajtay ja Jyoba wa skʼuʼane sok chaʼanyabʼal xyilawe ja jas kujlajel sbʼaja nupanel. Cha mi xyabʼye jastik wa xjomwani, jastal droga, may ma ja jelxelxa yujel. a
3. ¿Jas yuj tʼilan oj jtoytik ja Jyoba soka matik wa skʼana oj skʼuʼukeyi?
Ja bʼa reunioniki wa xbʼobʼ katikyi stoyjel «ja Jyoba [...] ja bʼa kongregasyon» (Salmo 111:1, 2). Bʼa jun modo jani stsʼebʼantajelyi tsʼebʼojik (kʼuman ja Salmo 104:33). Ta ja Jyoba wa skʼana ke oj jtsom jbʼajtik, yujni wa skʼanawotik sok wa snaʼa ke oj skoltayotik yabʼjel stsamalil ja sakʼanil bʼa tolabida. Yajni wa stsomo jbʼajtik, wala tsatsankʼujolanitik sok wala tsatsankʼujolajitik.
LA JNEBʼTIK MAS
La kiltik jas yuj ja Jyoba mi skʼana oj katik makunuk imajenik ja bʼa stoyjel. Sok la kiltik tuk modoʼik tʼilan bʼa jastal stoyjel.
4. Mok katik makunuk imajenik bʼa stoyjel ja Dyos
¿Jastal wa xnaʼatik ke ja jaw mini skʼana? Kʼelawik ja BIDEO sok loʼilananik sbʼaja jas ti nochani:
-
¿Jasa ekʼ ja bʼa najate yajni jujuntik ja bʼa xchonabʼ ja Dyos yawe makunuk kʼulubʼal dyos bʼa stoyjel?
Jujuntik wa xyabʼ mas mojan aye soka Dyos ta yawe makunuk imajenik. Pe ¿mi maʼ wanuke yajelkan jun lado ja yajni wa skʼulane? Kʼumanik ja Éxodo 20:4-6 sok Salmo 106:35, 36, sok loʼilananik sbʼaja jas ti nochani:
-
¿Jastik junuk ma imajenik awilunej wa xya makunuk ja kristyano?
-
¿Jastal wa xyabʼ ja Jyoba ja wa x-aji makunuk imajenik?
-
¿Jastal waxa wabʼ ja wa x-aji makunuk imajenik?
5. Ja kechan yeʼn stoyjel ja Jyoba wala eltik ja bʼa skʼuʼajelik mi meranuk
La kiltik jas yuj ja stoyjel ja Jyoba ja jastal wa skʼana wala eltik ja bʼa skʼuʼajelik mi meranuk. Kʼelawik ja BIDEO.
Kʼumanik ja Salmo 91:14 sok loʼilananik sbʼaja jas ti nochani:
-
Ta wa xjeʼatikyi ja Jyoba wa xyajtaytik sok kechanta yeʼn wa xtoyotik, ¿jasa wa skʼapa oj skʼul bʼa keʼntik?
6. Wani xkatikyi stoyjel ja Dyos ja bʼa reunionik
Ja wala tsʼebʼanitik sok wa xkʼulantik komentar ja bʼa reunionik wa xtoyotik ja Jyoba sok wa stsatsankʼujolan jbʼajtikik. Kʼumanik ja Salmo 22:22 sok loʼilananik sbʼaja jas ti nochani:
-
¿Wan maʼ xa wabʼ stsamalil ja komentaryoʼik wa x-aji?
-
¿Wan maʼ xa kʼana xchapjel sok yajel juna komentaryo?
7. Ja Jyoba jel sgusto jawa xcholotik ja jas wa xnebʼatik
Ay jitsan modo bʼa xcholjelyabʼ ja tuk ja jas wa sjeʼa ja Biblia. Kʼumanik ja Salmo 9:1 sok 34:1, sok loʼilananik sbʼaja jas ti nochani:
-
Spetsanil ja jasa nebʼunej bʼa Biblia, ¿jasa waxa wiʼaj gusto oja cholyabʼ ja tuk?
JA JAS WA XYALAWE JUJUNTIK: «Ta lekotik, mini ay stʼilanil ja jastal wa xtoyotik ja Dyos».
-
¿Jas waxa pensaran?
JA JASA NEBʼA
Wa xkatik gustoʼaxuk ja jKʼulumantik yajni kechanta yeʼn wa xtoyotik, yajni wa xkaʼatikyi stoyjel ja bʼa reunionik sok yajni wa xcholotik yabʼ ja tuk ja jas jnebʼunejtik.
Yajel juljkʼujoltik
-
¿Bʼa wa xcholo ja Dyos ja jastal wa skʼana oj katikyi stoyjel?
-
¿Jas yuj kechanta yeʼn oj toytik ja Jyoba?
-
¿Jas yuj tʼilan oj jtoytik ja Dyos soka matik wa skʼana oj skʼuʼukeyi?
LEʼA TUK JASTIK
Kʼuman ja bʼa wa xcholo ja sakʼanili «Elyonta libre ja bʼa stoyjel kʼulubʼal dyosik» jastal jun ixuk yaʼakan stoyjel kʼulubʼal dyosik.
«Ja Biblia stukbʼes ja sakʼanile» (Ja Juʼun Cholumani, 1 bʼa julio bʼa 2011)
Ila jujuntik modo jastal yajel komentaryoʼik ja bʼa reunionik.
«La jtoytik ja Jyoba ja bʼa kongregasyon» (Ja Juʼun Cholumani, enero bʼa 2019)
Ila jastal jun kerem koltaji yuja reunionik ama wokolni xyabʼ wajel.
Jitsan wa xyalawe ke ja krus ti chʼikan soka snochumanik ja Kristo. ¿Pe lek maʼ yajel makunuk bʼa stoyjel ja Dyos?
«¿Jas yuj mi wa xyawe makunuk ja krus ja taʼumantiʼik bʼa Jyoba?» (Artikuloʼik ja bʼa jw.org)
a Ja jastik it oj paklaxuk bʼa sjejelik ti jakum.
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
