SJEJEL 15
¿Machunkiluk ja Jesús?
Ja Jesús yeʼn june ja mas naʼubʼal sbʼaj ja bʼa tyempo ekʼeljani. Jitsan wa snaʼawe ja sbʼiʼili, pe jel tʼusan ja maʼ wa snaʼawe sbʼaji sok jitsan tuk ja jastal wa spensarane machunkiluk. ¿Jas wa sjeʼa ja Biblia sbʼaja yeʼn?
1. ¿Machunkiluk ja Jesús?
Ja Jesús jun anjel jel ja yip tey bʼa satkʼinal. Ja Jyoba jani bʼajtan skʼulan yuja tuk jastik. Ja yuj wa x-aji sbʼiʼiluk «ja bʼajtan uninal bʼa yibʼanal ja kʼulbʼeniki» (Colosenses 1:15). Ja Biblia wa xya sbʼiʼiluk ja «único Yunin» ja Dyos, yujni ja Jyoba yeʼn stuchʼil skʼulan (Juan 3:16). Ja Jesús aʼtiji lajan soka sTati, ja Jyoba, bʼa skoltajel skʼulajel ja tuk jastiki (kʼuman ja Proverbios 8:30). Jeltoni lek xyila sbʼaje. Ja Jesús jaʼa «Yabʼali», wa xkʼan alxuk, ja maʼ toj wa xkʼumani bʼa sparte ja Dyos, ke wa xyaʼa ja tojelalik sok ja srasonik ja sTati (Juan 1:14).
2. ¿Jas yuj jak ja Jesús ja bʼa Luʼum?
Masxa ja 2,000 jabʼil, ja Jyoba ya makunuk ja yip bʼa skʼulajel jun milagro: ya ekʼyi bʼa slukum jun soltera sbʼiʼil María ja sakʼanil ja Jesús, ja anjel jel ja yip. Yuja jaw, ja Jesús pojki jastal jun kristyano (kʼuman ja Lucas 1:34, 35). Jak ja bʼa luʼum bʼa yeʼn oj kʼot Kristo ma ja Mesías kʼapubʼal, sok bʼa skoltajel ja kristyanoʼik. a Spetsanil ja jas yalunejkan ja Biblia sbʼaja Mesías, chʼak kʼot smeranil bʼa yeʼna. Jachuk bʼobʼ snaʼe ja kristyano ke yeʼn «ja Kristo, ja Yunin ja sakʼan Dyosi» (Mateo 16:16).
3. ¿Bʼa wa xtax ja wego ja Jesús?
Yajni ja Jesús chʼak ja sakʼanil jastal kristyano, aji sakʼwuk jastal jun anjel sok kumxi bʼa satkʼinal. Ja tiw ja «Dyos yaʼa bʼa jun cholal masto ekʼxel» (Filipenses 2:9). Ja wego, ja Jesús jun anjel jel ja yip. Pe masni jel ja yip ja Jyoba yuja yeʼn.
LA JNEBʼTIK MAS
La kiltik mas machunkiluk meran kʼotel ja Jesús sok jas yuj jel tʼilan snajel sbʼaj.
4. Ja Jesús mi yeʼnuk ja Dyos Maʼ kechan jel ja yip
Ama ja Jesús jun anjel ay yip ja bʼa satkʼinali, ja Biblia wa xyala wa skʼuʼanyi ja Jyoba, bʼa jaʼ sDyos sok sTat. ¿Jas yuj jach wa xkalatik? Kʼelawik ja BIDEO bʼa yabʼjel stojol ja jas wa sjeʼa ja Biblia ja jastal kʼotel ja Jesús soka Dyos Maʼ jel juntiro ja yipi.
Ja tekstoʼik ti nochan wa skoltayotik snajel jastal kʼotel ja Jyoba soka Jesús. Kʼumanik kada teksto sok loʼilananik sbʼaja jas ti nochani:
Kʼumanik ja Lucas 1:30-32.
-
Jastalni yala ja anjel, ¿jastal kʼotele ja Jesús soka Jyoba, ja «Maʼ jel Niwani»?
Kʼumanik ja Mateo 3:16, 17.
-
¿Jasa yala ja kʼumal bʼa satkʼinal yajni yiʼaj jaʼ ja Jesús?
-
¿Maʼ sbʼaj waxa kʼuʼan ja kʼumal jaw?
Kʼumanik ja Juan 14:28.
-
¿Machʼa mas ekʼxel sok mas ay yip: ja maʼ tatali ma jaʼa yunin?
-
¿Jas kʼan yal ja Jesús ja yala yabʼ ja Jyoba ja «Tatali»?
Kʼumanik ja Juan 12:49.
-
¿Spensaran maʼ ja Jesús ke junxta kʼotel soka sTati? ¿Jas waxa kʼuʼan?
5. ¿Jastal kʼot naxuk ke ja Jesús yeʼnani ja Mesías?
Ja bʼa Biblia ay jitsan jas alubʼalxakan bʼa oj skoltay ja kristyano snajel sbʼaj ja Mesías, ja maʼ stsaʼunej ja Dyos bʼa oj skoltay ja kristyano. Kʼelawik ja BIDEO, bʼa wa xcholo tʼusan sbʼaja jujuntik jas alubʼalxakan ke kʼotni smeranil bʼa Jesús ja yajni ti ajyi bʼa Luʼum.
Kʼumanik ja jas alubʼalxakan bʼa Biblia sok loʼilananik sbʼaja jas ti nochani:
Kʼumanik ja Miqueas 5:2 bʼa snajel bʼa oj pojkuk ja Mesías. b
-
¿Kʼot maʼ smeranil ja yajni pojki ja Jesús? (Mateo 2:1).
Kʼumanik ja Salmo 34:20 sok Zacarías 12:10 bʼa yiljel jujuntik jas alubʼalxakan sbʼaja xchamelal ja Mesías.
-
¿Kʼot maʼ smeranil ja jastik it? (Juan 19:33-37).
-
¿Wan maʼ xa kʼuʼan ke ay jas skʼulan ja Jesús bʼa oj kʼot junuk ja jas alubʼalxakani?
-
¿Jas wa sjeʼawi bʼa Jesús spetsanil ja jastik it?
6. Snajel sbʼaj ja Jesús wa xyaʼa slekil
Ja Biblia wa sjeʼa ja stʼilanil snebʼjel sbʼaja Jesús sok ja cholal akʼubʼalyi yuja Dyos. Kʼumanik ja Juan 14:6 sok 17:3, sok loʼilananik sbʼaja jas ti nochani:
-
¿Jas yuj jel tʼilan oj jnatik sbʼaj ja Jesús?
Ja Jesús sjama ja bʼej bʼa oj kamigoʼuktik ja Dyos sok sjeʼa ja smeranil sbʼaja Jyoba. Cha ojni bʼobʼ jtatik ja sakʼanil bʼa tolabida yuj yeʼna.
JA JAS WA XYALAWE JUJUNTIK: «Ja testigoʼik bʼa Jyoba mi skʼuʼane bʼa Jesús».
-
¿Jas oja wale?
JA JASA NEBʼA
Ja Jesús jun anjel ay yip, ja Yunin ja Dyos sok ja Mesías.
Yajel juljkʼujoltik
-
¿Jas yuj ja Jesús wa sbʼiʼilan «ja bʼajtan uninal bʼa yibʼanal ja kʼulbʼeniki»?
-
¿Jas wa skʼulan ja Jesús bʼajtanto oj jak ja bʼa Luʼum?
-
¿Jastal wa xnaʼatik ke yeʼn ja Mesías?
LEʼA TUK JASTIK
Naʼa mas rasonik bʼa wa sjeʼa ke ja Jesús yeʼn ja Mesías.
Ila ta ja Biblia wa sjeʼa ke ja Dyos ya ajyuk ja Jesús jastal wa xyawe ajyuk yuntikile ja kristyano.
«¿Jas yuj wa x-aji sbʼiʼiluk ja Jesús ja Yunin Dyos?» (Artikuloʼik bʼa jw.org)
Ila jas yuj ja oxe dyos staʼunej sbʼaj mi jun sjejeluk bʼa Biblia.
«Ja Jesús: ¿kʼotel maʼ Dyos?» (Ja Juʼun Cholumani, 1 bʼa abril bʼa 2009)
Ila jastal tukbʼi ja sakʼanil jun ixuk tsaʼan yajni spaklay ja jas wa xyala ja Biblia sbʼaja Jesús.
«Jun ixuk judía wa xcholo jas yuj kʼe spaklay ja skʼuʼajel yiʼoji» (¡Kʼeʼan!, mayo bʼa 2013)
a Ja sjejelik 26 sok 27 wa xcholo jas yuj ja kristyano wa skʼana skoltajele sok jastal wa skoltayotik ja Jesús.
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
