SJEJEL 17
¿Jas tikʼe kristyano waj ja Jesús?
Yajni wantik snebʼjel ja jas yala sok skʼulan ja Jesús ja bʼa Luʼum, jnaʼatik modoʼalik yiʼoj bʼa wa xkʼana oj kamigoʼuktik sok cha jachuk ja sTat, ja Jyoba. ¿Jastik junuk ja modoʼalik jaw jel xpaywani? ¿Sok jasa oj jkʼuluktik bʼa oj jlajtik ja Jesús?
1. ¿Bʼa jasa wa slaja sbʼaj Ja Jesús soka sTat?
Ja Jesús ayxa mil miyonik jabʼil ti ajyel bʼa satkʼinal wan yiljel ja yala Tat jel xyajtani sok snebʼjel bʼa yeʼna. Ja yuj wa spensaran, wa xyabʼ sok wa skʼulan jastal yeʼna (kʼuman ja Juan 5:19). Pes ja Jesús wa xchiktes lek ja smodo ja sTati, bʼa yala: «Ja maʼ yilunejon ja keʼn cha yilunejni ja Tatali» (Juan 14:9). Ja yuj ta anaʼa sbʼaj lek ja Jesús, ojni anaʼ sbʼaj lek ja Jyoba. Jun sjejel ja jastal snaʼa syajulal ja kristyano ja Jesús, xchiktes jastal wa xyabʼ ja Jyoba bʼa weʼna.
2. ¿Jastal sjeʼa ja Jesús wa syajtay ja sTat?
Ja Jesús yala: «Pe bʼa oj snaʼ ja luʼumkʼinal wa xyajta ja Tatali, jachni mero wa xkʼulan jastal yaʼunejki mandar ja Tatali» (Juan 14:31). Yajni ja Jesús ti ajyi bʼa Luʼum sjeʼa jastal jel syajtay ja sTati skʼuʼajelyi asta ja bʼa ekʼeleʼik jel wokoli. Ja Jesús jelni sgusto xcholjel sbʼaja sTat sok skoltajel ja tuk bʼa oj yamigoʼuke ja Dyos (Juan 14:23).
3. ¿Jastal sjeʼunej ja Jesús wa syajtay ja kristyano?
Ja Biblia wa xyala ke ja Jesús ajyiyuj «jun yajtanel jel chaʼanyabʼalil» sbʼaja kristyano (Proverbios 8:31). Sjeʼa ja yajalkʼujol jaw yajni yaʼa kulan skʼujol sok skoltay ja kristyano bʼa mini smajlay oj tupjukyi. Skʼulan milagroʼik bʼa mi kechan sjeʼa ja yip, cha jachuk ja jastal wa snaʼa yajulal (Marcos 1:40-42). Syajtay spetsanil ja kristyano sok mi stsaʼa. Ja jastik yala yayi kulan skʼujol sok yayi jun smajlajel ja matik ayiʼoj jun lekil kʼujolal. Cha puesto ajyi oj yiʼ wokol sok oj chamuk yuja kristyano, ama jel syajtay ja matik wa skʼuʼane ja jastik sjeʼa (kʼuman ja Juan 15:13, 14).
LA JNEBʼTIK MAS
La jnatik lek ja smodoʼik ja Jesús sok la kiltik jastal snochjel ja sjejel bʼa yajal skʼujol sok ja jaman skʼujol.
4. Ja Jesús wa syajtay ja sTat
Soka sjejeli, ja Jesús sjeʼakankitik jastal sjejel wa xyajtaytik ja Dyos. Kʼumanik ja Lucas 6:12 sok Juan 15:10; 17:26. Yajni akʼumanexta kada teksto, loʼilananik sbʼaja jas ti nochani:
-
Yiljel ja bʼa jas skʼulan ja Jesús, ¿jastal oj bʼobʼ jetik wa xyajtaytik ja Jyoba?
Ja Jesús jelni syajtay ja sTat bʼa satkʼinali sok tikʼan yayi orasyon.
5. Ja Jesús cham skʼujol ja matik ay snesesida
Ja Jesús masni chamskʼujol ja tuk yuj yeʼna. Ama yajtik ay, ya makunuk ja styempo sok ja yip bʼa skoltajel ja tuk. Kʼumanik ja Marcos 6:30-44 sok loʼilananik sbʼaja jas ti nochani:
-
¿Jastik modo ja Jesús sjeʼa wa xcham skʼujol ja tuk ja bʼa loʼil it? (Kʼelawik ja bersikuloʼik 31, 34, 41 sok 42).
-
¿Jas yuj ja Jesús skoltay ja kristyanoʼik jaw? (Kʼelawik ja bersikulo 34).
-
Yuja Jesús wa xchiktes ja modoʼal yiʼoj ja sTat, ¿jas wa sjeʼawi spetsanil ja jastik jaw sbʼaja Jyoba?
-
¿Jastik modo oj bʼobʼ jetik wa xcham jkʼujoltik ja tuk jastal skʼulan ja Jesús?
6. Ja Jesús jaman skʼujol
Ja Jesús jaman skʼujol waji ama mey yiʼoj jitsan jastik, sok wa snikawotik jach oj cha jkʼuluktik. Kʼumanik ja Hechos 20:35 sok loʼilananik sbʼaja jas ti nochani:
-
Soka yaljelik bʼa Jesús, ¿jasa wa xya gustoʼaxukotiki?
Kʼelawik ja BIDEO sok loʼilananik sbʼaja jas ti nochani:
-
¿Jastik modo oj bʼobʼ jetik jaman jkʼujoltik ama mey kiʼojtik jitsan?
¿Wan maʼ xa naʼa ajyi?
Ja Biblia wa sjeʼa ke ja korasyontik jani tʼilan oj katikyi ja Jyoba bʼa sbʼiʼil Jesús (kʼumanik ja Juan 16:23, 24). Jachuk wa xjeʼatik chaʼanyabʼal wa xkilatik ja jas skʼulunej ja Jesús bʼa oj skoltayotik yamigoʼajel ja Jyoba.
JA JAS WA XYALAWE JUJUNTIK: «Ja Dyos mi xcham skʼujol ja wa xyiʼaj wokol ja kristyano».
-
Yuja Jesús xchiktes ja smodoʼik ja sTat, ¿jastal wa sjeʼa soka sjejel ke wa xcham skʼujol jmoktik ja Jyoba?
JA JASA NEBʼA
Ja Jesús wa syajtay ja Jyoba sok cha jachuk ja kristyano. Yuja yeʼn oj slajtik jastal ja sTat, yajni masxa naʼa sbʼaj ja Jesús, masni oja naʼ sbʼaj ja Jyoba.
Yajel juljkʼujoltik
-
Yajel tʼabʼan jkʼujoltik ja sjejel bʼa Jesús, ¿jastal oj bʼobʼ jetik wa xyajtaytik ja Jyoba?
-
Yajel tʼabʼan jkʼujoltik ja sjejel bʼa Jesús, ¿jastal oj bʼobʼ jetik wa xyajtaytik ja kristyano?
-
¿Jasa mas waxa kʼulan gusto ja bʼa smodoʼik ja Jesús?
LEʼA TUK JASTIK
Ila jujuntik ja smodo ja Jesús bʼa wani xbʼobʼ jnochtik.
«La jnochtik ja sjejel bʼa Jesús» (Ja Jesús: yeʼn ja bʼej, ja smeranil sok ja sakʼanil, slam 317)
Naʼa ja chaʼan cholal yiʼoj ja Jesús ja bʼa orasyonik.
«¿Jas yuj oj katikyi orasyon bʼa sbʼiʼil ja Jesús?» (Ja Juʼun Cholumani, 1 bʼa Febrero bʼa 2008)
¿Wan maʼ xyala ja Biblia jastal splanta ja Jesús?
¿Jasa wa xnebʼatik bʼa Jesús ja jastal yila ja ixuke?
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
