SJEJEL 18
Ja jastal snajel matik ja meran snochumane Kristo
Jitsan lek miyon kristyano wa xyalawe snochumane Kristo, pe mi spetsaniluke junxta ja skʼuʼajel yiʼoje sok mini ja smodo wa sjeʼawe. Anto, ¿jastal oj bʼobʼ jnatik matik junuk ja meran snochumane Kristo?
1. ¿Matik kʼotele ja meran snochumane Kristo?
Jani kʼotele ja matik meran wa snochowe ja Jesukristo (kʼuman ja Hechos 11:26). ¿Jastal wa sjeʼawe meran wa snochowe? Ja Jesús yala: «Ta mixa jipawexkan ja jastik wa xjeʼa, kʼotelexni mero jnebʼumanik» (Juan 8:31). Ja jaw wa xkʼan yal ke ja meran snochumane Kristo, tʼilan oj skʼuʼuke ja jas sjeʼa ja Jesús. Ja jas wa skʼuʼane ti wa xyawe-el bʼa Biblia, jastalni ja Jesús ti ya el bʼa Yabʼal ja Dyos ja jastik sjeʼa (kʼuman ja Lucas 24:27).
2. ¿Jastal wa sjeʼa wa syajtay sbʼaje?
Ja Jesús yayi ja mandar it ja snebʼumanik: «Yajta abʼajik ja weʼnlexi jastalni jyajtunejex ja keʼn» (Juan 15:12) ¿Jastal sjeʼa ja Jesús ke wa syajtay ja snebʼumaniki? Spilayile tyempo, stsatsankʼujolan sok skoltay asta yaʼa ja sakʼanil yuj yeʼnle (1 Juan 3:16). Jastalni ja Jesús, ja meran snochumane Kristo mini kechan wa staʼawe tiʼal ja yajalkʼujoli; wani sjeʼawe bʼa kada jujune soka jas wa xyalawe soka jas wa skʼulane.
3. ¿Jasa aʼtel mas tʼilan wa skʼulane?
Ja Jesús yayi jun yaʼtele ja snebʼumanik: «Sjeka bʼa oj xchol-e ja sGobyerno ja Dyosi» (Lucas 9:2). Ja bʼajtan snochuman ja Kristo mi kechan xcholowe ja bʼa lugarik wa stsomo sbʼaje, cha xcholowe ja bʼa wa x-ajyi jitsan kristyano sok ja bʼa snaje (kʼuman ja Hechos 5:42; 17:17). Ja bʼa jtyempotik, ja meran snochumane Kristo cha wa sjeʼawe ja jas wa sjeʼa ja Biblia chikan bʼa wa xtax ja kristyano. Yuja wa syajtaye ja smoje, gustoxta wa xyawe makunuk ja styempoʼe sok ja yipe bʼa xcholjel ja smajlajel sok ja kulan kʼujolal wa xyaʼa ja Biblia (Marcos 12:31).
LA JNEBʼTIK MAS
La kiltik jasa stukil ja meran snochumane Kristo sok ja tuk kristyano mi snochowe ja sjejel cha mini ja jas sjeʼa ja Jesús.
4. Wa sleʼawe ja smeranil bʼa Biblia
Ja bʼajtan snochumane Kristo snaʼawe ja janekʼto chaʼanyabʼalil ja Yabʼal ja Dyosi.
Mi spetsanil ja matik wa xyala snochumane Kristo wa xyilawe stʼilanil ja jastik meran wa sjeʼa ja Biblia. Kʼelawik ja BIDEO sok loʼilananik sbʼaja jas ti nochani:
-
Jujuntik iglesya wa sbʼiʼilane snochumane Kristo sleʼawe modo stimjel ja kristyano bʼa mok snaʼe ja jastik sjeʼa ja Jesús. ¿Bʼa jastik modo?
Ja Jesús sjeʼa ja smeranil yiʼoj ja Yabʼal ja Dyos. Kʼumanik ja Juan 18:37 sok loʼilananik sbʼaja jas ti nochani:
-
Jastalni yala ja Jesús, ¿jastal oj bʼobʼ naxuk matik junuk ja meran snochumane Kristo teye «bʼa sparte ja smeranili»?
5. Wa xcholowe ja smeranil bʼa Biblia
Ja bʼajtan snochumane Kristo xcholowe.
Bʼajtanto oj waj bʼa satkʼinal ja Jesús, yayi jun yaʼtele ja snebʼumanik bʼa wanto kʼulaxel man jtyempotik. Kʼumanik ja Mateo 28:19, 20 sok Hechos 1:8, sok loʼilananik sbʼaja jas ti nochani:
-
¿Janekʼto tyempo sok bʼa masan oj kʼotuk ja xcholjel?
6. Wa xcholowe soka sjejeli
Jun winik sbʼiʼil Tom, ¿jas yuj seguroni ay ke staʼatani ja meran snochumane Kristo? Kʼelawik ja BIDEO sok loʼilananik sbʼaja jas ti nochani:
-
¿Jas yuj ja Tom aji-el sgana yuja relijyon?
-
¿Jas yuj ja Tom skʼuʼunej lek ke staʼatani ja smeranil?
Ja yaljeliki wa xjexi soka jas wa xkʼulaxi. Kʼumanik ja Mateo 7:21 sok loʼilananik sbʼaja jas ti nochani:
-
¿Jasa mas tʼilan bʼa Jesús: ja maʼ jas wa xkalatik wa xkʼuʼantik, ma jaʼa jas wa xjeʼatik yuja wa xkʼulantik?
7. Wa syajtay sbʼaje
Ja bʼajtan snochumane Kristo syajtay sbʼaje.
¿Puesto maʼ ajyele ama ti xmiljiye ja snochumane Kristo yuj skoltajel ja yermanoʼe? Kʼelawik ja BIDEO sok loʼilananik sbʼaja jas ti nochani:
-
¿Jasa nikji ja hermano Lloyd bʼa skoltajel ja hermano Johansson ama ti xmilji?
-
¿Wan maʼ xa kʼuʼan ke kʼotelni jun meran snochuman Kristo?
Kʼumanik ja Juan 13:34, 35 sok loʼilananik sbʼaja jas ti nochani:
-
Sbʼaja snebʼuman ja Jesús, ja meran snochumane Kristo, ¿jastal tʼilan oj yil-e ja kristyano bʼa tuk rasa ma bʼa pilan chonabʼ?
-
¿Jastal oj bʼobʼyujile ja bʼa tyempoʼik ay guerra?
JA JAS WA XYALAWE JUJUNTIK: «Chikan jas relijyon bʼayaʼa, ja mas tʼilani jani ta waxa kʼuʼan ja Jesukristo».
-
¿Jas teksto oja kʼumuk bʼa oja jeʼ ja meran snochumane Kristo?
JA JASA NEBʼA
Ja meran nochumanik wa xyiʼaje ja jas wa sjeʼa ja Biblia, puesto aye bʼa oj xchʼak sbʼaje yuja wa syajtaye ja tuk sok xcholjel ja smeranil bʼa Biblia.
Yajel juljkʼujoltik
-
¿Bʼa wa xyawe eluk ja skʼuʼajel yiʼoje ja meran nochumanik?
-
¿Jas modoʼal wa xchiktese ja meran nochumanik?
-
¿Sok jasa aʼtel wa skʼulane?
LEʼA TUK JASTIK
Naʼa sbʼaj lek jun tsome bʼa wa skʼujolane snochjel ja sjejel soka jas skʼulan ja Jesukristo.
Kʼuman jastal jun monja staʼa «jun meran pamilya bʼa wa xyaʼteltaye ja Dyos».
Ila jastal ja meran snochumane Kristo wa sjeʼaweyi yajalkʼujol ja yermanoʼe yajni ay snesesidaʼe.
Wa xkoltaytikon ja kermanotikon yajni wa x-ekʼ jun desgrasya (xetʼan) (3:57)
Ja Jesús xchiktes jastal ja snochumanik. Ja bʼa jtyempotiki, ila jastal ja meran nochumanik bʼa Kristo jani wa skʼulane ja jastik jun skʼulane ja bʼajtan nochumanik.
«¿Jasa wa xchiktes ja meran nochumanik bʼa Kristo?» (Ja Juʼun Cholumani, 1 bʼa marzo bʼa 2012)
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
