SJEJEL 19
¿Meran maʼ snochumane Kristo ja Testigoʼik?
Ja testigoʼotikon bʼa Jyoba wa xkʼuʼantikon meran snochumanotikon Kristo. ¿Jas yuj? La jpaklaytik ja skujlayubʼil ja jas wa xkʼuʼantikon, ja bʼiʼilal wa sjeʼa tukotikon sok jas tikʼe yajalkʼujol wa xjeʼa jbʼajtikon.
1. ¿Bʼa wa xyawe eluk ja skʼuʼajel yiʼoje ja Testigoʼik?
Ja Jesús yala yabʼ ja Dyos: «Jawa wabʼali jani ja smeranili» (Juan 17:17). Ja testigoʼotikon jaʼ wa xkʼulantikon ja jas skʼulan ja Jesús: tolabida ti wa xkatikon el bʼa Yabʼal ja Dyos ja jas wa xkʼuʼantikon. Ila ja jastal kʼejan ja testigoʼik bʼa Jyoba ja bʼa jtyempotik. Ja bʼa jabʼilikjan 1870, jun tsome paklanum bʼa Biblia, kʼe spaklaye ja Yabʼal ja Dyos jaʼankʼujol lek. Ti yawe-el bʼa Biblia ja skʼuʼajel yiʼoje, ama ja skʼuʼajelik jaw kontra ay soka jas wa sjeʼa ja iglesyaʼik sok tsaʼan kʼe xchol-e yabʼ ja tuk ja smeranil bʼa Biblia staʼuneje. a
2. ¿Jas yuj jbʼiʼiltikon testigoʼik bʼa Jyoba?
Ja Jyoba wa xyala ke ja matik wa x-aʼteltajiyuji kʼotel stestigoʼik yujni wa xyalawe ja smeranil bʼa yeʼn (Hebreos 11:4-12:1). Jun sjejel, ja bʼa najate, yalyabʼ ja xchonabʼ: «Weʼnlex ja jtestigoʼik» (kʼuman ja Isaías 43:10). Jaxa Jesús wa sbʼiʼilan «ja Tojil Testigo» (Apocalipsis 1:5). Ja yuj ja bʼa 1931, jtsaʼatikon ja bʼiʼilal testigoʼik bʼa Jyoba. Jel jgustotikon yuja kiʼojtikon ja bʼiʼilal jaw.
3. ¿Jastal wa snochowe ja Testigoʼik ja syajal skʼujol ja Jesús?
Ja Jesús jel syajtay ja snebʼumanik bʼa kʼotyeni jastal spamilya (kʼuman ja Marcos 3:35). Ja testigoʼotikon cha tsomani aytikon, kʼotelotikon jun pamilya bʼa sutanal ja luʼum. Ja yuj wa xkʼuman jbʼajtikon ‹hermano› sok ‹hermana› (Filemón 1, 2). Cha wa xkʼuʼantikon ja mandar it: «Yajtayik spetsanil ja hermanoʼiki» (1 Pedro 2:17) Ja testigoʼotikon wa xjeʼatikon bʼa jitsan modo ja yajalkʼujol jaw. June, jani skoltajel ja hermanoʼik bʼa sutanal ja luʼum yajni wa x-ekʼ sbʼaje wokol.
LA JNEBʼTIK MAS
La jnatik sbʼaj mas ja testigoʼik bʼa Jyoba sok la kiltik mas preba bʼa kʼotelotikon meran snochuman Kristo.
Ja jas wa skʼuʼane ja meran snochumane Kristo ti elel bʼa Biblia sok wa xcholowe yabʼ ja tuk.
4. Ja jas wa xkʼuʼantikon ti elel bʼa Biblia
Ja Jyoba yalakan ke ja smeranil bʼa Biblia oj kʼot abʼxuk mas stojol. Kʼumanik ja Daniel 12:4 sok loʼilananik sbʼaja jas ti nochani:
-
¿Jasa oj ‹pojxuk el› yajni wane spaklajel ja Biblia ja yaʼtijumik Dyos?
Ila jastal wa spaklaye ja Yabʼal ja Dyos jun tsome paklanum bʼa Biblia, bʼa tey ja Charles Russell. Kʼelawik ja BIDEO sok loʼilananik sbʼaja jas ti nochani:
-
¿Jastal wa spaklaye ja Yabʼal ja Dyos ja Charles Russell sok ja tuk paklanumik bʼa Biblia?
¿Wan maʼ xa naʼa ajyi?
Ay ekʼele, jtukbʼusnejtikon jujuntik ja jas wa xkʼuʼantikon. ¿Jas yuj? Yujni ja Dyos takal takal wa xyaʼakan oj kabʼtik stojol ja Yabʼali, jastalni ja wa x-elkʼen ja Kʼaʼuj takal takal wa xya kiltik ja jastik junuk (kʼumanik ja Proverbios 4:18). Ja yuj, ama ja Biblia mi xtukbʼi, pe yajni mas wa xkabʼtikon stojol wa xtukbʼestikon ja jas wa xkʼuʼantikon.
5. Wa xcholotikon ja smeranil bʼa Jyoba
¿Jas yuj jtsaʼatikon oj jbʼiʼiluktikon testigoʼik bʼa Jyoba? Kʼelawik ja BIDEO sok loʼilananik sbʼaja jas ti nochani:
-
¿Jas yuj sbʼejni ja bʼiʼilal testigoʼik bʼa Jyoba?
¿Jas yuj ja Jyoba stsaʼunej kristyanoʼik bʼa oj kʼotuke stestigoʼik? Yuja alubʼal jitsan abʼalik bʼa yeʼna, ja kristyanoʼik jaw ojni yal-e ja jas meran bʼa Jyoba, ja Dyos smeranil. La jpaklaytik jujuntik ja abʼalik jaw.
Jujuntik relijyon wa sjeʼa ke ja Dyos wa skʼana oj axuk makunuk imajenik bʼa stoyjel. Pe ¿meran maʼ? Kʼumanik ja Levítico 26:1 sok loʼilananik sbʼaja jas ti nochani:
-
Jastalni wa xyala ja bersikulo it, ¿jas wa spensaraʼan ja Dyos sbʼaja imajenik?
Jujuntik olomal bʼa relijyon wa sjeʼawe ke ja Jesús yeʼn Dyos. Pe ¿meran maʼ? Kʼumanik ja Juan 20:17 sok loʼilananik sbʼaja jas ti nochani:
-
Jastalni wa xyala ja bersikulo it, ¿june ita maʼ kʼotele ja Dyos soka Jesús?
-
¿Jastal waxa wabʼ snajel ke ja Jyoba sjekunej ja stestigoʼik bʼa sjejel ja smeranil bʼa yeʼn sok ja bʼa Yunin?
6. Wa xyajtay jbʼajtikon
Ja Biblia wa xya slaj ja nochumanik bʼa tuktukil parte ja skuerpo jun kristyano. Kʼumanik ja 1 Corintios 12:25, 26 sok loʼilananik sbʼaja jas ti nochani:
-
¿Jas wa xmajlaxi oj skʼuluke ja meran nochumanik yajni ja tuk nochumanik wane yijel wokol?
-
Jastalni awilunej, ¿jastal wa syajtay sbʼaje ja Testigoʼik?
Yajni ja Testigoʼik bʼa jun lugar wa xyiʼaje wokol, ja yermanoʼe bʼa sutanal ja luʼum wego ay jas wa skʼulane. Bʼa snajel june ja jaw, kʼelawik ja BIDEO. Tsaʼan loʼilananik sbʼaja jas ti nochani:
-
¿Oj maʼ awal ke ja koltanel wa skʼulane ja Testigoʼik juni sjejel bʼa yajalkʼujol? ¿Jas yuj?
Ja meran snochumane Kristo wa sjeʼaweyi yajalkʼujol ja matik wa skʼana skoltajele.
JA JAS WA XYALAWE JUJUNTIK: «Ja testigoʼik bʼa Jyoba jun ajkʼach relijyon».
-
¿Jas tyempo ja Jyoba kʼe skʼumuk «testigoʼik» ja matik wa x-aʼteltajiyuj?
JA JASA NEBʼA
Ja Testigoʼiki meran snochumane Kristo. Kʼotele jun pamilya bʼa sutanal ja luʼum bʼa wa xyaweyi stoyjel ja Dyos, ja jas wa skʼuʼane ti elel bʼa Biblia sok wa xyalawe ja smeranil sbʼaja Jyoba.
Yajel juljkʼujoltik
-
¿Jas yuj jtsaʼatikon oj jbʼiʼiluktikon testigoʼik bʼa Jyoba?
-
¿Jastal wa xjeʼatikon wa xyajtay jbʼajtikon?
-
¿Wan maʼ xa kʼuʼan ke ja Testigoʼik meran snochumane Kristo?
LEʼA TUK JASTIK
Ila june ja bʼa sjejel mi meranuk xchiktesneje ja testigoʼik bʼa Jyoba.
Taʼa ja sjakʼjel ja bʼa sjobʼjel bʼobʼta aya wiʼoj sbʼaja testigoʼik bʼa Jyoba.
«Sjobʼjelik mas tikʼanik wa x-axi sbʼaja taʼumantiʼik bʼa Jyoba» (Ja bʼa jw.org)
Yuja ilkʼujoli iji ja Stephen bʼa skʼulajel chaʼanik mulal. Ila jasa yila ja bʼa Testigoʼik bʼa skʼana stukbʼesel ja sakʼanil.
«Ja jsakʼanil wanxtani jomel» (Artikulo bʼa Ja Juʼun Cholumani)
a Ja Juʼun Cholumani, bʼa jani ja juʼuntikon wa x-el bʼa kada ixaw, man 1879 mini kʼoteluk timan axel eluk.
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
