Ja Jesús sjeʼa tʼilan oj kitik jaʼ bʼa oj kʼotkotik snochuman (kʼuman ja Mateo 28:19, 20). Pe ¿jasunkiluk ja yijel jaʼ? ¿Sok jas oj skʼul june bʼa oj lajxukyuj?

1. ¿Jasunkiluk ja yijel jaʼ?

Ja yaljel bautizar ti eleljan bʼa jun yaljel bʼa kʼumal griego ke wa stojolan «smuljelkoʼ» bʼa yoj jaʼ. Yajni ja Jesús yiʼaj jaʼ, muljikoʼ bʼa yok jaʼ Jordán, sok tixa «elkʼen ja bʼa jaʼi» (Marcos 1:9, 10). Yajni wa xyiʼaje jaʼ ja meran snochuman Kristo, cha wa xmuljikoʼ ja skuerpoʼe.

2. ¿Jasa wa sjeʼa yajni june wa xyiʼaj jaʼ?

Yajni june wa xyiʼaj jaʼ, wa sjeʼa ke yatayi ja sakʼanil ja Jyoba. ¿Jas oj skʼuluk bʼa oj yayi ja sakʼanil ja Jyoba? Tʼilan oj yayi jun orasyon ja Dyos bʼa yaljel yabʼ ke wa skʼana oj yaʼteltay bʼa tolabida. Ja it wa skʼulan bʼajtanto oj yiʼ jaʼ. Ja bʼa orasyon jaw, wa skʼapa kechanta jaʼ oj yaʼteltay ja Jyoba sok ja mas tʼilan ja bʼa sakʼanili jani skʼulajel ja jas wa skʼana. Cha wa stsaʼa snochjel ja sjejel bʼa Jesús sok ja jas sjeʼa, ja maʼ yala: «Ta ay maʼ wa skʼana oj snochon, mokxa ajyuk sakʼan bʼa yeʼna, [...] sok a-snochon» (Mateo 16:24). Stsʼakatal ja yajel ja sakʼanil sok ja yijel jaʼi, ja kristyano jaw wani xbʼobʼ yamigoʼuk ja Jyoba sok ja matik wa xyaweyi stoyjel.

3. ¿Jasa skʼulajel bʼa yijel jaʼ?

Ta waxa kʼana oja wiʼ jaʼ, bʼajtan oja nebʼ sbʼaja Jyoba sok yajel ajyuk skʼuʼajel bʼa yeʼn (kʼuman ja Hebreos 11:6). Yajni x-ajyiwuj mas snajel sok skʼuʼajel, masni oja yajtay. Ja jaw oj snika bʼa oja kʼan xcholjel sok yijel jawa sakʼanil jastal wa xyala ja Biblia (2 Timoteo 4:2; 1 Juan 5:3). Yajni june wa xyiʼaj ja sakʼanil «bʼa jun modo oj yayi stoyjel ja Jyoba», anto bʼobʼta oj stsaʼ oj yayi ja sakʼanil ja Dyos sok yijel jaʼ (Colosenses 1:9, 10). a

 LA JNEBʼTIK MAS

4. Ja jas wa sjeʼakitik ja yiʼaj jaʼ ja Jesús

Bʼa snajel mas sbʼaja yiʼaj jaʼ ja Jesús, kʼumanik ja Mateo 3:13-17. Tsaʼan loʼilananik sbʼaja jas ti nochani:

• ¿Junto maʼ yal alats ja Jesús ja yiʼaj jaʼi?

• ¿Kechanta maʼ yawe poxuk tʼusan ja bʼa yolomi? Anto, ¿jastal yiʼaj jaʼ?

Yajni yiʼaj jaʼ ja Jesús, kʼe skʼuluk ja aʼtel jel chaʼanyabʼal ajiyi yuja Dyos. Kʼumanik ja Lucas 3:21-23 sok Juan 6:38, sok loʼilananik sbʼaja jas ti nochani:

• Yajni yiʼajta jaʼ ja Jesús, ¿jas aʼtel yayi mas stʼilanil?

5. Ja yijel jaʼ ojni bʼobʼ lajxukawuj

Spensarajel yajelyi jawa sakʼanil ja Dyos sok yijel jaʼ bʼobʼta oj ya ochuka xiwel. Pe ta mixa waʼakan snebʼjel mas bʼa Jyoba sok anaʼa sbʼaj mas, ojni skoltaya stsajel skʼulajel mas tsaʼan. Bʼa snajel sbʼaj jujuntik kristyano bʼa lajxiyujile, kʼelawik ja BIDEO.

Kʼumanik ja Juan 17:3 sok Santiago 1:5, sok loʼilananik sbʼaja jas ti nochani:

• ¿Jasa oj bʼobʼ koltajuk june bʼa chapan oj ajyuk bʼa yijel jaʼ?

1. Wa xkatikyi ja jsakʼaniltik ja Jyoba yajni wa xkalatik yabʼ oj kaʼteltaytik tolabida.

2. Yajni wa xkiʼajtik jaʼ, wa xjeʼatikyi ja tuk ke katiktayi ja jsakʼaniltik ja Jyoba.

 6. Yajni june wa xyiʼaj jaʼ tixa wa x-ajyi bʼa spamilya ja Jyoba

Yajni wa xkiʼajtik jaʼ, tixa wala ajyitik bʼa jun pamilya tsoman sok bʼa sutanal ja luʼum. Chikan bʼa jakelotik ma jas ekʼel jbʼajtik, junxta ja jkʼuʼajeltik sok wa xkiʼajtik ja jas wa xyala ja Biblia. Kʼumanik ja Salmo 25:14 sok 1 Pedro 2:17, sok loʼilananik sbʼaja jas ti nochani:

• Jastalni yala ja bersikuloʼiki, ¿jas slekilal wa xkilatik ja yijel jaʼ?

 JA JASA NEBʼA

Ja Jesús yala tʼilan oj kitik jaʼ bʼa oj kʼotkotik snochuman. Pe bʼa oj lajxuk, tʼilan yajel tsatsbʼuk ja skʼuʼajel kiʼojtik bʼa Jyoba, snochjel ja jastik yaʼunejkan kulan sok yajelyi ja jsakʼaniltik.

Yajel juljkʼujoltik

• ¿Jasunkiluk ja yijel jaʼ, sok jas yuj jel tʼilan?

• ¿Jasa wa xchiktes ja yijel jaʼ?

• ¿Jas oj skʼul june bʼajtanto oj yaʼ ja sakʼanil sok oj yiʼ jaʼ?