SJEJEL 24
¿Jas wa xyala ja Biblia sbʼaja anjelik?
Ja Jyoba wa skʼana ke oj jnatik sbʼaj ja spamilya yiʼoj bʼa satkʼinal. Ja bʼa spamilya jaw tey ja anjelik, cha naʼubʼal sbʼaje jastal «yuntikil ja Dyosi» (Job 38:7). ¿Jasa wa sjeʼa ja Biblia sbʼaja anjelik? ¿Jastik wa skʼulane? ¿Yibʼanal maʼ ja anjelik kʼotel spamilya ja Dyos?
1. ¿Jastal kʼotele ja anjelik?
Bʼajtanto oj skʼuluk ja Luʼum, ja Jyoba skʼulan ja anjelik. Jachuke jastal yeʼn, mi xbʼobʼ kiltike sok teye bʼa satkʼinal (Hebreos 1:14). Ay miyonik anjel sok tuktukile (Apocalipsis 5:11). Ja yeʼnle wa skʼulane ja jas wa xyala ja Jyoba sok ja smandarik (Salmo 103:20). Ja bʼa najate, ay ekʼele ja Jyoba sjeka anjelik bʼa oj yawe ekʼuk ja srasonik, skoltajel sok yajel el libre ja xchonabʼ. Ja bʼa jtyempotik, wa stojowe ja snochumanik Kristo bʼa oj staʼe ja matik wa skʼana oj snaʼe sbʼaj mas ja Dyos.
2. ¿Machunuk ja Satanás sok ja spukujik?
Jujuntik anjel mixa toj ajyiye soka Jyoba. Ja maʼ bʼajtan skʼulani jaʼa «maʼ wa x-aji sbʼiʼiluk Dyablo sok Satanás, bʼa wan sloʼlajel yibʼanal ja swinkil ja luʼumi» (Apocalipsis 12:9). Ja Satanás skʼana oj ya mandar ja tuk. Ja yuj sloʼlay ja bʼajtan kristyano sok tsaʼan asta tuk anjelik bʼa oj cha skʼok-e abʼal. Ja anjelik jaw wa sbʼiʼilane pukujik. Aji eluke ja bʼa satkʼinal sok jipjiyekon bʼa Luʼum yuja Jyoba, sok oj chʼayjuk snajele (kʼuman ja Apocalipsis 12:9, 12).
3. ¿Jastal wa sleʼa oj sloʼlayotike ja Satanás sok ja spukujik?
Ja Satanás sok ja pukujik wa sloʼlaye jitsan kristyano bʼa jaʼ wa xyawe makunuk ja aʼtel sok pukuj bʼa jelni xiwela sbʼaj. Jun sjejel, jujuntik wa skʼumane ja horóscopo sok tuk wa sleʼawe ja pakla kʼanalik, ja kʼintanumik, ja ajnanumik sok ja brujoʼik. Ayni tuk wa sleʼawe anik ke ti chʼikan ja aʼtel sok pukuj. Sok jujuntik wa x-aji skʼuʼuk wa xbʼobʼ loʼilanuke soka chamwinik. Pe ja Jyoba wa xyala kabʼtik: «Moka leʼex ja espiritistaʼiki cha moka leʼex ja kʼintanumiki» (Levítico 19:31). Ja Jyoba wa xyalakabʼtik bʼa mi oj yixtalaʼukotik ja Satanás soka spukuj, yujni kʼotel skontraʼik sok wa skʼana oj syajbʼesotike.
LA JNEBʼTIK MAS
La jnebʼtik ja jastik lek wa skʼulane ja anjelik, ja jastik xiwela sbʼaj ja aʼtel sok pukuj. Sok jastal mi oj yixtalaʼukotik ja Satanás sok ja pukujik.
4. Ja anjelik wa skoltaye ja kristyano bʼa oj snaʼe sbʼaj ja Jyoba
Ja yanjelik ja Dyos mi yeʼn wa xcholowe. Pe wani stojowe ja yaʼtijumik ja Dyos bʼa oj staʼe ja matik wa skʼanawe oj snaʼe sbʼaj ja Jyoba. Kʼumanik ja Apocalipsis 14:6, 7 sok loʼilananik sbʼaja jas ti nochani:
-
¿Jas yuj wa xkʼanatik ke ja anjelik oj skoltayotike ja bʼa xcholjel?
-
¿Wan maʼ xya gustoʼaxan snajel ke ja anjelik oj bʼobʼ stoja bʼa oja taʼ ja matik wa skʼana oj smaklaye bʼa Biblia? ¿Jas yuj?
5. Mok jasa kʼuluk bʼa ti chʼikan ja aʼtel sok pukuj
Ja Satanás sok ja pukujik skontraʼe ja Jyoba sok cha skontraʼotike. Kʼumanik ja Lucas 9:38-42 sok loʼilananik sbʼaja jas ti nochani:
-
¿Jas wa xkʼulajiyi ja kristyano yuja pukujik?
Mi xkʼanatik ke ja pukujiki oj ochuke ja bʼa jsakʼaniltik. Kʼumanik ja Deuteronomio 18:10-12 sok loʼilananik sbʼaja jas ti nochani:
-
¿Jastik modo wa sleʼawe ja pukujik oj ochuke ja bʼa jsakʼaniltik sok oj skʼumukotike? ¿Jastik junuk ti chʼikan ja aʼtel sok pukuj ja bʼa wa lugar?
-
¿Ay maʼ sbʼej ja wa xyala ja Dyos mok jas jkʼuluktik bʼa ti chʼikan ja aʼtel sok pukuj? ¿Jas yuj?
Kʼelawik ja BIDEO sok loʼilananik sbʼaja jas ti nochani:
-
¿Wan maʼ xa kʼuʼan ke ja jas slapunej ja yalats ja Palesa xiwelani sbʼaj? ¿Jas yuj?
-
¿Jasa skʼulan ja Palesa bʼa mixa oj ixtalajuk yuja pukujik?
Ja meran snochumane Kristo tolabida skontraʼanuneje ja pukujik. Kʼumanik ja Hechos 19:19 sok 1 Corintios 10:21, sok loʼilananik sbʼaja jas ti nochani:
-
¿Jas yuj tʼilan oja chʼaysnajel ja jastika bʼaj ke ti chʼikan ja aʼtel sok pukuj?
6. Kʼulan ganar ja Satanás sok ja spukujik
Ja pukujik jaʼ wa x-ajiye mandar yuja Satanás. Jaxa anjelik toji jaʼ wa xtojiye yuja arcángel Miguel, ja pilan sbʼiʼil ja Jesús. ¿Janekʼ yip yiʼoj ja Miguel? Kʼumanik ja Apocalipsis 12:7-9 sok loʼilananik sbʼaja jas ti nochani:
-
¿Machʼa mas ay yipe: ja Miguel sok ja yanjelik, ma jaʼa Satanás soka spukujik?
-
¿Wan maʼ xa kʼuʼan ke ja snochumane Kristo sbʼej oj xiwuke yuja Satanás soka spukujik?
Ojni bʼobʼa kʼul ganar ja Satanás sok ja spukujik. Kʼumanik ja Santiago 4:7 sok loʼilananik sbʼaja jas ti nochani:
-
¿Jas oja kʼuluk bʼa mi oj yixtalana ja Satanás sok ja pukujik?
JA JAS WA XYALAWE JUJUNTIK: «Mey smaloʼil ja tajnel ma skʼeljel pelikulaʼik ti chʼikan soka magia ma ja bʼa ayto jas wa xkan sakʼan. Kechanta yajel ekʼ gustoʼil».
-
¿Jas yuj jel xiwela sbʼaj spensarajel jachuk?
JA JASA NEBʼA
Ja anjelik toji wa skoltayotike. Ja Satanás soka spukujik skontraʼe ja Jyoba, sok jaʼ wa sloʼlaye ja kristyano ja bʼa aʼtel sok pukuj.
Yajel juljkʼujoltik
-
¿Jas wa skʼulane ja anjelik toj bʼa oj snaʼe sbʼaj ja Jyoba ja kristyano?
-
¿Machunkiluk ja Satanás sok ja spukujik?
-
¿Jas yuj mini lekuk ja slejel chikan jas aʼtel sok pukujik?
LEʼA TUK JASTIK
Ila jas yuj ja Jesús yeʼn ja arcángel Miguel.
Kʼuman jas prebaʼik ay ke mi kechan jun senyaʼuk bʼa malo ja Dyablo.
Ila jasa skʼulan jun ixuk bʼa mixa oj ixtalajuk yuja pukujik.
«Staʼa stojolil ja sakʼanili» (Ja Juʼun Cholumani, 1 bʼa julio bʼa 1993)
Naʼa jastal wa sloʼlay ja Satanás ja kristyano ja aʼtel sok pukuj.
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
