SJEJEL 26
¿Jas yuj jel ja maloʼil sok ja wokol?
Yajni wa x-ekʼ jun desgrasya, jitsan wa sjobʼo sbʼaje: «¿Jas yuj?». Jelni xlikiki snajel ke ja Biblia wa xyayi sjakʼjel ja sjobʼjel jaw.
1. ¿Jasa skʼulan ja Satanás bʼa oj ya ochuk ja maloʼil?
Ja Satanás, ja Dyablo, och skontraʼuk ja Dyos. Yuja wa skʼana oj ya ajyuk bʼa yibʼ skʼabʼ ja tuk, ja yuj snika skʼujol ja Adán sok ja Eva, oj cha skʼokeyi ja smandar ja Dyos. Sok bʼobʼniyuj yaljel yabʼ jun abʼal ja Eva (Génesis 3:1-5). Ya skʼuʼuk ja Eva ke ja Jyoba mi skʼana oj ajyukyuj bʼa jas lek. Bʼa wani yaljel ke ja kristyano mas gusto oj ajyuke ta skʼokoweyi ja smandar ja Dyos. Yajni yala yabʼ ja Eva ke mi oj chamuk, jani wan yaljel ja bʼajtan abʼal. Ja yuj ja Biblia wa xyala ke ja yeʼn «jun leʼa abʼal sok yeʼnani ja statalil ja abʼali» (Juan 8:44).
2. ¿Jasa stsaʼawe ja Adán sok ja Eva?
Ja Jyoba jelni jaman skʼujol waj soka Adán sok ja Eva. Yala yabʼye ke oj bʼobʼ sloʼe chikan jas sat teʼ ja bʼa tsamal lugar bʼa Edén pe miyuk june (Génesis 2:15-17). Pe stsaʼaweni slojel. Ja Eva «syama ja tekʼuli sok sloʼo». Sok tsaʼan, ja Adán «cha sloʼoniʼa» (Génesis 3:6). Ja yuj xchawanile skʼokoweyi ja smandar ja Dyos. Yuja kʼulajiyesok mini jun mulal, jelni pasil oj skʼuluke ja bʼa toj. Yajni gana skʼokoweyi ja smandar ja Dyos, koʼye mulal sok mixani skʼanawe oj kʼulajukeyuj mandar. Ja jaw jelni ijijanyile wokol (Génesis 3:16-19).
3. ¿Jasa yiʼajankitik ja jas stsaʼawe?
Yajni ja Adán sok ja Eva sleʼa smule, paxye mulanume. Yuja jaw yawe ekanyile ja mulal spetsanil ja yintile. Pe sbʼaja Adán, ja Biblia wa xyala: «Yuj kechanta jun winik, ja mulali och ja bʼa luʼumkʼinali sok jaxa mulali yiʼajan ja chamelali, sok jach spuku sbʼaj ja chamelal bʼa yibʼanal ja kristyanoʼi» (Romanos 5:12).
Anto, ¿jas yuj wa xkiʼajtik wokol? Ay ekʼele, yuj wa stsaʼatik jastik mi lekuk. Tuk ekʼele, jani yuja wa stsaʼawe jastik mi lekuk ja tuk. Sok ay ekʼele, yuja teytik bʼa jun lugar sok jun ora mi xmajlaxi (kʼuman ja Eclesiastés 9:11).
LA JNEBʼTIK MAS
La kiltik jas yuj mi xbʼobʼ katik smuluk ja Dyos yuja maloʼil sok ja wokolik, sok ja jastal wa xyabʼ ja yajni wa xyila wa xkiʼajtik wokol.
4. Ja maʼ smul ja jwokoltik
Jitsan wa skʼuʼane ke ja Dyos tey bʼa skʼabʼ ja luʼumkʼinal. Pe ¿meran maʼ? Kʼelawik ja BIDEO.
Kʼumanik ja Santiago 1:13 sok 1 Juan 5:19, sok loʼilananik sbʼaja jas ti nochani:
-
¿Yeʼn maʼ smul ja Dyos ja wokolik sok ja maloʼil?
5. Ja jas wan ekʼel yuja Satanás yeʼn wan mandar
Kʼumanik ja Génesis 3:1-6 sok loʼilananik sbʼaja jas ti nochani:
-
¿Jas abʼal yala ja Satanás? (Kʼelawik ja bersikuloʼik 4 sok 5).
-
¿Jastal yala ja Satanás ke ja Jyoba mi skʼana oj yayi jun jasunuk bʼa lek ja kristyano?
-
Bʼa yeʼn ja Satanás, ¿tʼilan maʼ oj ajuke mandar ja kristyano yuja Jyoba bʼa ajyel gusto?
Kʼumanik ja Eclesiastés 8:9 sok loʼilananik sbʼaja jas ti nochani:
-
¿Jastal wan wajelyuj ja kristyano yuja mi yeʼn wan yajel mandar ja Jyoba?
-
Ja Adán sok ja Eva mey yiʼoje mulal sok ti ajyiye ja bʼa tsamal lugar, pe jaʼ skisawe ja Satanás sok skʼokoweyi ja Jyoba.
-
Ja mulal, ja wokol sok ja chamelal spuku sbʼaj ja bʼa luʼum ja yajni ajyi ja kʼoka abʼali.
-
Ja Jyoba oj xchʼak ja mulal, ja wokol sok ja chamelal. Ja kristyano mixa oj cha ajyukyuj mulal sok oj ajyuke sakʼan ja bʼa Tsamal Lugar.
6. Ja Jyoba yaj xyabʼ ja wa xkiʼajtik wokol
¿Wan maʼ xcham skʼujol ja Dyos ja jwokoltik? Ila ja jas stsʼijbʼan ja rey David sok ja jekabʼanum Pedro. Kʼumanik ja Salmo 31:7 sok 1 Pedro 5:7, sok loʼilananik sbʼaja jas ti nochani:
-
¿Jastal waxa wabʼ ja altantoxta ay ja Jyoba ja bʼa jwokoltik sok ja yaj xyabʼi?
7. Ja Dyos oj xchʼaysnajel spetsanil ja jwokoltik
Kʼumanik ja Isaías 65:17 sok Apocalipsis 21:3, 4, sok loʼilananik sbʼaja jas ti nochani:
-
Ja Jyoba wa skʼapa oj xchʼaysnajel spetsanil ja jas wa xya yiʼ wokol ja kristyano. ¿Wan maʼ xyaʼa kulana kʼujol ja kʼapjelal jaw? ¿Jas yuj?
¿Wan maʼ xa naʼa ajyi?
Soka bʼajtan abʼal sleʼa ja Satanás, yabʼaltay ja Jyoba. Ya kuxbʼuk ja sbʼiʼil ja Jyoba yajni yala ke mi kʼoteluk jun tojil sok jun lekil mandaranum. Jelxani mojan, ja Jyoba oj ya sakbʼuk ja sbʼiʼili yajni xchʼaya snajel ja wokol wa x-ekʼ jbʼajtiki. Bʼa pilan yaljel, ojni sjeʼ ke ja sgobyerno jani mas lek. Ja yajel sakbʼuk ja sbʼiʼil ja Jyoba jani jun jasunuk mas jel tʼilan ja bʼa sutsatkʼinal (Mateo 6:9, 10).
JA JAS WA XYALAWE JUJUNTIK: «Ja Dyosi skʼulanotik bʼa oj kitik wokol».
-
¿Jas oja wale?
JA JASA NEBʼA
Ja Satanás soka bʼajtan chabʼ kristyano yeʼn mero smule ja maloʼil ay ja bʼa luʼumkʼinal. Ja Jyoba jel yaj xyabʼ jawa xyila wa xkiʼajtik wokol sok jelxa mojan oj xchʼaysnajel.
Yajel juljkʼujoltik
-
¿Jas abʼal aljiyabʼ ja Eva yuja Dyablo?
-
¿Jasa yiʼajankitik yuja skʼokowe abʼal ja Adán sok ja Eva?
-
¿Jas yuj wa xkalatik ke ja Jyoba yaj xyabʼ ja wa xkiʼajtik wokol?
LEʼA TUK JASTIK
Nebʼa ja jas wa xcholo ja Biblia sbʼaja mulal.
Kʼuman mas sbʼaja kʼumal ya kʼeʼuk ja Satanás ja bʼa tsamal lugar bʼa Edén.
«¿Jas yuj ja Dyos wanto yajelkan aʼekʼuk wokolik?» (Ja juʼun Cholumani, 1 bʼa enero bʼa 2014)
Taʼa jun xcholjel ke jel xya kulan jkʼujoltik sok wa sjakʼa bʼa jun sjobʼjel jel wokol.
Ila ja jas snebʼa jun winik bʼa jel yiʼoj wokol ajyi.
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
