SJEJEL 28
Aʼa tsʼakatal ja jas skʼulan ja Jyoba sok ja Jesús bʼa weʼna
¿Jastal waxa wabʼ yajni juna wamigo wa xyawi jun majtanal jel tsamal? Jelni maʼ wala gustoʼaxi sok waxa kʼana oja jeʼ waxa wayi tsʼakatal. Ja Jyoba sok ja Jesús yakitik ja majtanal mas chaʼanyabʼalil: ja slokʼol. La kiltik jastal oj bʼobʼ jetik wa xkaʼatik tsʼakatal.
1. ¿Jas jun modo oj bʼobʼ jetik wa xkaʼatik tsʼakatal ja jas skʼulanekitik ja Dyos sok ja Kristo?
Ja Biblia wa skʼapa ke ja maʼ «wa sjeʼa skʼuʼajel» bʼa Jesús oj bʼobʼ ajyuk sakʼan tolabida (Juan 3:16). ¿Jastal wa xjexi skʼuʼajel bʼa Jesús? Mi kechan skʼuʼajel bʼa yeʼn; cha jachuk ja jastik wa stsaʼatik sok ja jas wa xkʼulantik (Santiago 2:17). Yajni wa xjeʼatik ja skʼuʼajel kiʼojtik soka jas wa xkʼulantik sok ja jas wa xkalatik, wa stsatsbʼi ja jastal wa xkila jbʼajtik soka Jesús sok ja sTat, ja Jyoba (kʼuman ja Juan 14:21).
2. ¿Jas ekʼele jel chaʼanyabʼalil wa xbʼobʼ jetik wa xkatikyi tsʼakatal ja Jyoba sok ja Jesús?
Ja akwal bʼajtanto oj chamuk, ja Jesús yala yabʼ ja snebʼumanik pilan modo jastal oj yaʼe tsʼakatal yuja majtanal yaʼa. Ya kujlajuk jun kʼin jel chaʼanyabʼal bʼa wa xya sbʼiʼiluk ja Biblia «ja Cena ja Kajwaltiki», cha wa xnaxi sbʼaj jastal ja Conmemoración bʼa yajel juljkʼujoltik ja xchamelal ja Jesús (1 Corintios 11:20). Ja Jesús skʼana ke ja sjekabʼanumik sok spetsanil ja matik ojto ochuke snebʼumani oj ya julskʼujole ja sakʼanil yaʼa yuj spetsanil ja kristyano. Yaljel ja bʼa kʼin it, ja Jesús yaʼa ja mandar it: «Nochowik skʼulajel ja it bʼa oj juluka kʼujolex bʼa keʼna» (Lucas 22:19). Yajni wala waj ja bʼa kʼin it, waxa jeʼa waxa waʼa tsʼakatal ja niwan yajalkʼujol sjeʼunejekitik ja Jyoba sok ja Jesús.
LA JNEBʼTIK MAS
La kiltik tuk modo bʼa yajel tsʼakatal ja niwan yajalkʼujol yiʼoje ja Jyoba sok ja Jesús. Sok la kiltik ja stʼilanil yiʼoj ja Yajel juljkʼujoltik ja xchamelal ja Jesús.
3. Ja yajel tsʼakatal wa snikawotik skʼulajel
Pensaraʼan lekbʼi wana sjikʼjel jaʼ sok ay maʼ skoltaya. ¿Wegoxta maʼ oj chʼayuka kʼujol ja jas skʼulan ja kristyano jaw? Ma ¿oja leʼ modo yajelyi tsʼakatal?
Stsʼakatal ja Jyoba sakʼanotik. Kʼumanik ja 1 Juan 4:8-10 sok loʼilananik sbʼaja jas ti nochani:
-
¿Jas yuj jel chaʼanyabʼal ja majtanal yaʼa ja Jesús?
-
¿Jastal waxa wabʼ ja waxa pensaraʼan ja jas skʼulan ja Jyoba sok ja Yunin bʼa weʼna?
¿Jastal oj bʼobʼ jetik wa xkaʼatik tsʼakatal ja jas skʼulan ja Dyos sok ja Kristo bʼa keʼntik? Kʼumanik ja 2 Corintios 5:15 sok 1 Juan 4:11; 5:3. Yajni akʼumanexta kada bersikulo, loʼilananik sbʼaja jas ti nochani:
-
¿Jastal oj bʼobʼ jetik wa xkaʼatik tsʼakatal?
4. La jtsajlaytik ja Jesús
Pilan modo sjejel wa xkaʼatik tsʼakatal jani stsajlajel ja Jesús. Kʼumanik ja 1 Pedro 2:21 sok loʼilananik sbʼaja jas ti nochani:
-
¿Jastik modo oj bʼobʼa tsajlay toj lek ja sjejel bʼa Jesús?
Ja Jesús syajtay ja Yabʼal ja Dyos, xcholo ja lekil rasonik sok skoltay ja tuk kristyano.
5. Mojtanan ja Conmemoración bʼa yajel juljkʼujoltik ja xchamelal ja Jesús
Bʼa snajel jasa ekʼ ja bʼajtan ekʼele kʼulaji ja Cena ja Kajwaltiki, kʼumanik ja Lucas 22:14, 19, 20. Tsaʼan loʼilananik sbʼaja jas ti nochani:
-
¿Jastal kʼulaji ja Cena ja Kajwaltik?
-
¿Jas wa senyaʼan ja pan sok ja vino? (Kʼelawik ja bersikuloʼik 19 sok 20).
Ja Jesús skʼana ke ja snebʼumanik oj skʼintaye ja Cena ja Kajwaltiki jun ekʼele ja bʼa jabʼil, ja bʼa yajtabʼil chami. Ja yuj, ja testigoʼotikon bʼa Jyoba wa stsomo jbʼajtikon kada jabʼil bʼa yajel juljkʼujoltikon ja xchamelal ja Jesús sok wa xkʼulantikon ja jastal ya kujlajuk. Bʼa oj naxuk ja jastal wa xkʼulaxi ja reunion it jel tʼilan, kʼelawik ja BIDEO. Tsaʼan loʼilananik sbʼaja jas ti nochani:
-
¿Jas wa xkʼulaxi ja bʼa Conmemoración?
Ja pan sok ja vino kechanta senyaʼik. Ja pan wa senyaʼan ja skuerpo mey yiʼoj mulal ja Jesús bʼa yaʼa yuj jpetsaniltik. Ja vino wa senyaʼan ja xchikʼeli.
JA JAS WA XYALAWE JUJUNTIK: «Malanta oja kʼuʼuk bʼa Jesús bʼa oja taʼa koltajel».
-
¿Jastal oj wa makunuk ja Juan 3:16 sok Santiago 2:17 bʼa xcholjel tʼilan skʼulajel tuk jastik?
JA JASA NEBʼA
Yajni wa xjeʼatik skʼuʼajel bʼa Jesús sok wala wajtik ja bʼa yajel juljkʼujoltik ja xchamelali, wa xjeʼatik wa xkaʼatik tsʼakatal ja jas skʼulankitiki.
Yajel juljkʼujoltik
-
¿Jastal wa xjexi skʼuʼajel bʼa Jesús?
-
¿Wan maʼ xa kʼana oja wayi tsʼakatal ja Jyoba sok ja Jesús yuja jas skʼuluneje awi? ¿Jastal waxa kʼana oja kʼuluk?
-
¿Jas yuj jel tʼilan wajel ja bʼa yajel juljkʼujoltik ja xchamelal ja Jesús?
LEʼA TUK JASTIK
Maklay ja jas wa snikawotik skʼulajel ja xchamelal ja Jesús.
Nebʼa mas sbʼaja skʼuʼajel sok jastal oj bʼobʼ jexuk.
«La ajyukujtik skʼuʼajel ja bʼa jastik skʼapunej ja Jyoba» (Ja Juʼun Cholumani, octubre bʼa 2016)
Snebʼjel jas wa stojolan ja majtanal yaʼa ja Jesús stukbʼes ja sakʼanil jun ixuk. Kʼuman ja sakʼanil ja bʼa loʼil «Wa xkabʼ sak ayon, sakʼan sok laman».
«Ja Biblia stukbʼes ja sakʼanile» (Ja Juʼun Cholumani, 1 bʼa agosto bʼa 2011)
Ila jas yuj jel tʼusan ja maʼ wa xyabʼye ja pan sok wa xyuʼaje ja vino ja bʼa Yajel juljkʼujoltik ja xchamelal ja Jesús.
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
