¿Ay maʼ bʼa chamelawuj june jel xa yajtay? Ja ekʼele jaw jel yaj xa wabʼ, bʼobʼta ajobʼo abʼaj: «¿Ayto maʼ jas wa xkan sakʼan yajni wa xcham june? ¿Ojto maʼ cha kil-e?». Ja bʼa sjejel it sok ja bʼa ti jakumi oj jpaklaytik ja sjakʼjelik jel xyaʼa kulan jkʼujoltik ja Biblia.

1. ¿Ayto maʼ jas wa xkan sakʼan yajni wa xcham june?

Ja Jesús ya slaj sbʼaj ja chamelal sok june maʼ ochel lek swayel. ¿Jastal wa slaja sbʼaj ja chamelal sok june maʼ ochel swayel? Yajni june ochel lek swayel, mi wa snaʼa ja jas wan ekʼel ja bʼa sjoyanal. Yajni june maʼ wa xchami, mixa xyabʼ syajal cha mixa xyiʼaj wokol. Ja Biblia wa xyala ke «ja matik chamelexa mixato jas snaʼawe» (kʼuman ja Eclesiastés 9:5).

2. ¿Jas yuj wa skoltayotik snajel ja smeranil sbʼaja chamelal?

Jitsan kristyano wa xiwye yuja chamelali sok cha jachuk ja chamwiniki. Ta jach wa x-ekʼabʼaj, ja jas wa xyala ja Biblia sbʼaja chamelali oj bʼobʼ yawi lamanil. Ja Jesús yala: «Jaxa smeranili oj ya elanik libre» (Juan 8:32). Jujuntik relijyon wa sjeʼawe ke ayto jas wa xkan sakʼan ja yajni ay maʼ wa xchami, pe ja Biblia mi jach wa sjeʼa. Ja yuj yajni ay maʼ wa xchami mixa xyiʼaj wokol. Yuja chamwinik mixa jas snaʼawe, mini oj bʼobʼ yixtalaʼukotike. Ja yuj mini tʼilan yajelyi orasyon bʼa yeʼnle cha mini jas skʼulajel bʼa laman oj ajyuke ma bʼa stoyjele.

Jujuntik wa xyalawe ke wanbʼi xbʼobʼ loʼilanuke soka chamwinik, pe ja jaw mi xbʼobʼi. Jastalni anebʼata, ja chamwiniki «mixato jas snaʼawe». Ja matik wa skʼuʼane ke jaʼ wane loʼilanel soka chamwiniki bʼobʼta ja smeranili jani wane loʼilanel soka pukujik bʼa wa skʼulan sbʼaje ke yeʼnle ja matik chamelexa. Ja yuj snajel ja smeranil sbʼaja chamelal mini xbʼobʼ yixtalaʼukotik ja pukujik. Ja Jyoba wa xyalakabʼtik ke mok jletik modo loʼilanel soka chamwinik yujni wa snaʼa ke ja loʼilanel soka pukujik xiwela sbʼaj (kʼuman ja Deuteronomio 18:10-12).

3. Ja jas meran wa x-ekʼ yajni wa xcham june

Bʼa sutanal ja luʼum ay tuktukil skʼuʼajel sbʼaja jas wa x-ekʼ sbʼaj yajni wa xcham june. Pe mini spetsanil meranuk ja skʼuʼajelik jaw.

• ¿Jas skʼuʼajel yiʼoje sbʼaja chamwinik ja bʼa wa lugar?

 4. Ja smeranil sbʼaja chamelal wa xya elkotik libre

Yajni wa xnebʼatik ja smeranil sbʼaja chamelal, mixa la xiwtik yuja chamwinik. Kʼumanik ja Eclesiastés 9:10 sok loʼilanan sbʼaja jas ti nochani:

• ¿Oj maʼ bʼobʼ yixtalaʼukotik ja chamwinik?

Ja smeranil wa sjeʼa ja Biblia cha wa xya elkotik ja bʼa skʼuʼajel ke tʼilan yajel lamxuke ma yajelyi stoyjel ja chamwinik. Kʼumanik ja Isaías 8:19 sok Apocalipsis 4:11, sok loʼilanan sbʼaja jas ti nochani:

• ¿Jastal waxa kʼuʼan wa xyabʼ ja Jyoba yajni ay maʼ wa xyayi stoyjel ja chamwinik ma wa sleʼa skoltajelsok?

5. Ja smeranil sbʼaja chamelal wa xya kulan jkʼujoltik

Jitsan wa xjejiyile, ke yajni xchamye, oj yiʼe wokol yuja jastik mi lek skʼulane ja sakʼaneto. Pe jel xlikiki snajel ke mi maʼ oj yiʼ wokol ja yajni xchami, cha mini ja matik skʼulane jastik jel malo. Kʼumanik ja Romanos 6:7 sok loʼilanan sbʼaja jas ti nochani:

• Jastalni wa xyala ja Biblia, ja chamelali wa xya el libre jun kristyano ja bʼa smulik. Anto, ¿wan maʼ xa kʼuʼan ke ja chamwiniki wane yijel wokol bʼa stupjel ja jas mi lek skʼulane?

Yajni mas wa xnaʼatik sbʼaj ja Jyoba, mas wa xkʼuʼantik lek ke nunka oj ya yiʼ wokol ja chamwinik. Kʼumanik ja Deuteronomio 32:4 sok 1 Juan 4:8, sok loʼilanan sbʼaja jas ti nochani:

• Ja jastal kʼotel ja Dyos wa xcholo ja bʼa bersikuloʼiki, ¿oj maʼ yakan oj yiʼ wokol ja matik chamelexa?

• ¿Wan maʼ xa kʼuʼan ja smeranil sbʼaja chamelal wa xyaʼa kulan jkʼujoltik? ¿Jas yuj?

 JA JASA NEBʼA

Yajni wa xcham june, ti wa xchʼak ja sakʼanil. Ja chamwiniki mi xyiʼaje wokol cha mi maʼ xyixtalane.

Yajel juljkʼujoltik

• ¿Ayto maʼ jas wa xkan sakʼan yajni wa xcham june?

• ¿Jas yuj wala eltik libre snajel ja smeranil sbʼaja chamelal?

• ¿Jas yuj wa xya kulan jkʼujoltik snajel ja smeranil sbʼaja chamelal?