SJEJEL 30
¡Ojto bʼobʼ sakʼwuk ja matik jelxa yajtay!
Yajni ay maʼ wa xchami jel xyaʼa tristeʼil sok syajal. Ja yuj ja Biblia wa xyala ja chamelal jun kontraʼal (1 Corintios 15:26). Ja bʼa sjejel 27, anebʼa ke ja Jyoba oj xchʼaysnajel. Pe ¿jas oj ekʼ sbʼaj ja matik chamyeta? Ja bʼa sjejel it, oja naʼ mas bʼa pilan kʼapjelal jel chaʼanyabʼal yaʼunej ja Jyoba: oj ya sakʼwuk jitsan miyonik kristyano bʼa oj yabʼye stsamalil ja sakʼanil bʼa tolabida. ¡Ojni sakʼwuke! ¿Meran maʼ oj bʼobʼuk? ¿Ti maʼ oj sakʼwuke bʼa satkʼinal, ma bʼa Luʼum?
1. ¿Jas wa skʼana oj skʼuluk ja Jyoba yuja matik chamelkujtik?
Ja Jyoba jelxa skʼana oj ya sakʼwuk ja matik chamelexa. Ja Job, jun winik jel yiʼoj skʼuʼajel, seguro ajyi ke ja Dyos mi oj chʼay skʼujol bʼa yeʼna ja yajni xchami sok ja yajni tixa ay «bʼa Kʼeʼen». Yala yabʼ ja Dyos: «Weʼn oj paywanan, sok ja keʼn oj jakʼe» (kʼuman ja Job 14:13-15).
2. ¿Jastal wa xnaʼatik ke oj sakʼwuke ja chamwinik?
Yajni ti ajyi bʼa Luʼum ja Jesús, ja Dyos yayi yip bʼa yajel sakʼwuk ja kristyano. Ja yuj ja Jesús ya sakʼwuk jun yal akʼix bʼa 12 sjabʼil sok ja skerem jun biuda (Marcos 5:41, 42; Lucas 7:12-15). Tsaʼan ja yamigo Lázaro chami. Pe ama chanexa kʼakʼu chamel, ja Jesús ya sakʼwuk. Yajni yayi orasyon ja Dyosi, kechanta awani och ja bʼa kʼeʼeni: «¡Lázaro, elanjani!». Sok ja «maʼ chamel ajyi eljani», ¡sok sakʼanxa ay! (Juan 11:43, 44) ¿Wan maʼ xa pensaraʼan janekʼto gustoʼaxi ja spamilya sok ja yamigoʼik ja Lázaro?
3. ¿Ojto maʼ sakʼwuke ja matik jelxa yajtaye?
Ja Biblia wa skʼapa «oj ajyuk jun sakʼwelal» (Hechos 24:15). Ja matik ya sakʼwuk ja Jesús mi ti wajye bʼa satkʼinal (Juan 3:13). Spetsanile jel gusto ajyiye ja cha sakʼwiye bʼa Luʼum. Jastalni ekʼ ja bʼa tyempo jaw, ja Jesús ojxta ya sakʼwuk jitsan miyonik kristyano bʼa oj yabʼye stsamalil ja sakʼanile bʼa tolabida bʼa Luʼum bʼa junxa tsamal lugar. Ja yeʼn yala ke «ja matik teye bʼa kʼeʼenik wa xmakuni bʼa yajel jul kʼujolal», wa xkʼan alxuk, ja matik tey bʼa spensar ja Dyos, oj sakʼwuke, chomajkil ja matik mixa maʼ xnajiyujile (Juan 5:28, 29, nota).
LA JNEBʼTIK MAS
La jpaklaytik ja prebaʼik wa xyaʼa ja Biblia ke ja chamwiniki oj bʼobʼ sakʼwuke sok bʼa merani oj kʼotuk. Sok la kiltik jastal oj bʼobʼ yaʼ kulana kʼujol sok ja smajlajel oj yawi.
4. Ja Jesús sjeʼa oj bʼobʼ ya sakʼwuk ja chamwiniki
Nebʼa mas sbʼaja jas skʼulan ja Jesús yuja yamigo Lázaro. Kʼumanik ja Juan 11:14 sok 38-44, sok loʼilananik sbʼaja jas ti nochani:
-
¿Jastal wa xnaʼatik ke meran cham ja Lázaro? (Kʼelawik ja bersikulo 39).
-
Lekbʼi ti waj bʼa satkʼinal, ¿wan maʼ ajelyi jun pabor yuja Jesús ja ijikon yajkʼachil ekʼele bʼa Luʼum?
5. ¡Jitsan oj sakʼwuke!
Kʼumanik ja Salmo 37:29 sok loʼilananik sbʼaja jas ti nochani:
-
¿Bʼa oj ajyuke sakʼan ja jitsan miyonik kristyano oj sakʼwuke?
Ja Jesús mi kechan oj ya sakʼwuk ja matik stoyowe ja Jyoba; oj ya sakʼwuk jitsan kristyanoʼik. Kʼumanik ja Hechos 24:15 sok loʼilananik sbʼaja jas ti nochani:
-
Yajni x-ajyi ja sakʼwelali, ¿maʼ waxa kʼana oja wil?
Pensaraʼan ja it: bʼa Jesús jel pasil yajel sakʼwuk ja kristyano jastal jun tatal bʼa syujkesel ja skerem.
6. Ja sakʼwelal oj yawi smajlajel sok oj ya kulana kʼujol
Ja loʼil bʼa yakʼix ja Jairo yaʼunej kulan skʼujol sok skoltunej jitsan maʼ ay maʼ chamelyujile. Kʼumanik ja loʼil it bʼa meran ekʼi bʼa Lucas 8:40-42 sok 49-56.
Bʼajtanto oj ya sakʼwuk ja akʼix, ja Jesús yala yabʼ ja Jairo: «Mok xiwan, kechan kʼuʼan» (kʼelawik ja bersikulo 50). ¿Jastal oj skoltaya ja smajlajel bʼa sakʼwelal...
-
... yajni ay maʼ xchamawuj?
-
... yajni xiwela sbʼaj ay jawa sakʼanil?
Kʼelawik ja BIDEO sok loʼilananik sbʼaja jas ti nochani:
-
¿Jastal koltubʼal sok ajel kulan skʼujol ja snantat ja Phelicity ja smajlajel bʼa sakʼwelal?
JA JAS WA XYALAWE JUJUNTIK: «Jel wokol xkabʼ skʼuʼajel ke ja chamwinik ti oj sakʼwuke bʼa Luʼum».
-
¿Jas waxa pensaran?
-
¿Jas teksto oj wa makunuk bʼa oja jeʼ ke ojni ajyuk sakʼwelal ja bʼa Luʼum?
JA JASA NEBʼA
Ja Biblia wa skʼapa ke jitsan miyonik kristyano oj sakʼwuke. Ja Jyoba wa skʼana ke oj cha sakʼwuke sok yaʼunejyi yip ja Jesús bʼa yeʼn oj skʼuluk.
Yajel juljkʼujoltik
-
¿Jastal wa xnaʼatik ke ja Jyoba sok ja Jesús wane skʼanjel oj yawe sakʼwuk ja chamwiniki?
-
¿Bʼa oj ajyuke yajni sakʼwiye ja jitsan miyonik kristyano: bʼa satkʼinal, ma bʼa Luʼum? ¿Jas yuj jach waxa pensaran?
-
¿Jasa wa xyaʼa kʼuʼuk ke ojni bʼobʼ sakʼwuke ja matik jelxa yajtayi?
LEʼA TUK JASTIK
Kʼuman jujuntik jas jel xmakuni bʼa mi oj skʼuluka ganar ja syajal.
«Koltajel sbʼaja maʼ aye bʼa syajal» (¡Kʼeʼan!, núm. 3 2018)
¿Oj maʼ koltajuk yuja Biblia june maʼ ay maʼ chamelyuj?
¿Jasa oj koltajuke ja yal untik yajni wa xcham june bʼa jel syajtaye?
¿Ay maʼ oj sakʼwuk bʼa oj waj bʼa satkʼinal? ¿Ay maʼ mi oj sakʼwuk?
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
