SJEJEL 31
¿Jasunkiluk ja sGobyerno ja Dyos?
Ja rason mas tʼilan yiʼoj ja Biblia jaʼ ti chʼikansok ja sGobyerno ja Dyos. Ja Jyoba oj ya makunuk ja sGobyerno bʼa oj ya kʼot smeranil ja jas wa skʼana oj skʼuluk ajyi ja bʼa Luʼumi. ¿Jasunkiluk ja sGobyerno? ¿Jastal wa xnaʼatik wanxa yajel mandar? ¿Jasa bʼobʼel skʼuluk man wego? ¿Sok jas oj skʼuluk ja bʼa tyempo jakum? Ja it oj axukyi sjakʼjel ja bʼa sjejel it sok ja bʼa chabʼe ti jakum.
1. ¿Jasunkiluk ja sGobyerno ja Dyos, sok machʼa ja sReyi?
Jun Gobyerno yeʼn yaʼunej kujlajuk ja Jyoba. Ja sReyi jaʼa Jesukristo sok ti wan yajel mandar man bʼa satkʼinal (Mateo 4:17; Juan 18:36). Bʼa jaʼ wan stajel tiʼal ja Jesús, ja Biblia wa xyala: «Yeʼn tolabida oj ya mandar» (Lucas 1:32, 33). Yuja yeʼn Rey ja bʼa sGobyerno ja Dyos, oj yayi mandar spetsanil ja kristyano ja bʼa Luʼumi.
2. ¿Matik oj ya mandar soka Jesús?
Ja Jesús mi stuchʼiluk wan mandar. «Kristyanoʼik bʼa tuktukil kʼole, kʼumal, lugar sok chonabʼ [...] oj yaʼe mandar» (Apocalipsis 5:9, 10). ¿Janekʼ oj yaʼe mandar soka Kristo? Man ti ajyi bʼa Luʼum ja Jesús, miyonik kristyano stsaʼuneje snochjel. Pe kechan 144,000 oj wajuke bʼa satkʼinal bʼa oj yaʼe mandar soka Jesús (kʼuman ja Apocalipsis 14:1-4). Jaxa tuk snochuman ja Kristo oj ajuke mandar il bʼa Luʼum yuja Gobyerno jaw (Salmo 37:29).
3. ¿Jas yuj mas lek ja sGobyerno ja Dyos yuja gobyernoʼik bʼa luʼum?
Ama ay gobyernoʼik bʼa wa skʼana oj skʼuluke jastik lek, mey yiʼoje ja ipal bʼa skʼulajel spetsanil ja jas wa skʼanawe. Yajni wa x-ekʼ ja tyempo wa slokʼolankan tuk bʼa bʼobʼta mi jel xcham skʼujole ja kristyano. Pe ja Jesús, ja Rey ja bʼa sGobyerno ja Dyos, mini maʼ oj slokʼoluk. Ja Dyos ya kujlajuk «jun gobyerno bʼa mini oj ajuk chʼayuk snajel» (Daniel 2:44). Ja Jesús oj ya mandar sutanal ja Luʼum sok mi tsaʼubʼalta maʼ lek oj yil. Jel syajal skʼujol, lek smodo sok toj, sok oj sjeyi ja kristyano jach oj cha skʼuluke: oj sjeʼe yajalkʼujol, lekil smodoʼe sok toj oj ajyuke soka tuk (kʼuman ja Isaías 11:9).
LA JNEBʼTIK MAS
La kiltik jas yuj mas lek ja sGobyerno ja Dyos yuj chikan jas gobyerno ja bʼa luʼum.
4. Ja Gobyerno jel yip bʼa oj ya mandar bʼa sutanal ja Luʼum
Ja Jesús masni ay yip bʼa yajel mandar yuj chikan jas gobyerno ekʼel ja bʼa luʼum. Kʼumanik ja Mateo 28:18 sok loʼilananik sbʼaja jas ti nochani:
-
¿Jas yuj ja xchol yiʼoj ja Jesús masto ekʼxel yuja gobyernoʼik bʼa luʼum?
Ja gobyernoʼik bʼa luʼumi tikʼanxta wa xtukbʼiye sok kechan wa xyaʼawe mandar bʼa jun parte. ¿Jach maʼ oj ekʼ sbʼaj ja sGobyerno ja Dyos? Kʼumanik ja Daniel 7:14 sok loʼilananik sbʼaja jas ti nochani:
-
¿Jasa slekilal yuja mi oj chʼaysnajel ja sGobyerno ja Dyos?
-
¿Jasa slekilal yuja oj ya mandar bʼa sutanal ja Luʼum?
5. Ja gobyernoʼik bʼa luʼum tʼilan oj lexuk slokʼole
¿Jas yuj wa xkʼanxi ja sGobyerno ja Dyos oj slokʼoluk ja gobyernoʼik bʼa luʼum? Kʼelawik ja BIDEO sok loʼilananik sbʼaja jas ti nochani:
-
¿Jastik wokolik yiʼonejan ja gobyernoʼik bʼa luʼum?
Kʼumanik ja Eclesiastés 8:9 sok loʼilananik sbʼaja jas ti nochani:
-
¿Wan maʼ xa kʼuʼan ja sGobyerno ja Dyos tʼilan oj slokʼoluk ja gobyernoʼik bʼa luʼum? ¿Jas yuj?
6. Ja mandaranumik bʼa sGobyerno ja Dyos wa xyabʼyotike stojol
Yuja jReytik Jesús ajyi jastal kristyano sok ajyi bʼa Luʼum, wa «snaʼ[a] jyajulaltik yuja jpaltatiki» (Hebreos 4:15). Ja Jyoba stsaʼunej 144,000 kristyano toje bʼa oj yaʼe mandar soka Jesús. Ja kristyanoʼik jaw ti elele «bʼa tuktukil kʼole, kʼumal, lugar sok chonabʼ» (Apocalipsis 5:9).
-
¿Wan maʼ stsatsankʼujolana spensarajel ke ja Jesús sok ja matik oj yaʼ mandarsok wa snaʼawe lek jastal ja sakʼanil ja kristyano? ¿Jas yuj?
Ja Jyoba stsaʼunej kristyanoʼik bʼa tuktukil tyempo sok kultura bʼa oj yaʼe mandar soka Jesús.
7. Ja sleyik ja sGobyerno ja Dyos masto lek yuja bʼa kristyanoʼik
Ja gobyernoʼik wa xyaʼawe leyik bʼa skoltajel sok stalnajel ja kristyano. Ja sGobyerno ja Dyos cha ayiʼoj leyik, sok jaxa maʼ tey bʼa sparte tʼilan oj skʼuʼuke. Kʼumanik ja 1 Corintios 6:9-11 sok loʼilananik sbʼaja jas ti nochani:
-
¿Jastal waxa kʼuʼan oj ajyuk ja luʼumkʼinal yajni spetsanile oj skis-e ja sleyik ja Dyos? a
-
¿Wan maʼ xa kʼuʼan ke ayni sbʼej oj smajlay ja Jyoba oj skis-e ja sleyik ja matik oj ajyuke bʼa sparte ja sGobyerno? ¿Jas yuj?
-
¿Jastal wa xnaʼatik ja matik mi skʼuʼane ja leyik it ojni bʼobʼ tukbʼuke? (Kʼelawik ja bersikulo 11).
Ja gobyernoʼik wa xyaʼawe leyik bʼa skoltajel sok stalnajel ja kristyano. Ja sGobyerno ja Dyos ayiʼoj leyik mas lek yuja bʼa kristyano, sok wa skoltay sok wa stalnay ja matik tey bʼa sparte.
JA JAS WA XYALAWE JUJUNTIK: «¿Jasunkiluk ja sGobyerno ja Dyos?».
-
¿Jas oja wale?
JA JASA NEBʼA
Ja sGobyerno ja Dyos jun meran gobyerno tey bʼa satkʼinal sok oj ya mandar bʼa sutanal ja luʼum.
Yajel juljkʼujoltik
-
¿Matik ja mandaranumik ja bʼa sGobyerno ja Dyos?
-
¿Jas yuj mas lek ja sGobyerno ja Dyos yuj chikan jas gobyerno ja bʼa luʼum?
-
¿Jas wa smajlay ja Jyoba sbʼaja matik tey bʼa sparte ja sGobyerno?
LEʼA TUK JASTIK
Kʼuman ja jas sjeʼa ja Jesús bʼa oj ajyuk ja Gobyerno.
«¿Ti maʼ ay bʼa jkʼujoltik ja sGobyerno ja Dyos?» (Artikuloʼik bʼa jw.org)
¿Jas yuj ja testigoʼik bʼa Jyoba jaʼ wa skʼana oj ajyuke toj soka sGobyerno ja Dyos ke soka gobyernoʼik bʼa luʼum?
Paklay ja jas wa xyala ja Biblia sbʼaja 144,000 kristyano wa stsaʼa ja Jyoba oj yaʼe mandar soka Jesús.
«¿Matik oj wajuke ja bʼa satkʼinali?» (Artikuloʼik bʼa jw.org)
¿Jasa aji skʼuʼuk jun ixuk lutubʼal ajyi ke kechanta ja Dyos oj lajxukyuj skʼulajel ja bʼa toj?
«Jnebʼa jastal oj tojbʼuk ja skʼulajel bʼa mi tojuki» (¡Kʼeʼan!, noviembre bʼa 2011)
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
