SJEJEL 32
¡Wanxa yajel mandar ja sGobyerno ja Dyos!
Ja sGobyerno ja Dyos kʼe ya mandar bʼa satkʼinal bʼa 1914. Ja bʼa jabʼil jaw kʼe ja tsaʼanikxta kʼakʼu ja smandaranel ja gobyernoʼik bʼa luʼum. ¿Jastal wa xnaʼatik? Ila ja jas yalunejxakan ja Biblia sbʼaja jas wan ekʼel ja bʼa luʼumkʼinal sok ja smodo ja kristyano man 1914.
1. ¿Jasa yalunejxakan oj ekʼuk ja Biblia?
Ja libro stsʼijbʼan ja Daniel wanxa xyala ke ja sGobyerno ja Dyos oj kʼe ya mandar tsaʼan bʼa jun tyempo wa sbʼiʼilan juke tyempo (Daniel 4:16, 17). Sigloʼik mas tsaʼan, ja Jesús yala sbʼaja junxta tyempo jaw jastal «ja tyempo tsaʼubʼalxa bʼa chonabʼiki», sok sjeʼa ke ja tyempo it me xchʼak ajyi (Lucas 21:24). Jastalni oj kiltik, ja juke tyempo chʼak bʼa 1914.
2. ¿Jastal ajyel ja luʼumkʼinal sok ja smodo ja kristyano man 1914?
Ja nebʼumaniki sjobʼoweyi ja Jesús: «¿Jas senyaʼil oj ajyuk ja yajni tixa aya sok ja bʼa xchʼakulabʼil ja jastal wa xtax ja tyempo?» (Mateo 24:3). Ja sjakʼjel yaʼa, ja Jesús yalaxakan jitsan jastik oj ekʼuk tsaʼan ja yajni kʼeta yaʼ mandar ja bʼa satkʼinal jastal Rey ja bʼa sGobyerno ja Dyos. Jun sjejel, staʼa tiʼal bʼa guerraʼik, waʼin sok terremotoʼik (kʼuman ja Mateo 24:7). Ja Biblia cha yalaxakan ke ja bʼa «tsaʼanikxta kʼakʼu» ja smodo ja kristyano «mi pasiluk oj kuchkujtik» (2 Timoteo 3:1-5). Man 1914, ja tyempoʼik it sok ja modoʼalik kʼe chijkajuk lek.
3. ¿Jas yuj jelxa jomta ja luʼumkʼinal man kʼe ya mandar ja sGobyerno ja Dyos?
Tsaʼan yajni ja Jesús och Rey ja bʼa sGobyerno ja Dyos, ajyi jun guerra ja bʼa satkʼinal, tiroʼani soka Satanás sok ja pukujiki. Kʼulaji ganar ja Satanás, sok jastalni wa xyala ja Biblia, «jipjikoʼ bʼa luʼum, sok cha jipjikoʼ ja yanjeliki» (Apocalipsis 12:9, 10, 12). Ja Satanás jel tajkel ay yujni wa snaʼa ojxta chʼayjuk snajel. Ja yuj jelni wan yajelyi wokol ja luʼumkʼinal. Ja jaw wa xya kabʼtik stojol jas yuj jelxa jomta ja luʼumkʼinal. Pe ja sGobyerno ja Dyos oj xchʼay snajel yibʼanal ja wokoliki.
LA JNEBʼTIK MAS
La jpaklaytik jastal wa xnaʼatik ke ja sGobyerno ja Dyos kʼe ya mandar bʼa 1914 sok la kiltik jastal oj bʼobʼ jetik wa xkʼuʼantik ke wanxa yajel mandar.
4. Ja jas yalunejxakan ja Biblia wa xyiʼajotik bʼa 1914
Ja Dyos yaʼakan ke ja Nabucodonosor, jun Rey bʼa poko Babilonia, oj swaychuk jun jas ojto ekʼuk. Ja wayichal sok ja jas yala wa stojolan ja Daniel wa xchiktes jani ti chʼikansok ja sgobyerno ja Nabucodonosor sok ja sGobyerno ja Dyos (kʼumanik ja Daniel 4:17). a
Kʼumanik ja Daniel 4:20-26. Tsaʼan awik makunuk ja dibujo bʼa yajelyi sjakʼjel ja sjobʼjelik ti nochani:
-
A) ¿Jasa yila ja Nabucodonosor ja bʼa swayich? (Kʼelawik ja bersikuloʼik 20 sok 21).
-
B) ¿Jasa oj ekʼ sbʼaj ja teʼi? (Kʼelawik ja bersikulo 23).
-
C) ¿Jasa oj ekʼuk yajni xchʼak ja juke tyempo? (Kʼelawik ja bersikulo 26).
Ja teʼ waychiji sok ja sGobyerno ja Dyos
JA JAS ALUBʼALKAN OJ EKʼUK (Daniel 4:20-36)
Ja mandaranel
A) Jun teʼ jel chaʼan
Kʼot tʼan tekʼan ja mandaranel
B) Kʼutsuwik ja teʼi sok majlayik man x-ekʼ juke tyempo.
Cha kʼe stulyi ja mandaranel
C) Oj cha kʼe akʼul mandar
Ja bʼajtan buelta kʼot smeranil:
-
D) ¿Maʼ senyaʼan ja teʼi? (Kʼelawik ja bersikulo 22).
-
E) ¿Jas tyempo yakan mandaranel? (Kʼumanik ja Daniel 4:29-33).
-
F) ¿Jas ekʼ sbʼaj tsaʼan ja bʼa juke tyempo? (Kʼumanik ja Daniel 4:34-36).
JA BʼAJTAN BUELTA KʼOT SMERANIL
Ja mandaranel
D) Ja Nabucodonosor, rey bʼa Babilonia
Kʼot tʼan tekʼan ja mandaranel
E) Ja Nabucodonosor jom yolom tsaʼan ja bʼa 606 bʼ.t.J. b sok mi bʼobʼ ya mandar juke jabʼil.
Cha kʼe stulyi ja mandaranel
F) Ja Nabucodonosor tojbʼi sok kʼe ya mandar
Ja xchabʼil buelta kʼot smeranil:
-
G) ¿Matik senyaʼan ja teʼi? (Kʼumanik ja 1 Crónicas 29:23).
-
H) ¿Jas tyempo yawekan mandaranel? ¿Jastal wa xnaʼatik mi wanuke yajel mandar yajni ti ajyi bʼa Luʼum ja Jesús? (Kʼumanik ja Lucas 21:24).
-
I) ¿Bʼaʼa sok jas tyempo kujlaji ja gobyerno it?
JA XCHABʼIL BUELTA KʼOT SMERANIL
Ja mandaranel
G) Reyik israʼelenyo senyaʼane ja sGobyerno ja Dyos
Kʼot tʼan tekʼan ja mandaranel
H) Chʼayji snajel ja Jerusalén bʼa jabʼil 607 bʼ.t.J.; 2,520 jabʼil mixa ajyi intilal reyik israʼelenyo
Cha kʼe stulyi ja mandaranel
I) Bʼa 1914 ja Jesús kʼe ya mandar bʼa satkʼinal jastal Rey ja bʼa sGobyerno ja Dyos
¿Janekʼ wa x-albʼi ja juke tyempo?
Jujuntik xetʼanik ja bʼa Biblia wa skoltayotik yabʼjel stojol bʼa tuk. Jun sjejel, ja bʼa Apocalipsis wa xyala ke oxe tyempo sok snalan wa x-elkʼot 1,260 kʼakʼu (Apocalipsis 12:6, 14). Ja juke tyempo chabʼ tantoxa, wa xkʼan alxuk, 2,520 kʼakʼu. Ay ekʼele ja bʼa Biblia, jun kʼakʼu wa stojolan jun jabʼil (Ezequiel 4:6). Ja yuj ja juke tyempo wa staʼa tiʼal ja libro bʼa Daniel kʼotel 2,520 jabʼil.
5. Ja bʼa 1914 tukbʼi ja luʼumkʼinal
Ja Jesús yalaxakan jastal oj ajyuk ja luʼumkʼinal ja yajni xkʼe ya mandar. Kʼumanik ja Lucas 21:9-11 sok loʼilananik sbʼaja jas ti nochani:
-
Sbʼaja jastik alubʼalkan, ¿bʼaya wiluneji ma awabʼunej yabʼalil?
Ja jekabʼanum Pablo xcholo ja smodo oj sjeʼ ja kristyano ja bʼa tsaʼanikxta kʼakʼu bʼa smandaranel ja gobyernoʼik bʼa luʼum. Kʼumanik ja 2 Timoteo 3:1-5 sok loʼilananik sbʼaja jas ti nochani:
-
¿Jastik modoʼalik awilunej ja bʼa jas wa xyala ja teksto?
6. Jeʼa waxa kʼuʼan ke ja sGobyerno ja Dyos wanxa yajel mandar
Kʼumanik ja Mateo 24:3, 14 sok loʼilananik sbʼaja jas ti nochani:
-
¿Jas aʼtel jel tʼilan wa sjeʼa ja sGobyerno ja Dyos wanxa yajel mandar?
-
¿Jastal oj bʼobʼ koltanan ja bʼa aʼtel jaw?
Ja sGobyerno ja Dyos wanxa yajel mandar, sok tʼusanxta skʼana bʼa oj ya mandar bʼa yibʼanal ja luʼum. Kʼumanik ja Hebreos 10:24, 25 sok loʼilananik sbʼaja jas ti nochani:
-
¿Jasa tʼilan oj jkʼuluktikik «yuja wa xkilatik wan mojxel ja skʼakʼujil ja Dyosi»?
¿Jas oja kʼuluk ta anebʼa jun jasunuk ke oj bʼobʼ skolta ja tuk sok bʼa oj staʼ sakʼanil?
JA JAS WA SJOBʼOWE JUJUNTIK: «¿Jas yuj jel staʼawe tiʼal ja testigoʼik bʼa Jyoba ja 1914?».
-
¿Jas oja wale?
JA JASA NEBʼA
Ja jastik yalunejkan ja Biblia sok ja jas wan ekʼel ja bʼa luʼumkʼinal wa sjeʼa ja sGobyerno ja Dyos wanxa yajel mandar. Sok wa xjeʼa wa xkʼuʼantik ta wa xcholotik ja Gobyerno jaw sok wala wajtik ja bʼa reunionik.
Yajel juljkʼujoltik
-
¿Jasa ekʼ ja yajni chʼak ja juke tyempo yalakan ja libro bʼa Daniel?
-
¿Jas wa xya kʼuʼuk ke ja sGobyerno ja Dyos kʼe ya mandar bʼa 1914?
-
¿Jastal oja jeʼ ke waxa kʼuʼan wanxa yajel mandar ja sGobyerno ja Dyos?
LEʼA TUK JASTIK
Kʼuman ja jas wa xyala jujuntik paklanum sok tuk bʼa jel snaʼawe sbʼaja jastal tukbʼel ja luʼumkʼinal man 1914.
«Yajni ja kristyano kʼe ipaxuk ja smaloʼile» (¡Kʼeʼan!, abril bʼa 2007)
Ila jastal koltaji ja bʼa sakʼanil jun winik ja jas tsʼijbʼunubʼalkan ja bʼa Mateo 24:14.
«Jeltoni xkʼulan gusto ajyi ja béisbol» (Ja Juʼun Cholumani, núm. 3 2017)
¿Jastal wa xnaʼatik ja jas tsʼijbʼunubʼalkan ja kapitulo 4 bʼa Daniel ti chʼikansok ja sGobyerno ja Dyos?
¿Jas wa xchiktes ke ja juke tyempo wa xyala ja kapitulo 4 bʼa Daniel chʼak bʼa 1914?
a Kʼuman ja chabʼ tsaʼanxta artikulo ja bʼa «Leʼa tuk jastik» ja bʼa sjejel it.
b Wa x-axi makunuk bʼ.t.J. sbʼaja yaljel bʼajtanto bʼa styempo Jesús ma bʼajtanto bʼa jtyempotik. Sok wa x-axi makunuk t.J. bʼa yaljel bʼa styempo Jesús ma bʼa jtyempotik.
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
