SJEJEL 34
¿Jastal oj bʼobʼ jetikyi wa xyajtaytik ja Jyoba?
¿Mas xa maʼ waxa yajtay ja Dyos man kʼe akʼul estudiar ja Biblia? ¿Wan maʼ xa kʼana oj kʼi mas ja jastal waxa wilabʼajsoki? Ta jachuk, ajulka kʼujol, ta ja Jyoba wa xyila kada ekʼele mas waxa yajtay, masni oj cha syajtaya sok oj stalnaya. ¿Jastal oj bʼobʼa jeyi ke waxa yajtay?
1. ¿Jastal wa xjeʼatikyi ja Jyoba wa xyajtaytik?
Wa xjeʼatik wa xyajtaytik ta wa xkʼuʼantik ja smandari (kʼuman ja 1 Juan 5:3). Pe mini maʼ wa stʼena, wani xyaʼakan keʼn oj jtsatik ta ojo ma miyuk. ¿Jas yuj? Yujni wa skʼana ke ‹kʼuʼabʼal oj ajyukotik sok spetsanil jkʼujoltik› (Romanos 6:17). Bʼa tuk yaljel, wani skʼana oja kʼuʼukyi ja smandari, pe mi jach tʼenubʼaluk, jani yuja waxa yajtayi. Ja jas wa xkʼanxi ja bʼa xetʼanik 3 sok 4 ja bʼa juʼun it jani oj skoltaya oja jeʼ waxa yajtay ja Jyoba bʼa chabʼ modo: skʼulajel ja jas lek xyila sok yijnajel ja jas miyuki.
2. ¿Jas yuj bʼobʼta wokol sjejelyi wa xyajtaytik ja Jyoba?
«Jel jitsan ja swokol ja maʼ toji» (Salmo 34:19). Jpetsaniltik wala wokolanitik yuja mulanumotiki. Bʼobʼta cha oj kitik wokol yuja mey kiʼojtik jitsan takʼin, ja jastik mi tojuki sok tuk wokolik. Yajni wa x-ekʼ jbʼajtik wokolik, bʼobʼta mas wokol xkabʼtik skʼulajel ja jas wa skʼana ja Jyoba. Sok bʼobʼta masni pasil skʼokjel ja smandari. Pe yajni ja weʼn waxa kʼujolan skʼuʼajel ja jas wa skʼanawi, wana sjejelyi ke masni waxa yajtay yuj chikan jasunuk. Sok cha waxa jeʼayi toj aya. Jaxa yeʼn, tojni oj ajyuka mok sok nunka oj yaʼakan (kʼuman ja Salmo 4:3).
LA JNEBʼTIK MAS
La kiltik jas yuj ja ajyel kʼuʼabʼal tʼilani xyila ja Jyoba sok jasa oj skoltayotik bʼa tolabida ajyel toj.
3. Jun jasunuk bʼa ti chʼikana ja weʼn
Jastalni wa xyala ja loʼil bʼa Job, ja Satanás yala jun abʼal bʼa mi kechan ti chʼikan ja Job, cha jachuk ja matik wa skʼana oj yaʼteltaye ja Jyoba. Kʼumanik ja Job 1:1, 6–2:10 sok loʼilananik sbʼaja jas ti nochani:
-
Jastalni yala ja Satanás, ¿jas bʼi yuj kʼuʼabʼal ajyi ja Job? (Kʼelawik ja Job 1:9-11).
-
¿Jasa jmultik wa sleʼakitik ja Satanás? (Kʼelawik ja Job 2:4).
Kʼumanik ja Job 27:5b sok loʼilananik sbʼaja jas ti nochani:
-
¿Jastal sjeʼa ja Job meran wa syajtay ja Jyoba?
Yuja toj ajyi, ja Job sjeʼa wa syajtay ja Jyoba.
Ja toj wala ajyitik, wa xjeʼatik wa xyajtaytik ja Jyoba.
4. Agustoʼaxuk ja skʼujol ja Jyoba
Kʼumanik ja Proverbios 27:11 sok loʼilananik sbʼaja jas ti nochani:
-
¿Jastal wa xyabʼ ja Jyoba yajni waxa kʼuʼanyi sok waxa tsaʼa skʼulajel bʼa lek? ¿Jas yuj?
5. Ojni bʼobʼ ajyan toj soka Jyoba
Yuja wa xyajtaytik ja Jyoba wa snikawotik yaljel yabʼ ja tuk sbʼaja yeʼn. Sok yuja toj aytiki wa snikawotik skʼulajel ama ay ekʼele mi pasiluk. Kʼelawik ja BIDEO sok loʼilananik sbʼaja jas ti nochani:
-
¿Wokol maʼ xa wabʼ loʼilanel soka tuk sbʼaja Jyoba?
-
Ja bʼa bideo, ¿jasa skʼulan ja Grayson bʼa mixa oj xiwuk?
Masni pasil ajyel toj ta wa xyajtaytik ja jas lek xyila ja Jyoba sok yijnajel ja jas mi lekuk. Kʼumanik ja Salmo 97:10 sok loʼilananik sbʼaja jas ti nochani:
-
Jastalni anebʼunej man wego, ¿jas jujuntik bʼa wa syajtay ja Jyoba? ¿Sok jas jujuntik wa xyilkʼujolan?
-
¿Jastal oj bʼobʼa nebʼ syajtajel ja bʼa leki sok yilkʼujolajel ja bʼa malo?
6. Skʼuʼajelyi ja Jyoba wa xkilatik slekilal
Skʼuʼajelyi ja Jyoba jani tolabida mas lek. Kʼumanik ja Isaías 48:17, 18 sok loʼilananik sbʼaja jas ti nochani:
-
¿Wan maʼ xa kʼuʼan wa snaʼa ja Jyoba jasa mas lek bʼa keʼntik? ¿Jas yuj jach waxa pensaran?
-
¿Jastal skoltuneja ja skʼulajel estudiar ja Biblia sok snajel sbʼaj mas ja Jyoba, ja Dyos smeranil?
JA JAS WA XYALAWE JUJUNTIK: «Mi tʼilanuk xyila ja jas wa xkʼulan ja Dyos».
-
¿Jas teksto oj bʼobʼa jeʼ ke ja jas wa xkʼulantiki ayni jas wa xyabʼ ja Jyoba?
JA JASA NEBʼA
Waxa jeʼa waxa yajtay ja Jyoba yajni waxa kʼuʼanyi sok wala ajyi toj ama ay wokol.
Yajel juljkʼujoltik
-
¿Jas wa sjeʼawi ja sjejel bʼa Job?
-
¿Jastal oja jeʼ waxa yajtay ja Jyoba?
-
¿Jas oj skoltaya bʼa ajyel toj soka Jyoba?
LEʼA TUK JASTIK
Ila jastal oj bʼobʼ ajyan toj soka Jyoba sok ja kongregasyon.
Naʼa mas sbʼaja abʼalik yala ja Satanás.
«Tojni wa x-ajyi ja Jobi» (Ja Bibliʼa: ¿jas rason yiʼojani?, xetʼan 6)
Ila jastal ja yal untiki wani xbʼobʼ sjeʼe wa syajtaye ja Jyoba.
¿Jastal oj bʼobʼ ajyuke toj soka Jyoba ja keremtik akʼixuk yajni wa xtʼenjiye yuja tuk?
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
